• Tweet

• Tweet

නැවත වරක් අන්තර්ජාලය තුල මා ජනප්‍රිය කරවීමේ ක්‍රියාවලිය ආරම්භ වී ඇත. සමහර විට මා ජනප්‍රිය වුවා මදියැයි ඔවුන් සිතනවා විය හැක. මෙවර ඔවුන් අල්ලාගෙන තිබෙන තුරුම්පුවම වැරදි එකකි. මන්දයත් පංසලක ඉෆ්තාර් කෑම වේලක් දී පල්ලියක පිරිතක් කීමට ඉල්ලීමයි. ඉෆ්තාර් යනු ආහාර වේලකි. දානයද යනු ආහාර වේලකි. මේ දෙකටම දහම් දෙකෙහි ගැටළුවක් නොමැති තැන මුස්ලිම් පල්ලියක පිරිත් කියන්නත් පංසලක ඉස්ලාමීය නැමදුම් කරන්නත් යන්නේ ඇයි?

 

ඇත්තටම මෙය ආගම්බේධවාදීන්ගේ ප්‍රයෝගයකි. පසුගිය දිනවල උපවාස අවසන් කිරීමේ වැඩසටහන් දිවයින පුරා පැවැත්වුනි. මොවුන්ට මෙය කටු අණින්නාක් වැනි විය. කළ හැකි දෙයක්ද නොවුණි. මේ සෑම වැඩසටහනකටම බෞද්ධ බැතිමතුන් සහ මුස්ලිම් වරුන් මදි නොකියන්නට සහභාගී විය. මෙය නැගලා ගියහොත් බිස්නස් නැති වන්නේ ආගම්බේධවාදීන්ටය. ඒ නිසා කෙසේ හෝ බකට් එකක් ඇදිය යුතුය. කට්ටිය සෙට් වී ඇද්ද බකට් එක දැන් පැහැදිලිය. එනම් මුස්ලිම් පල්ලියක පිරිතක් කියවන්නට ඉල්ලා මුස්ලිම් වරුන්ව අපහසුතාවයට පත්කර බහුතර බොදුනු ජනතාව වෙත මුස්ලිම් වරුන් පක්ෂග්‍රාහී බව පෙන්නීමයි.

 

අද ඔවුන් පෙන්නන්නේ පංසලකදී මුස්ලිම් වරුන් දේව නැමදුමක යෙදී ඇති නිසා මුස්ලිම් පල්ලියක පිරිතක් කියන්නට බැරි ඇයි? යනුයි. මෙහිදී මගේ අදහස කුමක්දැයි එම ලිපියට පැමිණි ප්‍රශ්නයකදී පැහැදිලිව දැක්වුයෙමි. ඔබගේ දැනගැන්ම පිණිස එය නැවත ඔබ වෙත ඉදිරිපත් කරන්නම්.

 

උපුටා ගැනීම

මෙම ඉෆ්තාර් වැඩ සටහන තිබී ඇත්තේ පංසලක ධර්මශාලාවක බවයි පෙනෙන්නේ. එම ධර්මශාලාව තුල බුද්ධ ප්‍රථිමාවක්ද පෙනෙන්නට තිබෙනවා. පලමුවෙන් කියන්න තිබෙන දෙය නම් මෙතැන නැමදුම් කරපු මුස්ලිම් අය ඉස්ලාමයට පටහැනි දෙයක් කර ඇති බවයි. මන්දයත් කිසියම් ප්‍රථිමාවක් තිබෙන තැනක මුස්ලිම් අපට නැමදුම් කළ නොහැකියි. මුහම්මද් නබි තුමාණන් කාබා සිද්ධස්ථානයේ ප්‍රථිමා ඉවත් කරන තුරු එම ස්ථානයේ නැමදුම් ඉටු කළේ නැත. එයට නබි වදන් සහිතව විග්‍රහයක් අපේ හසන් සහෝදරයා විසින් ඉදිරිපත් කරනු ඇත.

