• Tweet

• Tweet

අන්වර් මනතුංග බ්ලොග් අඩවිය ඇරඹු මුල් අවස්ථාවේ එහි Main banner හෙවත් ප්‍රධාන රූපිත පටය කෙසේ විය යුතුදැයි මා එතරම් අවධානයක් දැක්වුයේ නැහැ. ඉන් මාස කිහිපයකට පසුව නැවත වෙනස්කම් කරන අවස්ථාවක මට එය කරදුන් සහෝදරයා විසින් මෙහි ප්‍රධාන රූපිත පටයට කුමණ ආකාරයේ ඡායාරූපයක් ගතයුතු දැයි ඇසුවා. මම සාමාන්‍යයෙන් කඳු වලට ආශාවක් දක්වන්නෙක් බැවින් කිසිත් නොසිතාම සමනොල කන්ද ගමු යැයි යෝජනා කළෙමි. නමුත් එහි බරපතල කම වැටහුනේ මාස කිහිපයකට පසුයි.

 

එනම් මා විසින් ශ්‍රීපාදස්ථානය මගේ වෙබ් අඩවියේ ප්‍රධාන ඡායාරූපය වශයෙන් යොදා ගැනීම බුදු දහමට අපහාසයක් බව සඳහන් කරමින් අන්තර්ජාලයේ ප්‍රචාරයන් දියත් වීමයි. මීට කලින්ද මා සිහල මුස්ලිම් වෙබ් අඩවිය වෙනුවෙන් සීගිරිය යොදා ගැනීම ගැන තවත් අයට ප්‍රශ්නයක් තිබුණි. ඔවුන්ට අනුව සීගිරියත් කලින් විහාරයක් තිබුණු ස්ථානයකි. ඒ නිසා මා විසින් වෙබ් අඩවියේ ප්‍රධාන රූපිත පටයේ ඡායාරූපයට සීගිරියේ ඡායාරූපයක් යොදා ගැනීමද ඔවුන්ට අනුව විශාල වරදකි. ඒ කන්දත් ඒ අයගේ මේ කන්දත් ඒ අයගේ කඳු යායම ඒ අයගේද? කෙන්ද කන්දක් කරගන්න අයට නම් මෙයත් ප්‍රශ්නයක් විය හැකි නමුත් මේ මොන්ටිසෝරි තර්ක වලින් මා වෙබ් අඩවියේ බැනරයට සමනොල කන්ද යොදා ගැනීම නැවැත්විය නොහැකි බව පලමුව දන්වමි.

 

නමුත් ඉහත කරුණ නිසා මම සමනොල කන්දේ සැබෑ ඉතිහාසය සෙවීමට තීරණය කළෙමි. මා විසින් කරන එම පර්යේෂන ලිපි මගින් ඔබවෙත ඉදිරිපත් කිරීමටද බලාපොරොත්තුවෙන් සිටිමි. එමෙන්ම සමනොල සිරස ගැන ඔබ දන්නා තොරතුරු වේ නම් ඒවාද මා වෙත එවන මෙන් ඉල්ලා සිටිමි. එහිදී ගොතපු කරුණු නොව සාක්ෂි සාධක සහිත කරුණු පමණක් එවන්නේ නම් කෘතඥ වෙමි. මා හට ඒවායින් ගතහැකි යමක් වේ නම් ඒ ඒ අයගේ නමින්ම පලකරන්නට බලාපොරොත්තු වෙමි. මෙහිදී සමනොල ගිර ගැන මට යම් අදහසක් තිබුණද විවෘත මනසකින් මේ ගවේෂනය කිරීමට බලාපොරොත්තු වෙමි. මා මෙම සංවාදයට ආරාධනා කරන්නේ ගවේෂනයට කැමති, ආවේගශීලී නොවන සහ විවෘත මනසක් ඇති අය හටයි.  

 

අන්වර් මනතුංග විසින් මේ කරන ගවේෂනය ගැන කිසිවෙක් කලබල වීමට හේතුවක් නොමැත. මන්ද මෙමගින් මා කිසියම් ආගමකට අයත් සිද්ධස්ථානයක් ගැන අයිතිවාසිකම් කියන්නට බලාපොරොත්තු නොවන බැවිනි. විශේෂයෙන් බුදුරජාණන් වහන්සේ ලංකාවට වැඩිය බවක් සම්බන්ධව කිසිදු පුරා විද්‍යාත්මක සාධකයක් නොමැති බවට මහාචාර්ය සෙනරත් පරණවිතාන ශූරීන් පැවසු පසුව එතුමාට පාරේ බැහැලා යන්නට බැරි තත්වයක් ඇති වුණාසේ තත්වයක් කිසිසේත්ම බලාපොරොත්තු නොවෙමි. මගේ ප්‍රයාමය සමනොල ගිර සම්බන්ධව වැලලී තිබෙන ඉතිහාසය නැවත ගොඩ ගැනීමයි. එමගින් සිදුවන්නේ සැමගේ චින්තනය පුළුල් වීමකි.

