• Tweet

• Tweet

මව්බිම පුවත්පත් සමාගම විසින් 2012 ජූලි 24 වන අඟහරුවාදා පලකළ පුවත් පතේ “Life 100” “ලෝකය Change කරන්න ඉවහල් වුණු මිනිස්සු” “මුහම්මද්” යන උදෘතයෙන් “රජී” නම් වු නැමැත්තෙකු විසින් පලකළ ලිපියෙන් සහ ඒ සමග පලකළ පිංතූරයෙන් ඉස්ලාමයේ මහාර්ඝ ශාස්තෘවරයාණන් වන මුහම්මද් නබි (එතුමන්ට අල්ලාහ්ගේ ක්ෂාන්තිය සහ සමාදානය අත්වේවා) තුමාණන්ට විශාල අපහාසයක් වී ඇත.

 

මුස්ලිම් සමාජයෙන් එල්ලවු විරෝධතා හමුවේ මව්බිම පුවත්පත විසින් පිංතූරය ගැන නිවැරදි කිරීමක් පලකළ නමුදු එම පුවතින් සිදුවු වැරදි තොරතුරු නිසාවු අපහාසය ගැන මේ වන තුරු කිසිදු පියවරක් ගෙන නොමැති බව පෙනෙන්නට තිබෙන කරුණකි. ඒ නිසා මෙම ලිපිය ලියමින් එහි අන්තර්ගතය විමර්ශනයකට ලක්කිරීමට තීරණය කළෙමි. ඒ ලිපියේ කොටස් වෙන වෙනම උපුටා ගනිමින් ඒ ගැන මගේ විග්‍රහය කරන බව කරුණාවෙන් සලකන්න.

 

මාතෘකාව උපුටා ගැනීම

“Life 100” “ලෝකය Change කරන්න ඉවහල් වුණු මිනිස්සු” “මුහම්මද්”

උපුටා ගැනීම අවසන්

 

සිංහල සහ ඉංග්‍රීසි භාෂා දෙකෙන්ම (සිංග්ලිශ්-Singlish) වචන අරගෙන සෑදූ මෙම මාතෘකාවෙන්ම ලේඛකයාගේ සහ පුවත්පත් කතුවරයාගේ නොහැකියාව පිළිබිඹු වෙයි. මෙහි අරුත් ගැන්වෙන්නේ “ජීවිත 100” “ලෝකය වෙනස් කරන්න ඉවහල් වුණු මිනිස්සු” “මුහම්මද්” යනුවෙනි. ඇමරිකානු ලේඛක මයිකල් එච්. හාර්ට් විසින් රචිත The 100: A Ranking of the Most Influential Persons in History නම්වු පොතක් 1978 දී පලකරන ලදී. මා සිතන්නේ මේ ලේඛකයා විසින් මාතෘකාව සකසා ගන්නා ලද්දේ මේ පොතෙහි මාතෘකාව අනුසාරයෙන් බවයි. කෙසේ නමුත් මාතෘකාව සිංහලෙන් නිවැරදිව සාදා ගැනීම සම්බන්ධව නම් පුවත් පත් කතුවරයා සහ ලේඛකයා යන දෙදෙනාම අසමත් බව කිව යුතුමය.

 

උපුටා ගැනීම

පසුකාලයේ ඉස්ලාම් ආගම පිළිබඳ විධිමත් අධ්‍යනයක් කළ අයකු එයට උරුම හිමිකම් කී අයකු උපත ලබන්නට විය. හේ මුහම්මද් නම් විය. ඔහු උපත ලද්දේ ජේසුස් ඉපිද සියවස් 6 කට පසුය. මුහම්මද් නමේ තේරුම වුයේ අතිශයින්ම ප්‍රශංසනීය යන්නයි. මුහම්මද්ගේ දෙමාපියන් මිය යන විටත් ඔහු ඉතා ළදරු වියේ පසු වුවෙක් විය. ඉන් පසුව ඔහුව රැක බලාගනු ලැබුවේ තම මාමා කෙනෙකු විසිනි. ඔහු උපත ලද්දේ ඒබ්‍රහම් ඉෂාමෙල් යන පරපුරේ සමකාලීණයකු ලෙසිනි. මුහම්මද් නක්ෂත්‍රකරුවෙකු වු අතර  ඔහුගෙන් පසු කිසිවෙකු එය දැන නොසිටි බැවින් නක්ෂත්‍රකරුවන්ගේ ප්‍රධානියා ලෙස ඔහුව මුද්‍රා තබන ලදී.