අනෙක් අතින් එතැන මුස්ලිම් අය නැමදුම් කර ඇත්තේ ‍එහි බෞද්ධ අයගේ ආරාධනයෙන්. බෞද්ධ ආරාමයක එවැනි නැමදුම් කිරීම හරිද? වැරදිද? යන්න මහානායක ස්වාමින් වහන්සේලා විසින් විසදිය යුතු ප්‍රශ්ණයක්. එම නැමදුම සම්පූර්ණයෙන් තිබෙන්නේ අරාබි බසිනි. අරාබි බසින් අප පවසන දෙය කුමක්ද? යන්න එතැන සිටි බොදුනුවන් දැන සිටියාද? මට මෙහිදී ඉස්ලාමීය නැමදුම සම්පූර්ණයෙන් සිංහලට පරිවර්තනය කර පලකිරීමට වෙලාවක් නොමැත. නමුත් නැමදුමට කැදවීම එනම් අදාන් කියවීමද එතැනදී කළ නිසා එහි අරුත පලකරන්නම්.

අල්ලාහු අක්බර්//// – අල්ලාහ් ශ්‍රේෂ්ඨයි

අශ්හදු අන්ලා ඉලාහ ඉල්ලල්ලාහ්// – මම සාක්ෂි දරමි. අල්ලාහ් හැර අන් දෙවි කෙනෙකු නොමැත

අශ්හදු අන්න මුහම්මදන් රසුලුල්ලාහ්// – මම සාක්ෂි දරමි. මුහම්මද් අල්ලාහ්ගේ දුතයාය. (මානව ශාස්තෘ)

හයියාඅස්සලාත්// – නැමදුම කරා පැමිණෙන්න.

හයියාමල්ෆාලාහ්// – ජයග්‍රහණය කරා පැමිණෙන්න.

අල්ලාහු අක්බර්// – අල්ලාහ් ශ්‍රේෂ්ඨයි

ලා ඉලාහ ඉල්ලල්ලාහ් – අල්ලාහ් හැර අන් දෙවි කෙනෙකු නොමැත.

දෙවැන්නට මුස්ලිම් අපගේ නැමදුමේ ප්‍රධාන අල්-කුර්ආන පාඨය වන සූරා-ෆාතිහා හි අර්ථය බලමු.

පැසසුම් සියල්ලම විශ්වයේ පරමාධිපති අල්ලාහ්ටම පමණි.
(උන්වහන්සේ) අපරිමිත දයාන්විත අසමසම කරුණාන්විත(ද)
විනිශ්චය දිනයේ අධිපතිද (ද වේ)
ඔබම අපි නමදිමු. (ඉබාදත් කරමු) තවද ඔබගෙන් පමණක්ම පිහිට පතමු.
සෘජු මාර්ගය (වෙත) අපට මගපෙන්වා දෙනු (මැනවි)
(එය) ඔබගේ ආශිර්වාදය ප්‍රධානය කළ අයගේ මාර්ගයයි.
ඔබගේ කෝපයට භාජනයවු හෝ නොමග ගියවුන්ගේ මාර්ගය නොව

මෙවැනි දෙයක් බෞද්ධ පංසලක් තුල කිව යුතුද? යන්න තීරණය කළ යුත්තේ බොදුනුවන් බව ඇත්තකි. නමුත් මා නම් පුද්ගලිකව සිතන්නේ බෞද්ධ පංසලක් තුල මුස්ලිම් වරුන් එසේ නොකළ යුතු බවයි.

ඉස්ලාමයට අනුව නම් අනෙකුත් ආගමික වතාවත් මුස්ලිම් නැමදුම් ස්ථානයක කළ නොහැක. පංසලක මුස්ලිම් නැමදුම් කළ හැකිද? යන්න ශාසන හිතකාමීන් සහ මහානායක ස්වාමින් වහන්සේලා විසින් විසඳිය යුතු දෙයක් බව මගේ අදහසයි.

කෙසේ වෙතත් පංසලක මුස්ලිම් අය ආහාර වේලක් (ඉෆ්තාර් ලෙස හෝ) ගත්තාටද? මුස්ලිම් පල්ලියක ස්වාමින් වහන්සේලාට දනක් (ආහාර වේලක්-හදියා) දුන්නාටද වරදක් නැත. අපි අපගේ සීමාවන් හඳුනාගෙන අවබෝධය තුලින් සහජීවනය ගොඩ නැගිය හැකි බව මගේ අදහසයි.

