මෙත පාන්නෝ

තමන්ගේ මුලස්ථානය ඉදිරියට පැමිණ උද්ඝෝෂනය කරන්නට පැමිණි භික්ෂුන් වහන්සේලාට පටිසෝතගාමීව ගුටිබැට වලඳවන්නේ කෙසේදැයි ඊයේ බොදු බල සේනා චීවරධාරීන් පිරිසක් පෙන්වා දී තිබුණා. එම ගුටිබැට දංසලෙන් වැලඳු භික්ෂුන් වහන්සේ නමක් දතකුත් අහිමිව රෝහල් ගත වුණා. එම පුවත මේ වන විටත් ඉංග්‍රීසි බසට හැරවී අන්තර්ජාතිකව ප්‍රචාරය වී හමාරයි.

මෙලෙසම පසුගිය කාලයේ බොදු බල සේනාව විසින් කරගෙන ගිය බොහෝ අබෞද්ධ ක්‍රියාවන් තුලින් පසුගිය කාලය තුල අන්තර්ජාතිකව බුදු දහමට අපහාස සිදුවුණා. නමුත් ඒ ගැන අපේ රටේ ආරක්ෂක ලේකම් තුමා දන්නේ නැහැ. එතුමා දන්නේ වෙබ් අඩවි වලින් බුදු දහමට අපහාස වන බව විතරලු. අද බෞද්ධ නමින් පවත්වාගෙන යන්නාවු ඊනියා වෙබ් අඩවි වලින් අන්‍යාගම් වලට කෙතරම් අපහාස කරනවාද? යන්නවත් එතුමා දන්නේ නැහැ. අද ජාතික පුවත් පත් යැයි කියාගන්නාවු පත්තර කඩමාළු වලින් අන්‍යාගම් වලට අපහාස කරන බවක්ද එතුමා දන්නේ නැහැ. ඒක ඇත්තටම මේ රටේ ආගම්බේධ පතුරන අන්තවාදීන්ගේ වාසනාව සහ සහජීවනයට කැමති සියළුම ලාංකික ජනතාවගේ අවාසනාව විය හැකියි.  

බොදු බල සේනාව විසින් කරන කිසිදු මැර වැඩක් පොලිස් පොත් වල ලියවෙන්නේ නැහැ. ඒ නිසා ඒවා ගැන නීතිය ක්‍රියාත්මක කරවීමේ අවශ්‍යතාවයක් පොලීසියට පැන නගින්නේ නැහැ. ඇත්තටම මෙවැනි වරප්‍රසාද මීට පෙර තිබුණේ රජයට හිතවත් පක්ෂපාතී පාතාල කල්ලි වලට පමණයි. ඔවුන්ගේ මැරවැඩ පොලිස් පොත් වල ලියවෙන්නේ නැහැ. සමහර පාතාල කාරයන්ට පොලිස් නිලධාරීන් විසින් සැලියුට් ගැසු අවස්ථාද තිබෙනවා. අද බොදු බල සේනාව කරපු මැර වැඩක් විභාග කරන්නට පොලිසියෙන් ගිහහොත් වැඳ එකතපස්ව ඔවුන් විසින් සිද්ධිය සම්බන්ධව පැවසු දෙයක් ලියාගෙන පැමිණීමටයි. ඊට වඩා ප්‍රශ්න කිරීමක් කළහොත් සිදුවන්නේ හොඳවැයින් කුණුහරප අසා ගැනීමටයි. ඥානසාර චීවරධාරියා විසින් අධිවේගී මාර්ග පිවිසුමකදී පොලිස් නිලධාරීන්ට තිත්ත කුණුහරපයෙන් බනින වීඩියෝව තවමත් යුටියුබ් හි ඇත.

නමුත් මේ සියළුම සිදුවීම් හමුවේ මහජනතාව ඉදිරියේ බොදු බල සේනාව දිනෙන් දිනම ජනඅප්‍රිය වීම වැඩිවෙලා තියෙනවා. ඔවුන්ට එදා තිබුණු පිළිගැනීම අද නැහැ. ඇත්තටම ඔවුන් මාධ්‍ය හමුවට පැමිණිලා මාධ්‍ය සංදර්ශන පෙන්වන පිරිසක් පමණක් බව ජනතාවට අවබෝධ වෙලා. එතනදී ඉක්මණින් එහි පෙරමුණේ කසකරුවෙකු වෙලා විමල් වීරවංශ ලකුණු දාගත්තේ ඒ නිසයි. නමුත් බොදු බල සේනාවත් අරින්නේ නැති පාටයි. ඔවුන් දැන් කරන්නේ විමල් වීරවංශ විසින් 13 වැනි ව්‍යවස්ථා සංශෝධනයට විරුද්ධව තබාගෙන සිටින සටන් පාඨ උස්සන එකයි. ඉදිරියේදී උතුරු පලාත් සභා ඡන්දය තිබුනොත් ඒ සෙල්ලම් අපිට බලාගත හැකි වනු ඇත. ප්‍රතිවාදී කල්ලි දෙකක් එකම අරමුණක් වෙනුවෙන් සටන් කරන ආකාරය දැකගත හැකි වනු ඇත. නමුත් එක කරුණක් අප්‍රසිද්ධව ඇත. එනම් මෙම කල්ලි කන්ඩායම් දෙකම මෙහෙයවන්නේ රජයට සම්බන්ධ ප්‍රබලයෙකුගේ අනුදැනුම මත බවයි. එනම් මෙම කන්ඩායම් දෙකම එම ප්‍රබලයාගේ පපට්ලා හෙවත් රූකඩ පමණි.

වෙසක් සුභපැතුම්!

බෞද්ධ ජනතාවට මෙදා සැරේ වෙසක් සමරන්න වෙලා තියෙන්නේ ප්‍රශ්න ගොඩක මැදිවෙලයි. එකපැත්තකින් බොදු බල සේනාව විසින් වෙසක් එකට බකට් පත්තු කරන එකට ඔළුබක්කෝ නටන එකට විරුද්ධ වෙලා. පහන් පුජා කරන එකත් බෞද්ධ විරෝධීයිලු. මමත් එයට 100% ක්ම එකඟයි. නමුත් පහන් විතරක් නෙමෙයි! මල් පුජා කිරීම, බෝධි පුජා කිරීම, චෛත්‍ය වන්දනාව සහ බුද්ධ ප්‍රථිමා වන්දනාවත් බුදු දහමට අයත් ඒවා නොවේ.

බුදු තෙමගුල සමරන ඉන්දුනීසියානු මුස්ලිම් වරුන්

අනෙක් පැත්තෙන් තොරන් ගහන්න, දන්සැල් පවත්වන්න ආන්ඩුවෙන් අවසර ගන්නත් වෙලා. විපක්ෂ නායකයා නම් කියන්නේ ඒ නීති කඩන්න කියලයි. තමනුත් ඊට පුර්ණ සහයෝගය දෙන බව ඔහු පවසා තිබුණා. එමෙන්ම ඔහු වැඩිදුරටත් පවසන්නේ මෙවැනි නීති ඉංග්‍රීසි ආන්ඩුව කාලේ වත් තිබුණේ නැහැ කියලයි. ආන්ඩුව මෙවැනි නීති පනවලා බලාපොරොත්තු වෙන්නේ කුමක්ද? කියන එක පැහැදිලි නැහැ. සමහර විට මෙවැනි නීති පැනවීමෙන් තමන් බෞද්ධයාට සහ බුද්ධාගමට විශාල සේවයක් කළා කියලා රජය සැනසෙනවා විය හැකියි. නමුත් ජනතාවට මේ සැරේ වෙසක් ආලෝක පුජාව කරන්න වෙලා තියෙන්නේ වැඩි වු විදුලි බිලට අනුගත වෙමින්. ඒ නිසා ආන්ඩුව විදුලි බිල වැඩි කරමින් ජනතාවට ආලෝක පුජාවට වැඩි පිරිවැයක් දැරීමේ අවස්ථාව ලබාදී ඇති බව අපට සිතිය හැක. ඒ අනුව බලන කල රජය බුද්ධාගමට කර තිබෙන්නේ විශාල සේවයක්! ඒ අනුව මෙදා සැරේ ආලෝක පුජාව කරන අය ඒ පින් බලෙන් රාජපක්ෂ පාලනය දුරිභූත වේවා කියලා ප්‍රාර්ථනා කළාට වරදක් නැහැ!

තවත් පැත්තකින් කතෝලික පාර්ශවය නියෝජනය කරන හෙළ කිතුණු හවුල් කාරයන් පවසන්නේ වත්මන් බෞද්ධ ජනතාව විසින් වෙසක් සමයේ කරන දේ රැසක් කිතුණු දහමෙන් කොපිකරගත් ඒවා බවයි. නමුත් මට කියන්න තියෙන්නේ කතෝලික අයත් ඒවා තව කාගෙන් හරි කොපිකර ගන්නට ඇති බවයි. මන්ද ඔය කියන කිසිදෙයක් කිතුණු බයිබලයට අනුකූල ඒවා නොවේ. බයිබලයේ කිසිදු තැනක උපන්දින සැමරුමක් තියා එසේ සැමරුමට අනුබල දීමක්වත් නැත. කොටින්ම යේසුස් තුමන් නත්තල් දින ඉපදිලත් නැත. ඒ අය තව කාගෙන් හරි කොපි කරගත්ත ඒවා අල්ලගෙන දැන් අපේ ඒවා කොපි කරනවා යැයි මොරදෙන බව මගේ අදහසයි. කෙසේ නමුත් කතෝලික පාර්ශවයෙන් මෙවැනි ප්‍රකාශයක් පැමිණියේ කතෝලිකයන් බෞද්ධ වචන සිය ශබ්දකෝෂය තුල භාවිතා කිරීම සම්බන්ධව පසුගිය කාලයේ අන්තවාදීන් විසින් නැගු චෝදනාවන්ට රිටන් එකක් වශයෙන් බව කවුරුත් දන්නා සත්‍යයකි.

කෙසේ නමුත් මෙදා සැරේ වෙසක් බලන්න මුස්ලිම් ජනතාව පාරට බහින එක නම් නුවණට හුරු නැහැ. මොකද මේ අය දාගන්න වලියක් ළඟින් මුස්ලිම් කෙනෙකු ගියොත් ඒකට මුස්ලිම් අය පලි යැයි චෝදනාවක් නැගෙන්නත් පුළුවන්. අනෙක් පැත්තෙන් බොබසේ සහ සිරා ඇතුළු අන්තවාදී සෙට් එක අද ලංකාව තුල එහෙම සහජීවනයෙන් වෙසක් බලන්න පුළුවන් වාතාවරණයක් ඇති කරලා නැහැ. කවදා හරි බොබසේට සහ සිරා වැනි අන්තවාදීන්ට සපෝට් නොකරන රජයක් ආපු දාක ආයිත් මුස්ලිම් අයටත් සහජීවනයෙන් වෙසක් බැලිය හැකි කාලයක් උදා වේවි.

කෙසේ නමුත් අන්වර් මනතුංග බ්ලොගය කියවන සියළුම බොදුනු ජනතාවට ප්‍රීතිමත් වෙසක් මංගල්‍යකට සුභ පතමි!

කේ. නීලකන්දන්

ශ්‍රී ලංකාව සිංහලයන් සහ බෞද්ධයන් සඳහා පමණක් උරුම වූ රටක් ලෙස අන්තවාදී බෞද්ධ සංවිධාන ගෙනයන ප්‍රචාර නැවත්වීමට පියවර ගත යුතු යයි සමස්ත ලංකා හින්දු මහා සංගමය රජයෙන් ඉල්ලා සිටී. රටේ ව්‍යවස්ථාවෙන් බුද්ධාගමට ප්‍රමුඛස්ථානය දී ඇතිවාක් මෙන්ම අනිකුත් ආගම් ඇදහීමේ අයිතියද සහතික කර ඇති බවයි හින්දු මහා සංගමයේ සභාපති කන්දයියා නීලකන්ඩන් අධිනීතිඥ වරයා කියා සිටියේ.