උපුටා ගැනීම අවසන්

 

මෙහිදී පසුකාලයේ ඉස්ලාම් ආගම පිළිබඳව යනුවෙන් ලේඛකයා ආරම්භ කිරීමෙන් මෙම ලිපිය කිසියම් ලිපියක මැද කොටසකින් උපුටා ගන්නා ලද්දක් බැව් පෙනේ. එහිදී ඔහු සඳහන් කරන ඒබ්‍රහම් ඉෂාමෙල් යන නම් දෙකකි. මේ නම් දෙකම භාවිතා කර තිබෙන්නේ වැරදි ආකාරයටයි. ඒබ්‍රහම් නමේ නිවැරදි උච්චාරණය ඊබ්‍රාහීම්ය. මේ ලේඛකයා ඒ නම ලියා තිබෙන්නේ කිතුණු ක්‍රමයටයි. ඉෂාමෙල් කියා කෙනෙක් නැත. සිටියේ ඉස්මයිල් නම් නබි වරයායි. මේ නම කිතුණුවන් පවසන්නේ ඉශ්මායෙල් යනුවෙනි. මෙම ලේඛකයා ඉස්ලාම් ගැන ලියන්නේ කිතුනු ක්‍රමයට බව පැහැදිලිය.

 

මෙම ලිපියේ ඇති බරපතලම අපහාසය නම් “මුහම්මද් නක්ෂත්‍රකරුවෙකු වු අතර  ඔහුගෙන් පසු කිසිවෙකු එය දැන නොසිටි බැවින් නක්ෂත්‍රකරුවන්ගේ ප්‍රධානියා ලෙස ඔහුව මුද්‍රා තබන ලදී.” යන කොටසයි. ඇත්ත වශයෙන්ම මුහම්මද් නබි තුමාණන් යනු නබි Prophet වරයෙකි. නබි වරුන් යනු දෙවිඳුන් විසින් මෙලොවට පහල කරන ලද මානව ශාස්තෘ වරුන්ය. ඔවුන් විසින් කරන්නේ දෙවිඳුන්ගේ කැමැත්ත ලොව ප්‍රකාශ කිරීමයි. ජුදෙව්, කිතුණු සහ මුස්ලිම් වරුන් මෙම මානව ශාස්තෘ Prophet සංකල්පය විශ්වාස කරති. ඉස්ලාම් පවසන්නේ මුහම්මද් නබි තුමාණන් නබිවරුන්ගේ අවසාන නබි වරයා ලෙස අල්ලාහ් විසින් මුද්‍රා තබා ඇති බවයි. ඉස්ලාම් නක්ෂස්ත්‍ර සහමුලින්ම ප්‍රතික්ෂේප සහ පිළිකුල් කරන දහමක් වන අතර මුහම්මද් නබි තුමාණන් කිසිදු අවස්ථාවක නක්ෂස්ත්‍රය භාවිතා කොට නැත.  

 

උපුටා ගැනීම

තරුණ කාලයේ ඔහුගේ හදවතට ආදරය, කරුණාව, ත්‍යාගශීලී බව, සත්ගුණවත් බව කාවැදී තිබුණු බවට මුස්ලිම් සංස්කෘතිය මගින් අනාවරණය කෙරේ. තම වයස අවුරුදු 25දී විවාහ වුණු අතර ඉන් වසර 15 කට පසු ධර්මය උනන්දුවෙන් දේශනා කරන්නට විය. නිදහසේ සිතුවිලි අතර නිමග්න වීමට හා යාච්ඤා කිරීමට ඔහු මෙකාහි ගල් ගුහාවකට යන්නට විය.