 

සමනොල සිරස යනු අපේ රටේ ප්‍රධාන ආගම් තුන වන බෞද්ධ, හින්දු සහ මුස්ලිම් යන තුන්වර්ගයම ගමන් කරන්නාවු ස්ථානයකි. බෞද්ධයන් සිතන්නේ එය බුදුරජාණන් වහන්සේගේ පාදස්පර්ශය ලැබු ස්ථානයක් බවයි. හින්දු අයවළුන් සිතන්නේ රාවණා යුගයේදී සිව දෙවියන්ගේ පාදස්පර්ශය ලැබු ස්ථානයක් ලෙසයි. මේ කරා යන මුස්ලිම් වරුන් සිතන්නේ මිනිසාගේ ආදිම මුල් මව්පියන් යුගලය වන ආදම් සහ හව්වා යුවල මෙලොවට නෙරපා හැරි අවස්ථාවේ ආදම් තුමා විසින් පාද ස්පර්ශය තැබු ස්ථානයක් බවයි. ලංකාවට පෘතුගීසීන් පැමිණිය පසුව මේ ස්ථානය කිතුණු උරුමයක්ද ඇතිකළ නමුදු එය ඉතාමත් මෑතක සිදුවීමක් නිසා එතරම් ප්‍රශ්නයක් කරගත යුතු නැත. මේ සියල්ල ඒ ඒ ආගමිකයන් විසින් විශ්වාස කරන සංකල්පයන් වන නමුදු මේ සියල්ලට විද්‍යාත්මක හෝ පුරාවිද්‍යාත්මක පදනමක් නොමැති බව පලමුව අප සැලකිල්ලට ගතයුතු කරුණකි.

 

එක දෙයක් නම් පැහැදිලිවම කිව හැක. එනම් අතීතයේදී මේ සියළුම ජාතීන් සහ ආගමිකයන් ඉතාමත් සහජීවනයෙන් සමනොල ගිර තරණය කර ඇති බවයි. එකල සිටි ජනතාව මෙය තමන්ගේ ආගමට අයත් යැයි අනෙක් ආගමිකයන් සමග තර්ක කරන්නට හෝ බැන අඬගසා ගන්නට ගියේ නැත. කිසිදු ආගමක ජනකොටසක් මෙය තනියෙන් භුක්ති විඳින්නට කටයුතු කළේද නැත. සමනොල ගිර අරබයා මට අයිතිවාසිකම් කිව හැක්කේ මා ශ්‍රී ලාංකිකයෙක් වන බැවිනි.  මා පුද්ගලිකව මේ ස්ථානයට යන්ට කැමති අන් කිසිදු කාරණයක් නිසා නොව සමනොල ගිර තරණයේදී දක්නට ලැබෙන ස්වභාව සෞන්දර්යයේ පහස විඳීමටයි.

 

සමනොල ගිර සම්බන්ධව විදෙස් පුරාවෘත්ත වලද යම් යම් කරුණු දැනගන්නට ලැබේ. විශේෂයෙන් මුස්ලිම් දේශාටකයෙක් වන ඉබ්නු බතුතා (ඉබන් බතුතා) සමනොල ගිර ගැන සටහන් තබා ඇත. එමෙන්ම මා හිතවත් ඉංග්‍රීසි ලේඛකයෙක්ට සමනොල ගිර ගැන අපට මෙතෙක් අනාවරණය නොවු අරාබි ඓතිහාසික තොරතුරු රැසක් හමුවී ඇත. අතීතයේ මෙරට පැමිණි ජාවක හෙවත් වත්මන් මැලේසියානු සහ ඉන්දුනීසියානු ජනකොටස්ද සමනොල ගිර තරණය කර ඇති බව ඔවුන්ගේ මුලාශ්‍ර වල දක්නට ලැබේ. මේ සියළු තොරතුරු අප මතු ලිපි වලින් එළිදක්වන්නට අදහස් කරමු.

 

මා කුඩා කල පාසලේදී උගත්තේ සමනොල ගිර ඓතිහාසික ස්ථානයක් වශයෙන් තිබී පසුව ජනශූන්‍යව වල්බිහිව තිබී නැවත සොයාගත් බවකි. මේ නිසා මෙම ගවේෂනය අවසානයේ සමනොල ගිර යනු කිසිදු ආගමකට අයත් එකක් නොවන බවට ඔප්පු වීමටද ඉඩ ඇත. කෙසේ වුවත් අපට මේ සියල්ල ගැන තීරණයකට එළඹීමට තවම කල් වැඩිය.