බුද්ධාගම සඳහා පමණක් වන පිළිවෙතක් ව්‍යවස්ථාව උල්ලංඝනය කිරීමක් බව ඔහු පෙන්වා දෙයි.

සිංහල පමණක් ප්‍රතිපත්තිය

සිංහල පමණක් ප්‍රතිපත්තිය නිසා ශ්‍රී ලංකාවට රටක් වශයෙන් තිස් වසරකට වැඩි කලක් පීඩා විඳි බව ප්‍රකාශ කරන හින්දු මහා සංගමයේ සභාපති වරයා, ආගමික වෛරය ඇවිස්සීමත් රටේ නීතියට පටහැනි බව කියා සිටියේය.

බීබීසී දමිළ සේවයේ ජෙයප්‍රකාෂ් නෙල්ලුසාමි හා සාකච්ඡාවකට එක්වෙමින් කන්දයියා නීලකන්ඩන් ප්‍රකාශ කළේ මේ සම්බන්ධයෙන් රජයේ මෙන්ම විපක්ෂයේද අවධානයට යොමු කොට ඇති බව.

“අවුරුදු තිහක් තිස්සේ තිබුණු සිංහල පමණක් ප්‍රතිපත්තිය නිසා රට බරපතල පීඩාවට පත් වෙලා තියෙනවා. බුද්ධාගම පමණයි කියන ප්‍රචාරය හා ප්‍රතිපත්තිය ඔසවා තැබුවොත් රටට බරපතල ප්‍රතිවිපාක විඳින්නට සිදුවේවි.”

බලයේ සිටින ඇතැමුන් මේ අන්තවාදී ව්‍යාපාරයට අකමැති බව සාකච්ඡා වලදී තමනට වැටහී ගොස් ඇතැයි පැවසු සමස්ත ලංකා හින්දු මහා සම්මේලනයේ සභාපතිවරයා රජය මෙම පිළිවෙත අනුමත නොකරනු ඇතැයිද විශ්වාසය පළ කළේය.

බීබීසී සංදේශය

ඩිලාන් පෙරේරා

මේ වනවිට රටට වැඩිම ආදායමක් ගෙන එන අමාත්‍යාංශය ලෙස විදේශ රැකියා අමාත්‍යාංශය පත්වෙලා ඉවරයි. නමුත් එලෙස තමන්ගේ ශ්‍රමය දහඩිය අන්රටකට පුදලා රටට මුදල් රැගෙන එන විදෙස් ගත ශ්‍රමිකයන්ට මේ රජය විසින් කරපු මගුලක් නැහැ. බොරුවට ගිරිය පුප්පගෙන කෑගහන ඩිලාන් පෙරේරා ඇමතිවරයා කරපු දෙයකුත් නැහැ. එයා කරලා තියෙන එකම දේ විදෙස් ගත ශ්‍රමිකයාට “රට විරුවන්” කියා නමක් දාපු එක විතරයි.

මේ රජය විසින් රට රැකදුන් “රණවිරුවන්ට” උපහාර කරන්නේ ඒ අයව වතු සහ කාණු සුද්ද කරන්න දාලයි. රටවිරුවන්ට සලකන විදිහ ඊටත් වැඩිය අන්තයි. ඒව බලන්න නම් මැදපෙරදිග රටවල සිරකඳවුරු වලට යා යුතුයි. වැරදි වැඩ කරන අය කොහෙත් දඬුවම් ලැබිය යුතුයි. නමුත් මේ රටවල සිරකඳවුරු වල වැරදි නොකරපු අය පවා දඬුවම් විඳිනවා. ඒ අය එලෙස දඬුවම් විඳින්නේ අපේ රටේ තානාපති කාර්යාල වල වරදින්. තානාපති කාර්යාලය ගිහිල්ලා සිරකඳවුරු වල සිටින අයගේ සුවදුක් බලන්නේ නැහැ. ඒකට අසල්වැසි ඉන්දියාව. හැම සතියකටම වරක් ඔවුන් ඔවුන්ගේ රටවැසියන් සිරගත වී සිටිනවාදැයි සොයා බලනවා. සිරගත වු අයට සබන්/තුවා වැනිදේ ගෙනගොස් දෙනවා. වරදක් නොකර සිරගත වු අයෙකු නම් ඒ අය ගැන වහා ක්‍රියාත්මක වෙනවා. ලංකාවේ කෙනෙක් නම් මාස ගණන් හිරේ තැපලා කොහොම හරි තමන්ගේම උත්සාහයෙන් ගෙදර ආ යුතුයි.  

අපේ ඩිලාන් ඇමතිවරයා කරන්නේ රටරැකියා කරන අය සිටින රටවලට ගොස් සංගීත සංදර්ශන පවත්වන එක විතරයි. ඇත්තටම මේ ආන්ඩුව විදේශ රැකියා ඇමතිවරයෙක් පත්කරලා තියෙන්නේ රට රැකියා කරන අයට දවසක සොමියක් දෙන්නද? ඊට අමතරව ඇමතිවරයාගේ ප්‍රදේශය වන බදුල්ල දිස්ත්‍රික්කයේ විදෙස් ගත ශ්‍රමිකයන් හට නිවාස ණය සහ ආධාර ලබාදී තිබෙනවා. ඒ කියන්නේ විදේශ රැකියා අමාත්‍යාංශයෙන් වාසියක් ගන්න නම් බදුල්ලේ ඉපදිලා තියෙන්න ඕන කියන එකයි. මේ රටේ නායකයා රට පුරාම කළයුතු සංවර්ධන යෝජනා ක්‍රම ගෙනගොස් තමන්ගේ ප්‍රදේශයේ කරනවා වගේ ඩිලාන් පෙරේරත් තමන්ගේ පැත්ත ගැන පමණක් බලනවා වෙන්න පුළුවන්. එතකොට බලාගෙන ගියහම ඩිලාන් පෙරේරා කියන්නෙත් ප්‍රදේශවාදියෙක්!

කම්කරුවන් සහ සුළු සේවකයන් වශයෙන් විදෙස් ගතවන නුගත් ශ්‍රමිකයන් ගැන රජය විශේෂ අවධානය යොමුකළ යුතුයි. ඒ අය විදෙස්ගත වන විට ඔවුන්ගේ සේවා කොන්ත්‍රාතු පිළිබඳව රජය අවධානයක් යොමුකරන බවක් පේන්න නැහැ. බොහෝ විට රට යන්න පෙර ඒජන්සියෙන් ඔවුන් සමග අත්සන් කරන කොන්ත්‍රාත්තුවේ සඳහන් වැටුප ඔවුන්ට හිමිවෙන්නේ නැහැ. ඒ වගේම බොහෝ ඒජන්සි කරුවන් තමන් හරහා රටගිය අය ගැන පසු සේවයක් ලබා දෙන්නේ නැහැ. මෙවැනි ඒජන්සි කරුවන්ගේ සේවාව ගැන රජය විසින් නිසි සෝදිසි කිරීම් කර ඔවුන්ගේ සේවය අත්හිටවිය යුතුයි. එමෙන්ම නුපුහුණු කම්කරුවන් රට යැවීම නතර කර කිසියම් වෘත්තීය පුහුණුවක් ලබාදී, ඒ වෘත්තිය සම්බන්ධව පුහුණු ශ්‍රමිකයන් ලෙස යැවීමේ වැඩපිළිවෙලක් ඇති කරනවා නම් වඩා යහපත්.

විදෙස් රැකියාවට ගොස් නොයෙකුත් හේතු නිසා එහි අතරමංව සිටින අය නැවත මේ රටට ගෙන්වා ගැනීමේ වැඩපිළිවෙලක් ඇතිකළ යුතුයි. ඒ අය මේ රටට එනතෙක් තානාපති කාර්යාල හරහා ඔවුන්ට සියළුම පහසුකම් ලබාදිය යුතුයි. කිසියම් වරදකට හසුවු කෙනෙකුට වුවද නොමිලේ නීතිසේවා සැපයීමේ ක්‍රමවේදයක් සැලසිය යුතුයි. රජයට මේවා කරන්න බැරි නම් විදේශ රැකියා ඇමති වරයෙකුගෙන් පලක් නැත. ඩිලාන් පෙරේරා ඇමතිතුමා රටවිරු සොමියයි බොරු කතායි නවත්තා ඉහත කරුණු ගැන අවධානය යොමු කළොත් හොඳයි. 

ජේ ආර් ජයවර්ධන

ජේ.ආර්. ජයවර්ධන විසින් තමන්ට අසීමිත බලයක් ආරෝපනය කරගැනීම සඳහා නිර්මාණය කරගත් විධායක ජනාධිපති පට්ටමෙන් කළහැකි උපරිම දේවල් මොනවාද? යන්න මහින්ද රාජපක්ෂ චරිතය විසින් මේ වන විටත් පෙන්නා දී ඇත. දේශපාලකයන්, බුද්ධිමතුන් සහ සිවිල් සංවිධාන යන සියළුම තලයන්හි අය මේ වන විටත් විධායක ජනාධිපති ක්‍රමය රටට අනවශ්‍ය එකක් බව පිළිගෙන සිටිති. මේ සම්බන්ධව රටේ පුළුල් කථිකාවක් ඇති කිරීම විපක්ෂයේ වගකීමයි.

රජය විසින් මෙම මතවාදයට යටපත් කිරීම සඳහා යොදාගෙන තිබෙන උපක්‍රමය නම් පලාත් සභාවට බලතල එපා යැයි රජයේ පාර්ශවය තුලින්ම හඬක් නැංවීමයි. මේ සම්බන්ධව මේ වන විටත් රජයේ ප්‍රධාන ගිරවා වන විමල් වීරවංශ දරදිය අදිමින් සිටී. රජයට අයත් දේශප්‍රේමී පුන්නක්කු බලකාය මෙසේ මරහඬ තලද්දී ජනතාව තෘෂ්ණිම්භූත වී බලාසිටින්නේ පලාත් සභාවට කුමක්වේද? යන්නයි. එසේ ජනතාවගේ අවධානය වෙනකක් කෙරෙහි යොමු වී තිබෙන තාක් මහින්ද රාජපක්ෂගේ ජනපති පුටුව ආරක්ෂාවේ. නමුත් ඇත්තටම අද රටේ තිබෙන දැවෙන ප්‍රශ්නය විධායක ජනාධිපති ක්‍රමය අහෝසි කිරීම මිස පලාත් සභා ක්‍රමය අහෝසි කිරීම නොවේ. මේ බව රටේ ප්‍රධාන විපක්ෂය විසින් අවබෝධ කරගෙන කටයුතු කළයුතු බව මගේ අදහසයි.

විධායක ජනාධිපති ක්‍රමයේ අනුහසින් මේ වන විටත් අධිකරණයේ ස්වාධීනත්වයට අභියෝග එල්ල වී හමාරය. පාර්ලිමේන්තුවේ ජනතා නියෝජනයද විකෘති වී තිබෙන්නේ එහි ජනතා නියෝජිතයන් මුදලට, තාන්න මාන්න වලට නතුවී තිබෙන නිසාවෙනි. රාජ්‍ය සේවයද මුළුමනින්ම දේශපාලනීකරණය වී ඇත. මෙමගින් අවසානයේ සිදුවී තිබෙන්නේ රට අරාජික වීමයි. රටතුල දුෂන, භීෂන සහ ප්‍රචන්ඩ ක්‍රියා වර්ධනය වීමට හේතුව මෙයයි. අද රටේ දේශපාලකයන් නීති කඩන්නේ තවදුරටත් ජනතාවට හොරෙන් නොවේ. ඔවුන් ප්‍රසිද්ධියේම රටේ නීතියට පයින් ගසති. නමුත් ඒ සම්බන්ධව කිසිවෙක් විරුද්ධ වීමට ඉදිරිපත් නොවන්නේ විධායක ජනාධිපති ක්‍රමයේ තරම දන්නා නිසාවෙනි. මන්ද විධායකය තමන් කෙරෙහි උදහස් වුවහොත් රටෙත් විසුමක් නොමැති තත්වයට පත්වන බව ඔවුන් දනිති.

