• Tweet

• Tweet

අහෝ මේ දෙව්දත්ලා කිසිදා නොදකිති මොක්පුර!

බුදුරජාණන් වහන්සේගේ කාලයේත් උන්වහන්සේට එරෙහි වු භික්ෂූන් සිට ඇත. දෙව්දත් ථෙර ඉන් ප්‍රමුඛ ස්ථානය ගනියි. ඒ නිසා අහෝ දෙව්දත් නොදුටි මොක්පුර! යැයි කියමනක්ද ඇත. මෙයින් ගම්‍ය වන සත්‍යය නම්, චීවරය දැරූ පමණින් මෝක්ෂය ලබා ගන්නට බැරි බවයි. කෙනෙකුට ලොවටම යහපතක් කරමි යැයි අරමුණු කරමින් චීවරය දරන්නට හැකි වා සේම තවත් කෙනෙක්ට ස්වකීය ආත්මාර්ථය ප්‍රමුඛ කරමින්ද චීවරය දැරිය හැක.

 

බුදුරජාණන් වහන්සේගේ යුගයේ දෙව්දත් ථෙර විසින් චීවරය දැරුවේ ආත්මාර්ථය උදෙසා බව පැහැදිලිය. බුදුරජාණන් වහන්සේගේ යුගයේම තත්වය එසේ නම් වත්මන කල ගැන කවර කථාද? මා පලමුවෙන් මේ හේතු පාඨය ඔබ වෙත ඉදිරිපත් කළේ වර්තමාන බොදුනුවන් පමණක් නොව මුළු රටම අයාලේ සහ විනාශයේ ලන නුදුරු අනාගතයේ සිදුවිය හැකි විපතක් ගැන ඔබගේ අවධානය යොමු කර වීමටයි. එනම් සියවස් ගණනාවක් එකට බැඳී ලක්මවගේ තුරුලේ විසු සිංහල මුස්ලිම් බැඳියාව සිඳලන්නට යතිවර පෙලක් පෙරටු කොටගත් ආගම්බේධවාදී රැළක් බිහිව තිබෙන නිසාවෙනි. මොවුන් එක් පැත්තකින් කියන්නේ මුස්ලිම් ව්‍යාපාර වර්ජනය කරමු කියායි. අනෙක් පසින් කියන්නේ හලාල් සහතිකය ලත් නිපැයුම් වර්ජනය කළ යුතු බවයි.

 

 

මුස්ලිම් ව්‍යාපාර යනුද මෙරට ජනතාවට සෙත සලසන අපේම රටේ අභිමානය බව මේ දෙව්දත්ලාට නොපෙනෙන්නේ ඔවුන් කිසිදා ආර්ථික විද්‍යාව පිළිබඳ මෙලෝ හසරක් උගෙන නැති නිසා බව ඉතාම පැහැදිලිය. මන්ද ඔවුන්ගේ විෂය පථයේ වාණිජය විෂයයන් නොමැති බැවිණි. අපේ රටේ නිශ්පාදනයන් පිටරට වලට අපනයනය කරමින් රටට විශාල ලෙස විදේශ විනිමය සපයන මුස්ලිම් ව්‍යාපාර කොපමණ තිබෙනවාද? නිදසුනක් ලෙස අප රටේ ප්‍රධාන අපනයන භෝගය වන තේ අපනයනය කරන මෙරට ප්‍රධානතම සමාගම් දෙකක් වන අක්බාර් සහෝදරයෝ සහ අහමඩ් තේ යනු මුස්ලිම් ව්‍යාපාර නොවන්නේද? මේ සමාගම් දෙකට අමතරව තවත් මුස්ලිම් සුළු ව්‍යාපාරිකයන් රැසක්ද ඇත. එම ව්‍යාපාර වර්ජනය කර ලංකාවේ මුළු තේ අපනයනයම විනාශ කරගන්න තරම් මෝඩයෝ සිටිනවාද? එමගින් පවුල් කොපමණ සංඛ්‍යාවක ආදායම අහිමි වේදැයි මේ දෙව්දත්ලාට ගණන් තැබිය හැකිද? 

 

ඇඟලුම් කර්මාන්තය යනු අප රටේ ප්‍රධානතම අපනයන නිශ්පාදන වලින් එකකි. මෙම ඇඟලුම් ක්ෂේස්ත්‍රය තුලද මුස්ලිම් වරුන් රැසක් සිය ඉමහත් දායකත්වය රටට ලබා දෙන්නේය. එමගින් අපේ රටේ ගම්බද යුවතියන්ට විශාල වශයෙන් රැකියා අවස්ථාවන් උදාවී ඇත. මේ යුවතියන්ට ඇඟලුම් ක්ෂේස්ත්‍රයේ රැකියාවන් නොවන්නට ඔවුනටද සිදුවන්නේ මැදපෙරදිග ගොස් සිය දිවියේ ජවය ශක්තිය වෙන රටකට පුදන්නටය. මේ ආගම්බේධ වාදීන්ගේ අදහස අනුව යමින් ඇඟළුම් ක්ෂේස්ත්‍රය තුලට මුස්ලිම් වරුන් දායක වී රටට ගෙන එන ආදායම පිළිකෙව් කර රටක් ඉදිරියට යා හැකිද? එමගින් කී දෙනෙක්ට රැකියා අහිමි වීමට ඉඩ තිබේද? මේ දෙව්දත්ලා ආර්ථික විද්‍යාව ගැන මෙලෝ හසරක් නොදන්නා බව මා ඔබට මතක් කළේ එහෙයිනි.