උපුටා ගැනීම අවසන්

 

මෙහිදී මා පෙන්නා දුන්නේ දෙපැත්තටම පක්ෂග්‍රාහී නොවන අයුරිණි. මෙම සිද්ධියේදී මුස්ලිම් පාර්ශවය මෙන්ම බොදුනු පාර්ශවයද සීමාව ඉක්මවා කටයුතු කර ඇති බැව් පැහැදිලිවම පෙනෙන කරුණකි. මෙහිදී ආගම්බේධවාදීන්ට ප්‍රයෝග කරන්නට අවශ්‍ය කරුනුකාරණා ලැබුණි. ඕනෑම ප්‍රශ්නයකට මා දෙන්නේ සෘජු පිළිතුරු බව ඔවුන් දනිති. එම නිසා එම පිළිතුරු අනුසාරයෙන් මුස්ලිම් අප අන්තවාදී බව ‍බොදුනුවන්ට සනාථ කිරීම ඔවුන්ගේ ඒකායන අරමුණයි. ඔවුන්ට මෙවැනි ප්‍රයෝග කිරීම හැර කළහැකි අන්කිසි නිර්මාණශීලී දෙයක් නැත. සිත ද්වේශයෙන් පිරීගිය කල්හි නිර්මාණශීලී කිසිදු අදහසක් පහල නොවේ. පහල වන්නේ කුරිරු පවිටු අදහස්ය. ජනතාව බේධ බින්න කරන්නාවු අදහස්ය. 

 

ආගම්බේධවාදීන් විසින් මෙවැනි ප්‍රයෝග කරන වග හෙළිවුණේ ලංකා එක්ට්‍රීමිස්ට් බ්ලොග් අඩවිය විසින් ආගම්බේධවාදියෙකුගේ මුණුපොත් ගිණුම හැක් කිරීමෙන් පසුවය. බලන්න http://lankanextremist.wordpress.com/2012/07/06/ranga-jayawardene/ මවිතය දනවන කරුණ නම් ඔවුන් මුස්ලිම් අපට ගේම් ගසනවාට අමතරව ඔවුන්ගේ අයටද ගේම් ගසන බව මෙම තොරතුරු මගින් හෙළිවීමයි. එහි සඳහන් පිටියේ අප්පු නම්වු අන්තවාදියා ගසන ගේම් ආගම්බේධවාදීන්ගේ න්‍යායාචාර්යවරයා වන අසුචිරාළද නොදන්නා බවක් මෙම සංවාද වල සටහන් වී ඇත. කරුණු කෙසේ වුවද ලංකා එක්ට්‍රීමිස්ට් විසින් කළ එළිදරව්ව නිසා ආගම්බේධවාදයේ මූලය කුමක්දැයි සැමට දැන් පසක් වී හමාරය.

 

බොහෝ විට ආගම්බේධවාදීන් විසින් අන්වර් මනතුංග බ්ලොගයට පැමිණ මා සමග තර්ක කර දිනන්නට හැකිදැයි උත්සාහ කර බැරිවු තැන දමාගසා යන්නේය. එසේ යන අය අන්වර් මනතුංග බ්ලොගයේ තර්ක කර චොර වීමෙන් පසුව ඊලඟට යන්නේ අසුචිරාළගේ පටුවාව වෙතයි. එහි ගොස් අන්වර් මනතුංගව පතුරු ගසන්නේ හරියට බේබද්දන් බී ගත් පසු පරණ කෝන්තර අදින්නා සේය. එවිට එතැන සිටින අනෙකුත් සහචර අසුචි කාරයන් එයාව සනසන්නේය. මෙසේ සැනසෙන ආගම්බේධවාදීයා එතැන් පටන් අසුචිරාළගේ පටුවාවේ සිට ඉස්ලාමයට අපහාස කරමින් මෝඩ චූන් ලබන්නේය. මෙයින් ඔවුන් ලබන කාලකන්නි සතුට ඔවුන්ට කියා නිමකරන්නට බැරි එකකි. එවැනි කාලකන්නි සතුටක් දෙන අසුචිරාළගේ පටුවාවට ඔවුන් ණයගැතිය.  

 

හොරි‍ ඩොට් කොම් සහ හිවල් හඬ වැනි අයවළුන්ද කරන්නේ ලංකාවේ මුස්ලිම් වරුන්ට එරෙහිව විවිධාකාරයේ අසත්‍ය තොරතුරු මවා එමගින් බහුතර බොදුනු ජනතාව අතර ආගම්බේධවාදය ඇති කිරීමයි. මේ අශුද්ධ සංධානය දැන් ලංකාව තුල පිළිලයක් තරමට වර්ධනය වී ඇත. රජය විසින් මොවුන්ව මර්ධනය නොකරන්නේ නම් එය රටේ සාමයට මහත් තර්ජනයක් එල්ල කරනු ඇත. මේ නිසා වගකිවයුත්තන් මේ කෙරේ අවධානය යොමු කළ යුතුය.