රටේ බුද්ධිමතුන්, කලාකරුවන් සහ විරුද්ධ පක්ෂයේ දේශපාලනඥයන්ගේ වගකීම විය යුත්තේ රටේ පාලනයෙහි දැවැන්ත වෙනසක් ඇතිකළ හැකි ව්‍යවස්ථා සංශෝධනයක් කෙරෙහි පුළුල් ජනතා කථිකාවතක් ඇති කිරීමයි. එයට අදාල න්‍යාය පත්‍රයක් සාදා ඒ පරිද්දෙන් වැඩකටයුතු ඉදිරියට ගෙන යා යුතුයි. රජය විසින් ජනතාව ඒ කෙරෙහි අවධානය යොමු නොවන පිණිස විවිධ සිදුවීම් කරළියට ගෙන එනු ඇත. මන්ද විධායක ජනාධිපති ක්‍රමය රසවිඳින්නා කිසිදාක එය අත්හැරීමට කැමති නොවන හෙයිනි. ජාතික හෙළ උරුමය, ජාතික නිදහස් පෙරමුණ, බොදු බල සේනාව, සිංහල රාවය සහ රාවනා බලකාය නමින් සංවිධාන වරින් වර ඉදිරියට පැමිණ නාටක රඟ දක්වන්නේ ජනතාවට රටේ දැවෙන ප්‍රශ්න අමතක කරවා වෙනකක් කෙරෙහි අවධානය යොමු කරවීමටයි. රටේ ප්‍රධාන විපක්ෂය විසින් ගෙනයන මේ උපක්‍රමය වටහාගෙන කටයුතු කළයුතු බැව් මගේ අදහසයි. 

ගාල්ල පොලීසිය

ගාල්ලේ ක්‍රිස්තියානි දේවස්ථානයකට පහරදීමට සම්බන්ධ සැකකරුවන් අත්අඩංගුවට නොගත්තේ මන්දැයි කරුණු පහදන මෙන් ශ්‍රේෂ්ඨාධිකරණය ගාල්ල පොලීසියට නියෝග කළේය. ගිංතොට පිහිටි පෙන්තකොස්ත සභාවට අයත් ආගමික මධ්‍යස්ථානයක භාරකරුවන් ගොනු කළ පෙත්සමක් සලකා බැලීමෙන් අනතුරුව අධිකරණය එම නියෝගය කළේය.

බෞද්ධ භික්ෂූන් වහන්සේ නමක් ඇතුළු කණ්ඩායමක් සිය මධ්‍යස්ථානයට කඩා වැදී එහි ආගමික කටයුතු නවත්වන මෙන් බලකරමින් මධ්‍යස්ථානයට පහරදුන් බව භාරකරුවන් ඉදිරිපත් කළ මූලික අයිතිවාසිකම් පෙත්සමේ සඳහන් වේ.

ඒ සම්බන්ධයෙන් පොලීසියට පැමිණිලි කළ නමුත් සැකකරුවන් අත්අඩංගුවට ගැනීම පොලීසිය විසින් පහර හරිමින් සිටින බවට චෝදනා කරන පෙත්සම, ඒ වෙනුවෙට සිය මධ්‍යස්ථානයේ ඉදිරි ආගමික කටයුතු සඳහා අධිකරණයේ අවසරය ලබා ගන්න මෙන් පොලීසිය බලපෑම් කරමින් සිටින බව ද පවසයි.

එහිදී අධිකරණය අමතමින් ප්‍රකාශයක් කළ විනිසුරු නිමල් ගාමිණී අමරතුංග කියා සිටියේ, ආගමික අර්බුදවලට මැදිහත්වීමට අධිකරණයට හැකියාවක් නොමැති බවයි.

කෙසේ නමුත් රටේ පුරවැසියන්ගේ ආගමික අයිතිය රැකදීමට අධිකරණය බැඳී සිටින බව පෙන්වාදීමෙන් අනතුරුව අධිකරණය පොලීසියට එම නියෝගය කළේය.

මිරර් වෙබ්අඩවිය

ජීවිතය නුඹ!

අහස වගේ වෙනස් වෙන…මලක් වගේ පිපෙන…සුවදක් වගේ හමන…සතුටක් වගේ විදින…කදුළක් වගේ දවන… ජීවිතය නුඹ කව්රුන්ද….තාමත් නොවැටහෙන..

ලැබීම…නොලැබීම…සිනාසීම….වැලපීම…හමුවීම….වෙන්වීම…සියල්ල අතර විටෙක සෝදාපාලුවෙන…විටෙක ජවසම්පන්නව නැගීසිටින…ජීවිතය නුඹ කව්රුන්ද….තාමත් නොවැටහෙන…

ලැබීම් පරම සැපත ලෙස සිතන…නොලැබීම් සියල්ලේ අවසානය ලෙස සිතන…ගමනාන්තයේ ලබන්නට පැහැදිලි දෙයක් ඇත්දැයි සිතෙන…ජීවිතය නුඹ කව්රුන්ද තාමත් නොවැ‍ටහෙන…

එහෙත් මා එසේ සිතූ යුගයක අවසන…

නුඹ… ලැබීම්… නොලැබීම්…හිනැහීම්…වැලපීම්…සියල්ල අතර ලද මහත්ඵල ත්‍යාගයක්…ජීවිතය නුඹ එයැයි වටහා ගතිමි…

ලැබීම් නොලැබීම් අතර ඒ සියල්ල අවසානය නොවන බව හැදින්නෙමි…

පතන දෙය නොව මා නමින් ලියා තැබූ දැය… “ජීවිතය” ඒ නුඹ යැයි විශ්වාස කළෙමි… කරනෙමි…

ගමනාන්තයේ කෙළවරක ලබන්නට පැහැබර සදාතන සම්පතක් ඇති බැව් හැදින්නෙමි…

ජීවිතය… නුඹ පසු පස නුඹ සමග ඒ සදාතන නැවතුමට පියවර නගමි..

ජීවිතය නුඹ සමග නුඹ මට දුන් මහිමි අභියස සදා සිසිලස් ගමනාන්තය “ස්වර්ගය” පතමි…

ඉදින් මේ සත්‍ය වැටහුනු  දින සිට ජීවිතය නුඹ මට රිදවන්නේද නැත..රිදවන්නටද නොහැක…

මාද නුඹට රිදවන්නේ නැත..

මන්ද ජීවිතය නුඹ “මා පතන සියල්ල නොව මා නමින් ලියූ සියල්ල බව” මා විශ්වාස කරන බැවින…

ජීවිතය මේ යැයි නුඹ ගැන හදුනන්නට මා දෑසේ තිමිර ඉරා යහමග පෙන්වූ සර්ව බලධාරීයාණෙනි…

දිවි හිමියෙන්ම ඔබ සුවිශුද්ධ කරමි….

අල්හම්දුලිල්ලාහ්…!!!

ෆාතිමා ෂාමිලා හුසයිෆා

දලයි ලාමා තුමා

මේ දිනවල ලංකාවේ මාධ්‍ය නිහඬතාවයක් පල කෙරේ. පොඩ්ඩක් හෝ සද්දයක් දමන්නේ ඥානසාර සහ විමල් වීරවංශයි. ඥානසාර කෙසේ හෝ නොර්වේ සල්ලි වලට වැදුණු මඩ සෝදා ගන්නට උත්සාහ දරන අතර විමල් වීරවංශ දේශප්‍රේමයට මුස්ලිම් ප්‍රේමයද එක්කර දේශපාලනික වාසියක් ගැනීමට තැත් දරයි. නමුත් විමල් වීරවංශ මහතාට අමතක වී ඇති දෙය නම් ලංකාවේ මුස්ලිම් විරෝධයක් ඇති කිරීමට මුල‍්වුයේ ඔහුගේම චක්ගෝලයන් විසින් පවත්වාගෙන යන සීනිවුස් වෙබ්අඩවිය බවයි.

එමනිසා ඥානසාර සතුරෙකුසේ සලකනවා සේම ඔහුට අභියෝග කරන විමල් වීරවංශ මිතුරෙකු නොවන බවද අපි වටහා ගත යුතුය. සමාජවාදය කරපින්නාගෙන ජවිපෙ දේශපාලනය කළ විමල් වීරවංශ අද උග්‍ර ධනවාදියෙකි. ඔහුට පසුගිය ඡන්දයේදී මුල්‍ය උපකාර කළේ ධනකුවේරයන් විසිනි. දේශපාලනයේදී සිය ආත්මයම පාවාදුන් කෙනෙකු බොරුවට මුස්ලිම් පෙමක් පෙන්වා පසුව වෙනත් චරිතයක් රඟපෑවොත් එය මවිතය දනවන කරුණක් නොවේ. විමල් වීරවංශ යනු අවාරෙටත් මාධ්‍ය සංදර්ශන පැවැත්වීමට රුසියෙකි. දේශපාලන ලොව සිටිනවා නම් මාධ්‍ය සංදර්ශන පැවැත්විය යුතුය. දේශපාලනය තුල පැවැත්ම තිබෙන්නේ ඒ අයටයි.

පසුගිය කාලයේ මර්වින් සිල්වා විසින් පවත්වාගෙන ගිය මාධ්‍ය ආකර්ශනය දැන් ඥානසාර වෙත යොමු වී ඇත. මේ නිසා ඒ පැත්තට ගල් ගැසීමෙන් තමන්ටද මාධ්‍ය වාසි අත්පත් කරගත හැකි බව විමල් වීරවංශ ඉවෙන් දනී. නමුත් විමල් වීරවංශ නගන නොර්වේ චෝදනාව ඇත්තකි. ඒ බව කලින් ලිපියකින්ද මා පෙන්වා දුන්නෙමි. එයට ඥානසාර දෙන පිළිතුර නම් තම සංවිධානය නොර්වේ සල්ලි ගත්තා කියා ඔප්පු කරනවා නම් පැයෙන් විසුරුවන බවයි. ඇත්තටම මේ අභියෝගය වනාහී “මේ ඇස්දෙක පල්ලා! යන්නට මී ඇස්දෙක පල්ලා! යනුවෙන් කීමකට” සමානය. මන්ද ඒ වනවිට බොදු බල සේනා සංවිධානය ඇතිකර නොතිබුණු බැවිනි. බොදු බල සේනා සංවිධානය ආරම්භ වන්නේ ඔය කියන කුප්‍රකට නොර්වේ ගමනින් පසුවයි.