උපුටා ගැනීම අවසන්

 

තරුණ කාලයේ මුහම්මද් නබි තුමාණන්ට තිබු ගුණාංග අනාවරණය කරන්නේ එතුමන්ගේ අනුගාමිකයන් විසින් පවසන ලද වදන් වලිනි. මේවා නබි වදන් (හදීස්) ග්‍රන්ථ වල සටහන් වී ඇත. මෙහිදී ලේඛකයා සංස්කෘතිය යන වචනයේ සැබෑ අරුතද නොදන්නා බව පැවසිය හැක. සංස්කෘතිය මගින් අනාවරණය කරන්නේ කිසියම් සමාජයක උත්කර්ෂය මිස පුද්ගලයෙක් ගැන නොවේ. එතුමන් ඉස්ලාමය දේශනා කරන්නට පටන් ගත්තේ වයස අවුරුදු 40 පසුව වන අතර මේ ලේඛකයා විසින් “මෙකා” යන වැරදි නමින් හැඳින් වු නිවැරදි නගර නාමය වන “මක්කාහ්” හි “හිරා” නම් ගුහවකට පුරුද්දක් ලෙස වරින් වර ගොස් තනිවම ධ්‍යාන ගතව සිටියේ ඊට පෙරදීයි. එතුමන්ට වයස අවුරුදු 40 දී දේව අනාවරණය ලැබුණු පසුව තවදුරටත් පුරුද්දක් ලෙස එම ගුහාවට ගිය බවක් නබි වදන් වල කිසිදු ස්ථානයක සඳහන් නොවේ.  

 

උපුටා ගැනීම

ක්‍රි.ව. 632 දී මුහම්මද් තුමා ඩෙයිනා හිදී මියගිය අතර ඉන්පසු සියවස තුල මුස්ලිම් බලය ආර්මේනියාව, ඉරාකය, ලෙබනනය, පලස්තීනය, පර්සියාව, ස්පාඥ්ඤය, සිරියාව සහ උතුරු අප්‍රිකාවේ බොහෝ ප්‍රදේශ ගණනාවක පැතිර යන්නට විය. මුහම්මද් තුමා විසින් අරාබි ජාතිකයන්ට ආගමක් ලබාදුන් අතර එම ආගම ලොව විශාලතම ආගමක් වශ‍යෙන් ලොව ප්‍රචලිතව තිබේ.

උපුටා ගැනීම අවසන්

 

මුහම්මද් නබි තුමාණන් මිය ගිය ස්ථානය ගැනද මේ ලේඛකයා පවසන්නේ වැරදි නමකි. මුහම්මද් නබි තුමාණන් මියගියේ “ඩෙයිනා” නොව “මදීනා” හිදීයි. එමෙන්ම මුහම්මද් තුමාණන් අරාබි ජාතිකයන්ට ආගමක් දුන් බවක් සඳහන් වීමද වැරදි අදහසකි. ඉස්ලාම් දහම මිනිසා වෙත දානය කරන ලද්දේ අල්ලාහ් විසින් වන අතර එය අරාබි වරුන්ට දුන් දහමක් නොව ලොව සව්සත වෙතම දුන් එකකි. මුහම්මද් නබි තුමාණන්ගේ කාලයේ මදීනා නුවර ඉස්ලාම් වැලඳ ගත් අය අතර අරාබි ජාතිකයන්ට අමතරව ජුදෙව්, පර්සියානු, අප්‍රිකානු ජාතීක මිනිසුන් සහ තවත් බොහෝ ජාතිකයන් සිට ඇත.  

 

මෙහි ලේඛකයාගේ නම සඳහන් වන්නේ “රජී” යන අන්වර්ථ නමකිනි. ‍මෙම ලිපිය ලියු ලේඛකයා විසින් තමන් ලියු ලිපිය සම්බන්ධව වගකීමක් ගත නොහැකි අයෙක් බව මෙයින් ගම්‍ය වේ. මෙම ලිපිය අදහස් ප්‍රකාශ කිරීමේ අයිතිය (Freedom of expression) දඩමීමා කරගෙන එතුල සැඟවී සිටීමේ උපාය මාර්ගිකව ලියුවක් බව අපට පැහැදිලිය. කෙසේ නමුදු ඉස්ලාමය ගැන ගවේෂනාත්මක හෝ විවේචනාත්මක ලිපියක් ලියන්නට තරම් මේ ලේඛකයා පරිණත නොවන බවට මෙම ලිපිය තුලින් පැහැදිලි වන තවත් කරුණකි. ‍එමෙන්ම වගකීමකින් තොරව මෙවැනි ‍ලේඛකයන්ගේ ලිපි තම කතුවරත්වයේ පවතින පුවත් පතක පලකිරීමෙන් කතුවරයාගේ නොහැකියාවද පිළිබිඹු වේ.