 

මා විසින් මෙම ලිපියේ තවත් නම් සඳහන් නොකල අපේ රටට විදේශ විනිමය ගෙනෙන බොහෝ ව්‍යාපාර ක්ෂේස්ත්‍ර වලට මුස්ලිම් වරුන් සිය දායකත්වය ලබා දෙති. අතීතයේ අපේ රටේ සිටි සමහර රජවරුන් සිය රාජ්‍යයේ ව්‍යාපාර කටයුතු මුස්ලිම් වරුන්ට පවරා දුන් බව ඉතිහාසයේ දැක්වේ. එයට ප්‍රධානතම හේතුව නම් මුස්ලිම් වරුන් ව්‍යාපාර ක්ෂේස්ත්‍රය තුල දැක්වු සහජ දක්ෂතාවයයි. වර්තමානයේද බොහෝ මුස්ලිම් වරුන්ගේ ජාන තුල එය පිහිටා ඇත. මේ දක්ෂතාවය තුලින් සමහර අපේ රටේ මුස්ලිම් වරුන් පිටරටවලටද ගොස් ව්‍යාපාර කරමින් මෙරටට ආදායම ලබාගෙන එන බව ඔබ දන්නවාද? නිදසුනක් වශයෙන් අප්‍රිකානු රට වලට ගොස් එහි මැණික් මිලදී ගෙන ඒවා යුරෝපා රටවලට විකුණා ඉන් ලැබෙන ලාභය මෙරටට ගෙන එන දේශීය මුස්ලිම් ව්‍යාපාරිකයන් සිටින බව ඔබ දන්නවාද? ලංකාවේ ස්වර්ණාභරන නිශ්පාදනය කොට ඒවා ලංකාවට පැමිණෙන සංචාරකයන්ට අලෙවි කරන සහ පිටරටවල පවා ස්වර්ණාභරණ අලෙවි සැල් පවත්වමින් මෙරටට ආදායම ගෙන එන මුස්ලිම් ව්‍යාපාරිකයන් සිටිති.

 

 

අනෙක් අතින් හලාල් නිශ්පාදන වර්ජනය කරන්නට ගියහොත් කොපමණ බෞද්ධ වෙලඳාම් වර්ජනය කරන්නට සිදුවේද? නිදසුනක් ලෙස මැලිබන් බිස්කට් සමාගම හලාල් සහතිකය ලත් සිංහල ව්‍යාපාරයකි. ඔවුන් හලාල් සහතිකය ගැනීමට ප්‍රධාන හේතුන් දෙකකි. එනම් තම සමාගමේ නිශ්පාදන ලංකාවේ අලෙවිය වැඩි කර ගැනීමට සහ ඔවුන් විසින් එම බිස්කට් අපනයනය කරන මැදපෙරදිග රටවල විශ්වාසය දිනා ගැනීමටයි. මේ ආර්ථික විද්‍යාව ගැන මෙලෝ හසරක් නැති උදවිය කියන ආකාරයට ජනතාව හලාල් වර්ජනය කරන්න ගියහොත් සිංහල බෞද්ධයන් රැසක් සේවය කරන සහ ඔවුන්ගේම පාලනයේ තිබෙන මැලිබන් ආයතනයට කුමක් සිදුවේද?

 

අනෙක් පසින් මෙම හලාල් සහතිකය ලබා සිටින සිංහල ව්‍යාපාර විසින් ඔවුන්ගේ හලාල් සහතිකය ඉවත් කර ගතහොත් ඔවුන්ගේ නිශ්පාදන පිටරට වලට අපනයනය කිරීමේදී දැවැන්ත අර්බුධ වලට මුහුණ දෙනු නියතය. අද මුස්ලිම් නොවන රටවල් පවා හලාල් සහතිකය ලත් නිශ්පාදන වලට යොමු වන්නේ පාරිභෝගිකයන් ඒ කෙරෙහි දක්වන විශ්වාසය නිසාවෙනි. හලාල් සහතිකය නොමැතිව සිද්ධාලේප වෙද මහතාට සිය නිශ්පාදනය වන බාම් එකක් වත් විදේශ වෙලඳපොලට විකුණා ගැනීමටවත් අපහසු බව මේ අය නොදනී. සිද්ධාලේප වෙද මහතාද ස්වකීය නිශ්පාදන වලට හලාල් සහතිකය ලැබ සිටින්නේ ඒ නිසාය.

 

මේ දෙව්දත්ලාගේ ඒකායන අරමුණ කුමක්ද? රටට කුමක් වුවද ස්වකීය ආත්මාර්ථය මුදුන් පමුණුවා ගැනීම නොවේද? ඔවුන්ගේ ස්වාභිමතාර්ථය වනාහී රට තුල වර්ගවාදය රජ කරවීමයි. එමගින් ජනතාවටත් ව්‍යාපාරිකයන්ටත් සිදුවන කිසිදු පාඩුවක් ගැන ඔවුන්ට වගක් නැත. මන්ද ඔවුන් දෙව්දත්ලා වුවද චීවරධාරීන් නිසා සිව්පසයෙන් අඩුවක් නොමැති බැවිනි. මොවුන් සැබවින්ම ජනතාවට මිතුරු වෙසින් සිටින රටට වින කරන සතුරන් බව ජනතාව දැනගත යුතුය.

 

අහෝ! මේ දෙව්දත්ලා කිසිදා මොක්පුර නොදකින අතර රටත් නන්නත්තාර කරන්නට වලිකති.