අනෙක් කාරණය නම් ඥානසාරට බොදු බල සේනාව පැයෙන් විසිරිය හැකි නම් එම සංවිධානයේ සර්වබලධාරියා ඔහු විය යුතුය. නමුත් ඩිලන්ත විතානගේ මාධ්‍යට කියන්නේ සියළුම බලතල තිබෙන්නේ තමන් අත බවයි. එතකොට කිරම විමලජෝති හිමි යනු රූකඩ සභාපති වරයෙකු විය යුතුය. ඇත්ත තත්වයද එයට සමාන තත්වයක් බව මගේ අදහසයි. කිරම විමලජෝති හිමියන්ගේ කඩෙන් නොමිලේ සප්පායම් වෙමින් ඩිලන්ත සහ ඥානසාර යෙදෙන්නේ තම තමන්ව පුම්බා ගැනීමේ වෑයමකයි. කිරම විමලජෝති හිමියන් විසින් බැංකු ණය ගැනීමෙන් ගොඩ නැගු සම්බුද්ධත්ව ජයන්ති මන්දිරය තුලින් සිදුවුයේ රටම බෙදන මහා පාපකාරී ක්‍රියාවන්ය. එමගින් බුදු දහමට අන්තර්ජාතිකව අපවාද එල්ල විය.

අද ලංකාවේ බෞද්ධ නායකයන් තම රට ලොව බෞද්ධයන්ගේ මුදුන් මල්කඩ යැයි බොරු උඬඟුවෙන් සිටියද ඇත්ත තත්වය නම් ලෝකය තුල පිළිගත් බෞද්ධ නායකයා වන්නේ මහායානික භික්ෂුවක වන දලයි ලාමා තුමයි. අද ලංකාවේ සිටින එකද භික්ෂුවකවත් දලයි ලාමා තුමා මෙන් ලෝක පිළිගැනීමකට ලක්ව නැත. ලංකාවේ සහ මියන්මාරය තුල සිදුවු ක්‍රියා තුලින් බුදු දහමට සිදුවු අපවාදය මකාලන්නට දලයි ලාමා තුමාටද ලංකාවේ සහ මියන්මාරයේ සිදුවු මුස්ලිම් විරෝධී ක්‍රියාවන් විවේචනය කිරීමට සිදුවිය. ඇත්ත වශයෙන්ම ලංකාවේ මුස්ලිම් වරුන්ට අකටයුතු කම් සිදුවන බව දලයි ලාමා තුමා පිළිගැනීම සම්බන්ධවද අප එතුමාට ප්‍රණාමය පලකළ යුතුය. මන්ද ලංකාවේ නායකයන් පවා කියන්නේ එහෙම දෙයක් නොවු බවයි.

අන්වර් මනතුංග

සංස්කාරක සටහන: අන්වර් මනතුංග බ්ලොගය තුල පලවන ලිපි ලේඛකයාගේ අනන්‍යතාවය සහිතව කිසිදු වෙනස් කිරීමකින් තොරව වෙනත් වෙබ්අඩවි සහ මාධ්‍ය වල පලකිරීමට අවසර ඇත. එමෙන්ම මෙම ලිපි දමිල බසට සහ ඉංග්‍රීසි බසට පරිවර්තනය කර පලකිරීමෙන් සමාජය දැනුවත් කිරීමට ඔබගේ දායකත්වයද ලබා දෙන ලෙස ඉල්ලා සිටිමු.     

සුනන්ද දේශප්‍රිය

රාජපක්ෂ ආණ්ඩුවේම ඇමැතිවරුන් පවසන පරිදි ජාවාරම්කාර පැලැන්තියක් විසින් සමාන්තර කලූ ආර්ථිකයක් එනම් දූෂිත, වංචනික්, භිෂක සහ දුරාචාර ආර්ථිකයක් පවත්වා ගෙන යමින් රටට කරන බලපෑම සහමුලින්ම රාජපක්ෂ ආණ්ඩුවේ දේශපාලන වර්ධනයකි. රාජපක්ෂ පාලනය ආරම්භ වූයේ 2005 ජනාධිපතිවරණයෙන් යැයි සළකන්නේ නම් මේ ගත වන්නේ චින්තනයේ අටවන අවුරුද්ද ය. යුද්ධය අවසන්ව දැන් වසර හතරකි. මේ වනාහී රටක වෙනසක් ඇති කිරීමට ඕනෑවටත් වැඩි කාලයකි.

අද රාජපක්ෂ ආණ්ඩුවේ ම නිලධාරීන් සහ ඇමැතිවරුන් කියන කතා ඇසෙන විට පැහැදිලිව ම වෙනසක් ඇතිව තිබෙන බව පෙනෙයි. ඒ යහ පාලනයක කරා හෝ සංහිදියාව දෙසට හෝ නොවේ. කලූ සල්ලිකාරයින්ගේ රාජධානියක් කරා ඇදී යන ගමනෙකි.

ආණ්ඩුවේ ම නිලධාරීන් සහ දේශපාලනඥයින් කොතරම් වතාවක් ආණ්ඩුවේ විවිධ අංශ පාලනය කරන්නේ මාෆියා විසිනැයි කියා ඇත්ද? ඒ එක් අවස්ථාවක දී එකී මාෆියාවන් අහෝසි කිරීමට ගන්නා ලද කවර හෝ පියවරක් වෙත් ද?

මාෆියා යනුවෙන් අදහස් කැරෙන්නේ ඉහල පෙලේ දේශපාලන සබඳතා ඇති ප‍්‍රබල නායකයකු ඇතිව, හොර මැර දූෂන වංචා සහ ප‍්‍රචන්ඩත්වය මගින් කෝටි ප‍්‍රකෝටි ගණනින් මුදල් උපයන ලබන ඉතා තදින් එකිනෙකාට බැදුණූ රහසිගත ප‍්‍රබල ගොනුවකි.

ශ‍්‍රී ලංකාවේ ක‍්‍රියාත්මක මෙවැනි මාෆියාවක් ගැන අලූත් ම ආරංචිය අපට සපයන්නේ විටින් විට සැර කතා කියන අද සෞඛ්‍ය ඇමැතිව සිටින මෛත‍්‍රීපාල සිරිසේන ය. ටික දිනකට පෙර ඔහු ඉංග‍්‍රීසි පුවත්පතකට කියා තිබුණේ අත්‍යවශය ඖෂධ මිල පහළ දැමිය නොහැක්කේ සෞඛ්‍ය අමාත්‍යාංශයට අරත් ගත් මාෆියාවක් නිසා බවය. උදාහරණයක් දෙමින් ඔහු කියන්නේ රුපියල් 100ක් වටිනා ඖෂධයක් මෙම මාෆියාව නිසා විකිණෙනු ලැබෙන්නේ රුපියල් 1000- 1500කට බව ය. මෙම මාෆියාව කොතරම් බලගතු ද යත් ඔවුන් විසින් තමා මරා දමන්නට හැකි බව ද ඇමැතිවරයා පවසා තිබුණි.

මෙම උදාහරණය තුළ මාෆියාවක ලක්ෂණ ගණනාවක්ම ගැබ්ව තිබේ. එනම් මෙම සෞඛ්‍ය මාෆියාවට පිටින් ඖෂධ ගෙනැවිත් අලෙවි කිරීමට ඔවුන් ඉඩ නොතබයි. රෝගීන් ගැන අබමල් රේනුවක හෝ කැක්කුමක් නැතිව සිය එකම අරමුණ ලෙස රන්මසු පොදි ගසා ගැනීම සළකයි. ඔවුන් සෞඛ්‍ය ඇමැතිවරයා ඝාතනය කිරීමට තරම් ශක්තිමත් ය. දේශපාලන බලයක් නැත්නම් මෙවැනි භූමිකාවක් රඟපෑමට මෙකී සෞඛ්‍ය මාෆියාවට නොහැකි ය.

මෙවැනි මාෆියා කල්ලිවල බලය පෙන්වන තවත් නිදසුනක් පාර්ලිමේන්වේ දී ඊයේ පෙරේදා හෙළිදරව් විය. එය නම් මාලූ මාෆියාවයි. කොටුවේ මාළු වෙළඳ පොළ අමාත්‍ය මර්වින් සිල්වා රජදහනක් වූ පෑළියගොඩට ගෙන යෑමෙන් පසු බලගතු මාෆියාවක් එහි අරක් ගත්තේ ය. මෙම මාෆියාවේ කප්පම් ගැනීම් පිළිබඳව කරන ලද පැමිණිළි අනුව සැකකරුවන් හත් දෙනෙකු අත් අඩංගුංවට ගන්නා ලද්දේ 2011 අප්‍රෙල් මාසයේ දී ය. නඩු පැවැරීමට උපදෙස් ඉල්ලා නීතිපති දෙපාර්ථමේන්තුවට ලිපි ගොනු යොමු කිරීමෙන් අනතුරුව දෙසතියකට පසු ඔවුන් ඇප පිට නිදහස් කරන ලදී. එසේ නමුත් දෙවසරක් ගත වී තිබිය දීත් එම ලිපි ගොනු නීතිපති දෙපාර්ථමේන්තුවේ මීයන්ට ආහාර පිණිස වෙන්කර තැබීම මිස ගත් වෙනත් පියවරක් නොමැත. නඩුව බකල් ය. මේ වනාහි මාෆියා ජාලයන් සතු දේශපාලන බල මහිමය පෙන්නුම් කැරෙන අවස්ථාවකි.

ශ‍්‍රී ලංකාවේ ආර්ථිකයේ මර්මස්ථානයක් බඳු කොටස් වෙළද පොල සම්පූර්ණයෙන්ම කලූ සල්ලිකාර මාෆියාවක් විසින් පාලනය කරන ජනමාධ්‍යට කීවේ ජනාධිපති රාජපක්ෂ විසින්ම එහි ප‍්‍රධාන විධායක නිලධරයා ලෙස පත් කරන ලද ආචාර්ය තිලක් කරුණාරත්න මහතා ය. එම මාෆියාව ආරක්ෂ ලේකම් රාජපක්ෂගේ මෙන්ම ජනාධිපති රාජපක්ෂගේ ද විශ්වසනීය කණ්ඩායම් ලෙස කටයුතු කරන බව තිලක් කරුණාරත්න මහතා ඉවත් කිරීමෙන් පසුව ඇති වූ සංවාදයේ දී දක්නට හැකි විය. මෙම මාෆියාව සිමා කරමින් කොටස් වෙළද පොළ නියාමනය කිරිමට උත්සාහ ගත් තවත් එවැනි ස්වාධීන නිලධරයන් දෙනෙකුට ම සිදු වූයේ ද පරාජය බාරගෙන ගෙදර යෑමට ය. අද මාෆියාව එහි රජ කරයි.

ශ‍්‍රී ලංකා විදුලි බල මංඩලය ඉතා බලගතු මාෆියාවක් විසින් පාලනය කරන බව ජනමාධ්‍යට කියා සිටියේ තවත් රාජපක්ෂ නිලධරයකු වන මහජන උපයෝගිතා කොමිසමේ සභාපති ආචාර්ය ජයතිස්ස ද කොස්තා ය. විදුලි උත්පාදනය පුද්ගලික අංශයට පවරා දීම මගින් ඇදහිය නොහැකි තරම් මුදල් ප‍්‍රමානයක් යටි මඩි ගැසීම මෙම මාෆියාවේ එක් ජාවාරමකි. විදුලි බල මංඩලය මෙම වසර සඳහා ඉල්ලා තිබූ රුපියල් බිලියන 262 ක මුදල විමසා බලා ඉන් බිලියන 40ක් අඩු කළ ද ඊට කිසිදු විරෝධයක් නොනැගීමෙන්ම මෙම දූෂනයන්හි තරම පෙනෙන බව ඔහු කියා තිබුණි.

පසුගිය වර්ෂයන්හි ඇදහිය නොහැකි තරමේ මුල්‍ය වංචාවන්ට ගොදුරු වූ ශ‍්‍රී ලංකා ක‍්‍රිකට් ආයතනය පාලනය කැරෙන්නේ ක‍්‍රිකට් මාෆියාවක් විසිනැයි කීවේ වසර කිහිපයකට පෙර ක‍්‍රීඩා ඇමැතිව සිටි සී.බී. රත්නායක ය.

මෙම සියළු ප‍්‍රකාශයන්ගෙන් කියැවෙන මේ කලූ සල්ලිකාර මාෆියා පෙළෙන්තිය ගැන ඉතා බරපතල ප‍්‍රකාශයක් මෑතදී අසන්කට ලැබුණි. ඒ රාජපක්ෂ ආණ්ඩුවේ ජේෂ්ඨ ඇමැතිවරයකුගෙනි.

මෑතදී සිංහල පුවත්පතකට කතා කරමින් එම ජේෂ්ඨ ඇමතිවර ඩිව් ගුණසේකර කියා තිබුණේ රටෙහි ඒක පුද්ගල ආදායම නිල වශයෙන් වැඩි වී තිබුණද එය ජනතාවගේ ජීවිතයේ පිළිඹිබු නොවන්නේ කලූ සල්ලි ධනපති පන්තිය නිසා බවය. ශ‍්‍රී ලංකාවේ රාජ්‍ය ව්‍යවසාය පොදු කාරක සභාවේ සභාපති වන ඔහුට මෙරට ආර්ථිකයේ අඳුරු පැති ගැන ද තොරතුරු ලැබෙන බවට සැකයක් නැත. ඔහු කියන්නේ අද අපේ රටේ නිල ආර්ථිකයට සමාන්තරව විශාල කළු ආර්ථිකයක් ගොඩනැගෙමින් තිබන බවයි. ඔවුන් ආදායම ලබා ගන්නේ දූෂණ, වංචා, හොර ටෙන්ඩර් ගණිකා නිවාස ඇතුළු සමාජ විරෝධී මගින් බව යි. රටේ සමස්ත ජනගහණයට ම බල පෑ හැකි මේ කියන කලූ සල්ලිකාර ධනපති පංතිය වනාහී වෙන කිසිවකු නොව විවිධ ඇමැතිවරුන්ගේ කටවල් වලින් හදිසි අවස්ථාවලදී එළියට පනින මාෆියා ජාවාරම්කාර පැලැන්තිය යි.

මැතදී හෙළිදරව් වු මහා රන් ජාවාරම මෙන්ම අති ලාභදායී මත්ද්‍රව්‍ය ජාවාරම පිටුපස ආණ්ඩුවේ ඉහළම පිරිස් සිටින බවට නිල නොවන වාර්තා අන්තර් ජාලයේ කියවිය හැකි ය. ජේෂ්ඨ අමාත්‍ය ඩිව් ගුණසේකර විසින් ප‍්‍රකාශ කරන ජාතික මට්ටමේ කලූ සල්ලි ජාවාරම් පැලැන්තිය අතර පාලක දේශපාලනඥයින් සිටින බව රහසක් නොවේ.

ශ‍්‍රී ලංකාවේ ජනමාධ්‍ය මත හෙළා ඇති මර්දනයේ යකුළු පහරවල් නොවේ නම් ගවේශනාත්මක ජනමාධ්‍යවේදය සඳහා මෙම වර්ධනය අපූරු අභියෝගයක් වන්නට ඉඩ තිබුණි. ඇත්ත වශයෙන්ම නම් අද සිදුවෙමින් පවතින්නේ ජනමාධ්‍ය විසින් මාෆියා ජාවාරම් ගවේශනය කිරීම නොව කැසිනෝ ජාවාරම්කරුවන් විසින් හිමිකාරකම සහ වෙනත් ක‍්‍රම මගින් ජනමාධ්‍ය පාලනය කිරීමය.

රුපියල් සියයේ ඖෂධය රුපියල් 1,500 කට විකුණා ලාභ කන්දරා ගරා ගන්නා පරිදිම ජනාධිපති මන්දිරයේ කැරුණූ කටයුත්තක් සඳහා අදාළ නිලධාරීන් ලබා ගත් සන්තෝෂම් සමගින් රුපියල් එක් ලක්ෂයක වියදම අවසානයේ දී ලක්ෂ 12 දක්වා ඉහළ ගිය සැටි මෑතදි අසන්නට ලැබුනේ තතුදත් ආරංචි මාර්ගයකිනි. ශ‍්‍රී ලංකාවේ කැරෙන යම් යම් යටිතල සංවර්ධන සඳහා ඇස්තමේන්තු වන මුදල් ප‍්‍රමාණය ඇත්ත වටිනාකම මෙන් තුන්ගුණයක් බව කීවේ තවත් ඇමැතිවරයකු වන චම්පික රණවක ය. එමෙන්ම ඔහු කීවේ එක්තරා සමාගමක් තමන්ට පක්ෂපාත ලිපි ලියවා ගැනීම සඳහා රුපියල් ලක්ෂ 500ක් එක් ජනමාධ්‍යවේදියකුට ගෙවූ බව ය.

මෙවැනි දූෂිත සහ භිෂක ධනකුවේර පෙළෙන්තියකට රටෙහි එතරම් බලපෑමක් ලබා ගැනීමට හැකි වී ඇත්නම් එහි වරද විපක්ෂය පිට හෝ පරාජය කරන ලද එල්ටීටඊ ය පිට හෝ පැටවිය නොහැක. ඇත්ත තත්ත්වය නම් එය අද වරදක් ලෙස නොදැකීමයි. අනෙක් අතට මෙවැනි ජාවාරම්කාර පෙළෙන්තියක් රාජ්‍ය අනුග‍්‍රහය නැතිව බිහිවන්නේ ද පවතින්නේ ද නැත. රාජපක්ෂ ආණ්ඩුවේම ඇමැතිවරුන් පවසන පරිදි ජාවාරම්කාර පැලැන්තියක් විසින් සමාන්තර කලූ ආර්ථිකයක් එනම් දූෂිත, වංචනික, භීෂක සහ දුරාචාර ආර්ථිකයක් පවත්වා ගෙන යමින් රටට කරන බලපෑම සහමුලින්ම රාජපක්ෂ ආණ්ඩුවේ දේශපාලන වර්ධනයකි. වසර අටක් තමන් විසින් රට පාලනය කිරීමෙන් අනතුරුව ගොඩ නැගී ඇත්තේ නොපෙනෙන මාෆියා ආර්ථිකයක් සහ දේශපාලනයක් තහවුරු වීම නම් රාජපක්ෂ ආන්ඩුව ඊට දෙන පිළිතුර කුමක්වනු ඇත් ද?

සුනන්ද දේශප‍්‍රිය

බොදු බල සේනා

බොදු බල සේනාව, නොර්වේ සහ යුද්ධයෙන් පසුව යුරෝපයට පැන්න කොටි සමග අශුද්ධ සංධානයක් තිබෙන බව දැන් සනාථ වන්නේ පසුගිය 11 වැනිදා කෑගල්ලේ පැවති බොදු බල සේනා වාර්ෂික සම්මේලනයේදී ආගම්බේධකාරී ඥානසාර චීවරධාරියා විසින් තමන් විසින් නොර්වේදී සාකච්ඡා කලේ දෙමළ ඩයස්පෝරාවේ හොඳ කට්ටිය සමග බව පිලිගැනීමෙන්ය. මෙහිදී මට මතුවන පලමු ගැටළුව නම් මේ අය හොඳ දෙමළ ඩයස්පෝරාව වෙන්කර හඳුනාගත්තේ කෙසේද? යන්නයි.

බෙදුම්වාදී කොටි විසින් යුද්ධයෙන් පසුව යුරෝපය තුල දෙමළ ඩයස්පෝරාවක් නිර්මාණය කරගත්තේ කුමකටද? කොටි සංවිධානය විසින් ඊට කලින් යුරෝපය තුල ලංකාවේ බෙදුම්වාදය සඳහා රැස්කළ අරමුදල් නැවත ශක්තිමත් කර වෙනත් විකල්ප ක්‍රියාමාර්ගයන්ගෙන් ඊලාම් බෙදුම්වාදය දිනා ගැනීම සඳහායි. මේ සඳහා අද යුරෝපය තුල ද්‍රවිඩ කන්ඩායම් කිහිපයක් ක්‍රියාත්මක වේ. ඔවුන් කන්ඩායම් කිහිපයක් ලෙස කටයුතු කළද අරමුණ පොදුය. එනම් ලංකාවේ උතුරු සහ නැගෙනහිර බෙදා වෙනම පාලනයක් දිනා ගැනීමයි. ඥානසාර චීවරධාරියා විසින් කියන ඊනියා හොඳ දෙමළ ඩයස්පෝරාවේ අරමුණත් මෙයම නොවේද? අනිත් කාරණය නම් මේ සියළුම ද්‍රවිඩ කන්ඩායම් කොටි සංවිධානයෙන්ම කැඩුනු ඒවා නොවේද?

කොටි ත්‍රස්තවාදීන් විසින් යුධකාලයේදී මුස්ලිම් ජනතාව වෙත ගෙනගිය වර්ගවාදී ප්‍රහාර තවදුරටත් වෙනස් මට්ටමකින් ගෙනයාම මෙම අශුද්ධ සංධානයේ අරමුණ බව පැහැදිලිය. මේ බව තවදුරටත් සනාථ වන්නේ බොදු බල සේනාව විසින් ගෙනයන මුස්ලිම් විරෝධී පිලිවෙතට සමාන පිළිවෙතක් දරන කන්ඩායමක් උතුරේ සහ නැගෙනහිර ද්‍රවිඩ භාෂාවෙන් ක්‍රියාත්මක වීමයි. ඔවුන්ද මුස්ලිම් ව්‍යාපාර වර්ජනය කරන්න, මුස්ලිම් අයට දමිල ඉඩම් විකුණන්න එපා යනුවෙන් පෝස්ටර් ඇලවීම සහ අත්පත්‍රිකා බෙදාහැරීම සිදුකරති. නමුත් බොදු බල සේනාව මෙන් එය උතුරේ සහ නැගෙනහිර මේ වන තෙක් සාර්ථක වී නැත. මන්ද එයට දමිල සමාජය තුල සහ මාධ්‍ය තුල ඉඩක් ලැබී නැති හෙයිනි. මෙම අන්තවාදී ද්‍රවිඩ කල්ලියටත් මුල්‍ය ආධාර ලැබෙන්නේ කොහෙන්ද? රජය විසින් සොයා බලන්නේ නම් මෙම කල්ලියට සහ බොදු බල සේනාවට ඇත්තේ එකම මුලයක් බවට සාක්ෂි ඕනෑ තරම් සොයාගත හැක.

නමුත් මෙහි තිබෙන්නේ විමල් වීරවංශ ඇමති වරයා පවසන පරිදි උතුරේ පලාත් සභා බෙදීමේ අරමුණක් නොවේ. බොදු බල සේනාවට සහ උතුරු නැගෙනහිර ක්‍රියාත්මක වන අන්තවාදී ද්‍රවිඩ කල්ලියට ආධාර උපකාර කරන්නේ අද නොර්වේහි ක්‍රියාත්මක වන අන්තවාදී ආගමික කල්ලියක් විසිනි. මුස්ලිම් වරුන්ට එරෙහිව ක්‍රියාත්මක වන අන්තවාදී ක්‍රිස්තියානි කන්ඩායම් කිහිපයක් නොර්වේ සහ අනෙකුත් යුරෝපීය රටවල ක්‍රියාත්මකයි. මෙයින් එක් සංවිධානයක් ක්‍රියාත්මක වන්නේ ආගම් වලින් ඉවත්ව සිටින ජනතාව නැවත ආගම කරා යොමුකරවීමට ආධාර අනුබල දෙන සංවිධානයක් ලෙසයි. ලංකාවේ මුස්ලිම් සහ සිංහල ගැටුමක් මෙන්ම දමිල සහ මුස්ලිම් ගැටුමක් නිර්මාණය කිරීමටත් උපකාර කරන්නේ මෙම සංවිධානය විසිනි.

නොර්වේහි ක්‍රියාත්මක වන මෙම සංවිධානයේ අරමුණත්, බොදු බල සේනාවේ අරමුණත්, උතුරු නැගෙනහිර ක්‍රියාත්මක වන අන්තවාදී මුස්ලිම් විරෝධී කන්ඩායමෙත් එකම ප්‍රතිපත්තිය මුස්ලිම් විරෝධය පමණි. නමුත් ඊට පිටින් සහයෝගය දක්වන නෝර්වේ රාජ්‍යයට සහ දෙමළ ඩයස්පෝරාවට වෙනම අරමුණක් ඇත. එනම් උතුරු නැගෙනහිර බෙදුම්වාදයයි. නමුත් මේ බව වටහා ගැනීමට බොදු බල සේනාවේ ඥානසාර චීවරධාරීයාට නුවණක් නොමැති බව පැහැදිලි වන කරුණකි. මන්ද ඔහු විසින් කරන්නේ ඩිලන්ත විතානගේ නම්වු එන්.ජී.ඕ මාෆියාකාරයා විසින් ලියා දෙන දේ ඒ ආකාරයෙන්ම කියවීම පමණි. ඇත්ත වශයෙන්ම ඥානසාර චීවරධාරියා තනිකර ගිරවෙකි. ඔහුට ලැබී තිබෙන ශරීර ප්‍රමාණයට සෑහෙන ලෙස මොලය ක්‍රියාත්මක නොවන බව පැහැදිලි කරුණකි.

නොර්වේ අන්තවාදී ආගමික කල්ලිය ලංකාව තුල සිය සිංහල සමාජයේ ඒජන්තයා කරගෙන සිටින්නේ ඩිලන්ත විතානගේ නම්වු එන්.ජී.ඕ. කප්පිත්තාවයි. ඩිලන්ත විතානගේ මෙලෙස ජාත්‍යන්තර සබඳතාවන් ඇතිකර ගත්තේ නැසීගිය විදේශ අමාත්‍යවරයෙකුවු ඒ.සී.එස්. හමීඩ් මහතාට පිංසිදු වන්නටයි. එම මුස්ලිම් අමාත්‍යවරයාගේ කාර්ය මංඩලයේ සිටිමින් ජීවිතය සරිකර ගත් ඩිලන්ත විතානගේ විසින් අද මුස්ලිම් වරුන්ට එරෙහිව වර්ගවාදය ක්‍රියාත්මක කරන්නේ කන්න දුන් අත හපා කන එවුන් කෙසේදැයි අපට නැවත සිහිකරවමිනි.

අන්වර් මනතුංග

සැ.යු: මෙම ලිපිය කොපිකර වෙනත් වෙබ්අඩවි වල පලකිරීමට අපගේ කිසිදු විරෝධයක් නොමැති අතර එසේ පලකරන විට ලේඛකයාගේ නමද සමග පලකරන ලෙස ඉල්ලා සිටිමු. මෙම ලිපිය දමිල බසට පරිවර්තනය කර දමිල වෙබ්අඩවි වලද පලකරන්න.  

නීතිඥ එස්.ජී. පුංචිහේවා

අද ඉන්නේ නියම පුරවැසියෙක් නොවන ප්‍රබන්ධ කරපු පුරවැසියෙක් බවත් මේ ප්‍රබන්ධය හදන්න මේ රටේ මාධ්‍ය පුදූම දායකත්වයක් දී ඇති අතර මාධ්‍යවේදීන්ට ලැප්ටොප්, වාහන බලපත්‍ර දී මේ ප්‍රබන්ධය හැදීමට ඔවුන් පොළඹවාගෙන අහවර බවත් නීතිඥ එස්. ජී. පුංචිහේවා මහතා පැවසීය. සිවිල් සංවිධාන එකමුතුවක් ගොඩනගමු යන මැයෙන් මානව හිමිකම් කේන්ද්‍රය සහ පර්යේෂණ ආයතනය සංවිධාන කළ වැඩමුළුවක් අමතමින් පුංචිහේවා මහතා මේ බව සඳහන් කළේය.

2013 මැයි 11දා පාදූක්ක කිතුල්කන්ද හෝටලයේදී පැවති මෙම වැඩමුළුවට එක්වූ පුංචිහේවා මහතා සඳහන් කෙළේ නිදහස ලැබූ දා පටන් අද වන තුරු පාලකයා හෝ පුරවැසියා වෙනස් වී නොමැති බවයි.

එහිදී අදහස් දැක්වු පුංචිහේවා මහතා

නිදහස ලැබුන දා ඉඳල මේ රටේ ඇත්ත ප්‍රශ්න කථා කරන්න තැනක් තිබුනේ නෑ.අපි ඡන්දය දූන්නා එයාල රට පාලනය කළා. ප්‍රජාතන්ත්‍රවාදය කියලා කිව්වට මේ රටේ ජනතාවට අවුරුදූ 6 කට සැරයයි පාලනයට හවුල් වෙන්න තියෙන්නේ. ඒකත් තත්පර දෙකක් විතරයි. ඒ අර කතිරය ගහන වෙලාවට විතරයි. අපි එහෙම කරනකොට එයාල කළේ පාට මාරු කරන එක විතරයි. එක වරක් නිල් පාට “තවත් වරක් කොළ පාට” තව අවස්ථාවක අඩු වැඩි වශයෙන් රතු පාටත් හවුල් වුනා. මේ පාට මාරුවට හවුල්වෙලා හිටපු මිනිහා අද වෙනකල් වෙනස් වෙලා නෑ.

එදා ඉඳලා අද වෙනකල් පුරවැසියා සහ පාලකයා හැරුණු කොට අනිත් හැමදේම වෙනස් වෙලා. එදා අට පාස් නම් රජයේ රස්සාවක් කරන්න පුළුවන්. ඒත් අද අධ්‍යාපන ඇමතිවරු බර ගාණක් ඉඳලත් විශ්ව විද්‍යාලේ ගිහිල්ලත් රස්සා නෑ. එතකොට අධ්‍යාපනය දියුණු වෙලාද? නෑ. එදා පොල්ගෙඩිය ශත 10යි. අද රුපියල් 50යි. පොල් ගහ වෙනස් වුනෙත් නෑ” ගෙඩිය වෙනස් වුනෙත් නෑ. පාලනය කරපු අය විතරයි වෙනස් වෙලා තියෙන්නේ. දැන් බලන්න බිත්තරේ එදා ශත 10 යි අද කීයද? එතකොට කිකිළි වෙනස් වෙලාද? නෑ. බිත්තරේ වෙනස් වෙලාද? නෑ. එතකොට කවුද අපිට බිත්තරේ අහිමි කළේ?

දැන් අසාත් සාලි අත් අඩංගුවට ගත්තා ජාතිවාදී අදහස් පළ කළා කියලා. මීට කලින් තිස්සනායගම් ගත්තෙත් ඔහොම කියලා. එතකොට හලාල් ප්‍රශ්නේ අල්ලගෙන කඩ කුඩු කරපු අයට මොනවද නීතියෙන් කළේ? මොනවද දූන්න දඬුවම්?

මේ වෙනකොට සියලූම ප්‍රාද්ශීය ලේකම් වරුන්ට දැනුම් දීල තියෙනවා රැස්වීම් ගැන හොයන්න කියලා. ග්‍රාම නිලධාරිවරු හරහා. ඊට පස්සේ පොලිසිය දාල මේවා මර්ධනය කරන්න සැලසුම් කරලා තියෙන්නේ. ඒ කියන්නේ කථාකරන්න නිදහස නෑ. මම ඔය කලින් කියපු දේවල් ගැන කථා කරන්න බෑ. ඔබට කථා කරන්න පුළුවන් අධිවේගී මාර්ගය හරි හොඳයි. නැව් ආවේ නැතත් වරාය හොඳයි. ක්‍රිකට් ක්‍රීඩාංගණය බලන්න ලස්සනයි. ගුවන් තොටුපල හොඳ දෙයක්. මේවා විතරයි කථා කරන්න පුළුවන්.

අද මැති ඇමතිවරු කියනවා රට සංවර්ධනය වෙලාලු ඇත්තටම සංවර්ධනය වෙලාද? අද අධිවේගී පාරේ යන්න පුළුවන් කාටද? බයිසිකලයකට යන්න පුළුවන්ද? පයින් යන්න පුළුවන්ද? හැබැයි එහෙම යන්න බැරි වුනත් පොදූ ජනයා ඒ පාර හදන්න ගත්ත ණය ගෙවන්න ඕන. පුරවැසියා මේ ගැන කථා නොකරන තාක්කල් මේ ණය ගෙවන්න වෙනවා.

අපි හිසරදය හැදූනම පැනඩොල් බොනවා. කවුද අපිට එහෙම කියලා දූන්නේ? මාධ්‍යය. දැන් ඒක පුරුද්දට වගේ වෙනවා. අපි දන්නවා හිසරදයට පැනඩෝල් බිව්වම හරි කියලා. ඒ වගේ අපි හිතාගෙන ඉන්නවා එහෙම නැත්තම් කවුරුහරි අපිට කියලා දීලා තියෙනවා මේක තමයි ප්‍රජාතන්ත්‍රවාදය කියලා. අපි හිතාගෙන ඉන්නවා ඒක එහෙමයි කියලා. නමුත් ඒක එහෙම නෑ. දැන් ජනාධිපති තුමා කොහෙ හරි ගිහින් දරුවෙක් දැක්කම වඩා ගන්නවා. අපි හිතනවා කොච්චර කරුණාවන්ත දරුවන්ට ආදරේ ඇති කෙනෙක්ද? කියලා. ඕක ටීවී එකේ පෙන්නලා අපිට එහෙම හිතන්න බල කරනවා. ඒ කියන්නේ දැන් ඉන්නේ නියම පුරවැසියෙක් නෙවෙයි ප්‍රබන්ධ කරපු පුරවැසියෙක්. මේ ප්‍රබන්ධය හදන්න මේ රටේ මාධ්‍ය පුදුම දායකත්වයක් දෙනවා. මාධ්‍යවේදීන්ට ලැප්ටොප් දීලා, වාහන බලපත්‍ර දීලා මේ ප්‍රබන්ධය හදන්න ඔවුන් පොළඹවාගෙන ඉවරයි. අද රටේ ඉන්නේ ලැප්ටොප් මාධ්‍යවේදීන් ටිකක් මිසක් ජනතාවගේ ප්‍රශ්ණ ගැන කථා කරන මාධ්‍යවේදීන් නෙවෙයි.

දැන් දිවි නැගුම ගැන කාටවත් අහන්න අයිතියක් නෑ. හැබැයි පුරවැසියා සියලූම තොරතුරු දිවිනැගුමට කියන්න ඕන. නොකිව්වොත් නඩු දානවා එයාලා. මේක තමයි තත්වය.

මේ නිසා ජනතාවට අද යන්න තැනක් නෑ. කථා කරන්න තැනක් නෑ. අධිකරණය ඉස්සරහට ගියාට සාධාරණයක් වෙනවද? නෑ. මේ නිසා තමයි ජනතාව නැගී සීටිය යුත්තේ. ජනතාව සංවිධානය විය යුත්තේ. සිවිල් සංවිධාන බිහිවිය යුතුව තිබෙන්නේ මේ සියලූ බලතල එක් තැනකට රැස්කරගත් මේ ක්‍රමය වෙනස් කිරීම සඳහායි.

ලංකා ඊ නිව්ස් 

ගාමිණී වියන්ගොඩ

අප මොන තරම් ඇන්දවිය හැකි ජාතියක් දැ යි ගිය සතියේ අපේ ඇහැට ඇඟිල්ලෙන් ඇන අපේ පාලකයෝ පෙන්වා දුන්හ. එහෙත් ඒ ‘පෙන්වා දීම’ අප ‘දැක්කේ’ ද? නැති බවට මම සැක කරමි. මැජික්කාරයන් පෙන්වන දේවල් බලා සිටින්නා ‘දකින්නේ’ නැත. එය විජ්ජාවක් වන්නේ එබැවිනි. විස්මය දනවන්නේ, එසේ පෙන්වා දෙන දෙය ‘නොදැකීම’ මගිනි.

නොපෙන්වා යමක් පෙන්වන විජ්ජාව කරන්නේ කෙසේ දැ යි පේ‍්‍රක්ෂකයාට දැන ගැනීමට විජ්ජාකාරයා කවදාවත් ඉඩ තියන්නේ නැත. මහින්ද රාජපක්ෂ ඇතුළු වර්තමාන පාලකයෝ ඒ අතින් සැබෑ විජ්ජාකරුවෝ නොවෙති. ඔවුන් තමන් පෙන්වන විජ්ජාවෙන් මොන තරම් අහංකාරයට සහ ස්වයං-තෘප්තියට පත්වන්නේ ද යත්, විජ්ජාව සාර්ථකව ප‍්‍රදර්ශනය කිරීමෙන් පසු කළු තිරය මුළුමණින් ඉවත්කොට, ඊට පසුපසින් පැවති තමන්ගේ හොරය ‘මෙන්න බලා ගනිල්ලා’ යැයි පේ‍්‍රක්ෂකයාට නොවලහා හෙළි කරති. එතැනින් පසු විජ්ජාව අවසන් ය. එහෙත් ඒ මොහොතේ සිට පේ‍්‍රක්ෂකයා (මහජනතාව) තුළ, විජ්ජාව වෙනුවට ‘විද්‍යාව’ පිළිසිඳ ගත යුතු නේද? අවාසනාවක මහත/ ශ‍්‍රී ලාංකිකයා තවමත් ඉන්නේ ඒ අවිද්‍යාවේම ය.

භාරත ලක්ෂමන් පේ‍්‍රමචන්ද්‍ර ඇතුළු හතර දෙනෙකු ඝාතනය කිරීමේ ප‍්‍රධාන සැකකරුවා වූ දුමින්ද සිල්වා එම සිද්ධියේ දී බරපතල තුවාල ලැබ ‘අසාධ්‍ය’ තත්වයෙන් පසුවන බව වාර්තා විය. බොහෝ තොරතුරුවලට අනුව, ඔහුගේ ශාරීරික තත්වය විස්තර කෙරුණේ ‘එළවළු’ ස්වභාවයෙනි. එනම්, ඔහුගේ ජීවිතය ආරක්ෂා වුණත්, එය කවදත් අකර්මණ්‍ය ශාකයක තත්වයෙන් පවතින බවයි.

අසාධ්‍ය තත්වයෙන් පසුවන සැකකරුවෙකු ප‍්‍රායෝගිකව අත්අඩංගුවට ගැනීම අසීරු විය හැකි වෙතත්, නීතියෙන් එකී අත්අඩංගුවට ගැනීමේ විධානය නිකුත් කිරීම අපහසු නොවේ. එහෙත් ලංකාවේ කිසි පොලීසියක් හෝ නීතිපති දෙපාර්තමේන්තුව ඔහුව අත්අඩංගුවට ගැනීමට උසාවියකින් ඉල්ලා සිටියේ නැත. ඉතිං ටික දවසක් ලංකාවේ රෝහල්ගතව සිටි දුමින්ද සිල්වා, ලංකාවේ වෛද්‍යවරුවන් ගැන විශ්වාසයක් තැබිය නොහැකි නිසාත්, අතමිට හිඟ නැතිව මුදල් ඇති නිසාත්, පිටරට ගියේය. ඒ, ආණ්ඩුවේ පූර්ණ ආරක්ෂාව සහ අනුග‍්‍රහය යටතේ ය.

මේ කාලයේ දී අපේ පාර්ලිමේන්තුව ඔහුට එක දිගටම ‘නිවාඩු’ අනුමත කෙළේ, කවදා හෝ දවසක ඔහු නැවත එහි එන බව සහතික වශයෙන්ම කල්තියා දැන සිටි ගානට යි. කෙසේ වෙතත්, හිටිහැටියේම දවසක් නීතිපතිවරයා දුමින්ද සිල්වා අත්අඩංගුවට ගැනීමට අවසර ඉල්ලා සිටියේය. එකල මාධ්‍ය තාරකාවක් බවට උසස් වීමක් ලබමින් සිටි හිරුනිකා නැමති තරුණියක් නීතිපතිවරයාගේ මේ ‘එඩිතර’ භාවයෙන් පස්වනක් ප‍්‍රීතියෙන් පිනා ගොස් ඔහුට මුව නොසෑහෙන්න නමස්කාර කළාය. කවුරු මොනවා කීවත් ලංකාවේ තවම ‘නීතියේ ආධිපත්‍යයක්’ ඇති බව එයින් ‘ඔප්පු’ වූ බව ඇගෙන් ගම්‍යමාන විය.

මිනිස් ඝාතනයේ සැකකාරයෙකු වීමට අමතරව ඔල්මොරන්දන්කාරයෙකුත් නොවන කිසිවෙකු, අත්අඩංගුවට ගැනීමේ වරෙන්තුවක් නිකුත් කොට තිබිය දී ආපසු ලංකාවට එන්නේ නැත. එහෙත්, ලාංකීය පුරවැසියා වූ කලී, සහසුද්දෙන්ම නීතිගරුක පුරවැසියෙකු බව ලොවටම ඔප්පු කරමින් දුමින්ද සිල්වා ආපසු ලංකාවට ආවේය. ඉන් පසු කෙලින්ම රෝහල්ගත වුණේය.

ඔහුගේ නීතිඥයා උසාවියට කරුණු දක්වමින්, ඔහුගේ මොළයට සිදුවී ඇති බරපතල තුවාලවල අසාධ්‍ය තත්වය තුළ පවුලේ සමීපතමයන් සමග සිටීම අත්‍යාවශ්‍ය වන බැවින් ඔහුට ඇප ඉල්ලා සිටියේය. නීතිපතිවරයා ඊට විරෝධය නොපෑ නිසා උසාවිය ඔහුව ඇප පිට නිදහස් කෙළේය. රෝද පුටුවෙන් ලංකාවටත්, ලංකාවේ රෝහලටත් ගිය දුමින්ද සිල්වා, උසාවියෙන් නිදහස ලද සැණින් දෙපයින් සිටගෙන කෙලින්ම ගියේ රටේ ප‍්‍රධාන පුරවැසියාගේ නිල නිවෙසට යි. මැජික් සන්දර්ශනය එතෙකින් නිමා විය. රහස, ‘ආරේ සිට පූරේ දක්වා’ නිරාවරණය විය.

මෙය ‘හාස්කමක්’ වශයෙන් මාධ්‍ය ගෙනහැරපායි. ඒ හාස්කම අදහා ගැනීමට ඇති නොහැකියාව කොතෙක් ද යත්, ඉපදී දින හතෙන් නෙළුම් මලක් මත ඇවිදින බිළිඳු සිදුහත් කුමරු දැකීමෙන් අමන්දානන්දයට පත් සුද්ධෝදන රජතුමා තම සිඟිති පුතාට දොහොත් මුදුන් දී වැන්දේ කෙසේ ද, ඒ ආකාරයෙන්ම මේ ආශ්චර්යමත් දුමින්ද සිල්වා පුටුවක වාඩි වී සිටිය දී ඔහු අභියසට පැමිණි පොලීසියේ ලොක්කෙක්, ඔහුට එකත්පස්ව සිට ‘සැලියුට්’ ගැසුවේය. එනම්, සිව් මිනිස් ඝාතක සැකකරුවෙකුට පොලීසියේ ලොක්කෙක් කැමරාවක් ඉදිරියේම අභිනන්දනය කෙළේය. එය ලංකාවේ වර්තමාන ජාතික විහ්නයේ සෘජු රූපකයයි.

අපේ කතාව පටන් ගැනෙන්නේ මෙතැනිනි.

යමෙකුගේ අපරාධය මොන තරම් බරපතල වුවත්, ඔහු වෙනුවෙන් පෙනී සිටීමට නීතිඥයෙකුට වෘත්තීය වගකීමක් ඇතැ යි ඕනෑම නීතිඥ මහතෙකු අපට කියා දෙනු ඇත. එම තර්කය හරි ය. මන්ද යත්, කිසි සැකකරුවෙකු, අපරාධය ඔප්පු කෙරෙන තෙක්, වැරදිකරුවෙකු නොවන බැවිනි. ඊළඟට, තමා පෙනී සිටින සැකකරුවාගේ අපරාධය නීතිඥයා හැබැහින් දැක නැති නිසා, ඔහුට එම සැකකරුවා වෙනුවෙන් පෙනී සිටීමේ සදාචාරමය විචිකිච්ඡුාවක් ඇති වන්නේ ද නැත. හැබැයි, අළුත්කඬේ උසාවි භූමියේ දීම විනිසුරුවරයෙකුව වෙඩිතබා ඝාතනය කළ සැකකරුවා වෙනුවෙන් පෙනී සිටීම අපේ නීතිඥ මහත්වරුන් එදා වර්ජනය කෙළේ මන්දැ යි ප‍්‍රශ්නයක් තිබේ. එසේම, නීතිඥ මහතෙකුගේ අම්මාව හෝ තාත්තාව ඝාතනය කළ සැකකරුවෙකු වෙනුවෙන් එම නීතිඥ මහතාම පෙනී සිට ඇති බවක් මේ දක්වා දැනගන්නට ද නැත. එයින් පෙනී යන්නේ, ශුද්ධ වූ වෘත්තීය වගකීමට අමතරව, සදාචාරමය බරකුත් නීතිඥයෙකුට තිබිය යුතු බව යි. නීතිඥයෙකුට පමණක් නොව, සෑම වෘත්තීයවේදියෙකුටම එවැනි සදාචාරයක් තිබිය යුතුය.

දැන්, දුමින්ද සිල්වාට ඇප ලබා ගැනීම සඳහා උසාවියේ කරුණු දැක්වූ නීතිඥවරයා එසේ කෙළේ, වෛද්‍ය වාර්තාවක් මත පිහිටා පමණක් නොවේ. මොළයේ ඇති වූ තුවාල නිසා ඔහු ‘අසාධ්‍ය’ තත්වයේ පසුවන බව මේ නීතිඥයා ‘දැක’ තිබුණි. ඊට පෙර ඔහු වෙනුවෙන් වෛද්‍ය වාර්තා නිකුත් කළ විශේෂඥ වෛද්‍යවරු ද එයම ‘දැක’ තිබුණි. ඔවුන් දෙන්නා එය ‘දැක’ තිබූ නිසා, නීතිපතිවරයා ද ‘දැක්කා සේ’ සිටියේය. උසාවිය, ඒ කිසිවක් ‘නොදැක්කා සේ’ අවසර දුන්නේය. මේ සියල්ලන්ම, රට කරවන දේශපාලක කුලකයට අයත් නැති, ‘බුද්ධිමත්’ යැයි සැළකෙන, සමාජය වෙනුවෙන් වෘත්තීය සේවයක නිරතව සිටිති යි කියන, එක්තරා ආකාරයක ‘විශේෂඥයන්’ ය. ඔවුන් සියල්ලන් සහ දුමින්ද සිල්වා ඉදිරියේ සැලියුට් ගැසූ අර පොලිස් නිලධාරියා අතර කිසියම් වෙනසක් තිබේ ද?

පැහැදිළි සිංහලෙන් මේ තත්වය හැඳින්වෙන්නේ ‘සිස්ටම්’ එක කියා ය.

අප ඉහතින් කී හිරුනිකා නැමැති තරුණිය ඉන්නේත් එම ‘සිස්ටම්’ එක ඇතුළේමයි. ඇගේ පියා ඝාතනය කළ බවට ඇය චෝදනා කරන දුමින්ද සිල්වා සමග එක පේළියට, එක පක්ෂයක සහ එක ආණ්ඩුවක ඇය අසුන් ගන්නා දිනය එන තෙක් මේ ‘සිස්ටම්’ එක වටහා ගැනීමට කෙනෙකු බලා සිටිය යුතු ද?

රාවය පුවත්පත

අසාත් සාලි

අසාත් සාලි අත්අඩංගුවට ගැනීමේ අර්බුධය අවසන් වුයේ රාජපක්ෂ පාලනයට දැඩිලෙස අවාසිදායක තත්වයක් නිර්මානය කරමිනි. රජයට සම්බන්ධ වෙබ් අඩවි විසින් අසාත් සාලි සමාව ගත්තා යැයි ප්‍රකාශ කළද එය පුස්සක් බව මාධය මගින්ම හෙළිවිය. චෝදනා 18 ක් සම්බන්ධව ප්‍රශ්න කිරීමට අත්අඩංගුවට ගත් සාලි මහතා කිසිදු කොන්දේසියකින් තොරව නිදහස් කිරීමට රජයට සිදුවිය.

සරත් ෆොන්සේකා මහතා අත්අඩංගුවට ගැනීමේදී සහ අසාත් සාලි මහතා අත්අඩංගුවට ගැනීමෙන් ආන්ඩුව පෙන්වා දෙන්නට උත්සාහ කළේ රජයට එරෙහි වන්නන්ට අත්වන ඉරණම මෙය බවයි. නමුත් සරත් ෆොන්සේකා ප්‍රශ්නයේදී මෙන් නොව අසාත් සාලි අත්අඩංගුවට ගැනීම ඉතාමත් ඉක්මණින් අකුළා ගැනීමට සිදුවුයේ එමගින් සුළු ජාතීන් රජය සමග උරණ වන තත්වයක් ඇති වු නිසාය. ඇත්තටම තව දින කිහිපයක් මෙය පමා වුවා නම් රජයට හොඳ හොඳ සෙල්ලම් බලා ගන්නට තිබුණි. අසාත් සාලි මහතාගේ නොනැමෙන අධිශ්ඨානය හමුවේ රජයට පසුබැසීමට සිදුවිය. ඔහු දින 8 ක් පමණ ආහාර වර්ජනයේ නිරත විය. එය විමල් වීරවංශ මෙන් ලෙමක් පෆ් කකා උපවාසයේ යෙදීමක් නොවීය.

සරත‍් ෆොන්සේකා අත්අඩංගුවට ගැනීමේ සිද්ධියේදීද ඒ සම්බන්ධව ජනතාව අතර දැඩි අප්‍රසාදයක් මතුවිය. නමුත් එය ක්‍රමයෙන් දේශපාලනික උපක්‍රම මගින් තුනීකර ගැනීමට මහින්ද රාජපක්ෂ මහතා සමත් විය. අසාත් සාලි සමග තරහ පිරිමසා ගැනීමටද එම ක්‍රමවේදයම භාවිතා කිරීම වගකිව යුත්තන්ගේ අපේක්ෂාව විය. නමුත් එය ව්‍යර්ථ වුයේ බුර බුරා නැගෙන ජනතා විරෝධය එන්න එන්නම ඇවිලීම නිසාත්, අසාත් සාලි මහතා දිගටම ආහාර වර්ජනය කිරීමේ නියුතු වු නිසාත්ය. අවසානයේ සටන අවසන් වුයේ අසාත් සාලි මහතාට දේශපාලනිකව ජයග්‍රහන රැසක් අත්පත් කරදෙමිනි. ශූර දේශපාලඥයකු වන මහින්ද රාජපක්ෂ මහතාට මේ බව දේශපාලනික ඉවෙන් දැනිය යුතුය. සහෝදරයන්ගේ ක්‍රියාවන් තුලින් දේශපාලනිකව තුවාල ලබන්නේ ඔවුන් නොව තමන් බව ඔහු දැන්වත් තේරුම් ගත යුතුය.

අසාත් සාලි මහතා අත්අඩංගුවට ගැනීමේ සිද්ධියේදී සියළුම මුස්ලිම් සංවිධාන එයට විරුද්ධ විය මුස්ලිම් ආගමික නායකත්වය වන ජමියතුල් උලමා සංවිධානය පවා ජනාධිපති වරයාට ලිපියක් යවමින් ඔහුව නිදහස් කරන ලෙස ඉල්ලා සිටින ලදී. එමෙන්ම මුස්ලිම් සමාජයේ ප්‍රබල සංවිධානයක් වන මුස්ලිම් කවුන්සිලය පවා රජයට ලිපියක් යවමින් ඔහුව නිදහස් කරන ලෙස ඉල්ලා සිටින ලදී. එමෙන්ම රජයට සම්බන්ධ කිසිදු මුස්ලිම් ඇමති වරයෙකු මේ සම්බන්ධව ඉදිරියට විත් රජය ආරක්ෂා කිරීමට ඉදිරිපත් නොවීය. මේ සම්බන්ධව රවුෆ් හකීම් අමාත්‍යවරයා විසින් මාධ්‍යට කරන ලද ප්‍රකාශයක් සම්බන්ධව ගෝඨාභය රාජපක්ෂ මහතා සමග දුරකථනයෙන් දැඩි වචන හුවමාරුවක්ද සිදුවු බව මාධ්‍ය මගින් පලවිය.

මේ සියල්ල තුලින් රජය අප්‍රසාදයට ලක්වීමට ප්‍රධානතම හේතුව නම් එකිනෙකාගේ පුද්ගලික කෝන්තර පිරිමසා ගැනීමට රාජ්‍ය බලය යොදා ගැනීමය. මෙසේ රාජ්‍ය බලය අනිසි ලෙස යොදාගන්නේ කුමණ රාජපක්ෂ වුවද අවසානයේ එයින් අපවාදයට පත්වන්නේ මහින්ද රාජපක්ෂ චරිතයයි. ශූර දේශපාලනඥයෙකු වන මහින්ද රාජපක්ෂ මහතා මෙය වටහා ගත යුතුය. පසුගිය කාලයේ බොදු බල සේනාව විසින් ගෙනගිය ආගම්බේධකාරී පිළිවෙත සම්බන්ධව රජයේ අනුග්‍රහය කෙසේ වී දැයි දැන් මුස්ලිම් ජනතාව වටහා ගෙන හමාරය. මේ සියල්ලේදී අනිත් රාජපක්ෂලා කරන ක්‍රියාවන්හි කරුමය පටිසන් දෙන්නේ මහින්ද රාජපක්ෂ චරිතයටයි. ඇත්තටම අනෙක් රාජපක්ෂලා අද රඟපාන්නේ රජතුමාගේ ඇගේ වැසු මැස්සාගෙන් පලිගන්නට හදන වඳුරාගේ චරිතයයි. අවසානයේ දරුණු තුවාල ලබන්නේ මැස්සා නොව රජතුමා බව කවුරුත් වටහා ගත යුතුය.

මේ අතර රග්බි විනිසුරෙකුට රාජපක්ෂ පුතෙකු විසින් පහර දීමක් සහ සුප්‍රසිද්ධ රත්තරන් කොල්ලයකට රාජපක්ෂ ආර්යාවකගේ නම ගෑවීමක්ද වාර්තා වී ඇත. රජකම් කළත් කළ කම් පල දෙන බවට ලෝක සත්‍යයක් තිබෙන බව මේ කවුරුත් වටහා ගත යුතුය.  

අන්වර් මනතුංග

දලයි ලාමා

ටිබෙටයේ අධ්‍යාත්මික බෞද්ධ නායකයා වන දලෙයි ලාමා, පසුගිය අට වැනිදා ඇමෙරිකාවේ මේරිලන්ද විශ්වවිද්‍යාලයෙදී (University of Maryland) කල දේශනයකදී බෞද්ධ බෙදුම්වාදී ගැටුම් පිළිබඳව අදහස් ප්‍රකාශ කරන ලදී. එම දේශනය සඳහා පසළොස් දහසක පමණ ප්‍රමාණයක් සභාගත වූහ.

හැත්තෑ හත් හැවිරිදි, නොබෙල් සාම තාග්‍ය ලාභී දලෙයි ලාමා මෙසේ පවසා සිටියේය.

“ආගමේ නාමයෙන් මිනී මැරීම ඉතා ශෝකජනක සහ සිතීමටවත් අපහසු වන තරමේ දෙයකි. වර්තමානයේ, මියන්මාරයේ සහ ලංකාවේ බෞද්ධයන්ද මෙයට සම්භන්ධ වී ඇත. බෞද්ධ භික්ෂූන් විසින් මුස්ලිම් පල්ලි සහ පවුල් විනාශ වේ. ඉතාම ඉතා ශෝකජනකයි.”

“ඔවුන්ට (භික්ෂූන්) බුදුන් සිහිවෙතැයි පතමි.” (“I pray for them (the monks) to think of the face of Buddha”)

දලෙයි ලාමා යනු ටිබෙට් දේශයේ අධ්‍යාත්මික සහ දේශපාලන නායකයා හඳුන්වන නාමයයි. දැනට ටිබෙටයෙන් පිටුවහල් වී සිටින දලෙයි ලාමා ටිබෙටයේ නිදහස වෙනුවෙන් කතා කරන්නේය. ලොව පුරා පිළිගැනීමක් ඇති ඔහු බුද්ධාගම ඇතුළු විෂයන් රැසක් පිළිබඳව දේශනා කරන්නේය.

අදාළ දේශනය සම්බන්ධයෙන් වැඩි විස්තර මෙතනින්.

Mr.who

දේශපාලන සිරකරු

අසාද් සාලි මහතා අත්අඩංගුවට ගැනීමේ ක‍්‍රමවේදය ගැන විපක්‍ෂ නායකතුමන් පාර්ලිමේන්තුවේදී මතු කළ ප‍්‍රශ්නයකට පිළිතුරු දෙමින් අග‍්‍රාමාත්‍යතුමන් කියා සිටියේ, ‘‘ලංකා ආණ්ඩුවට විරුද්ධත්වය දැක්වීමේ හැඟීම් ඇවිස්සීම, එසේ හැඟීම් ඇවිස්සීමට තැත් කිරීම, වැසියන් අතර අසමගිය වර්ධනය කිරීමට තැත් කිරීම වැනි දණ්ඩ නීති සංග‍්‍රහයේ 120 වැනි වගන්තිය ප‍්‍රකාරව අසාද් සාලි මහතා අත්අඩංගුවට ගෙන ඇත.’’ එමෙන්ම, ත‍්‍රස්තවාදය වැළැක්වීමේ පණත අහෝසි කිරීමට හෝ ජාත්‍යන්තර ත‍්‍රස්තවාදී කාර්යයන් ආවරණය ආකාරයට එය සංශෝධනය කිරීමට හෝ ආණ්ඩුව කි‍්‍රයා නොකරන බවය.

දේශපාලනඥයන් වශයෙන් හැඟීම් ඇවිස්සීමේ ප‍්‍රකාශ කිරීම සාමාන්‍ය කරුණක් වනු අතර, හැඟීම් ඇවිස්සීමේ ප‍්‍රකාශ නිකුත් කිරීම සම්බන්ධයෙන් අසාද් සාලි මහතා අත්අඩංගුවට ගැනීම ප‍්‍රජාතන්ත‍්‍රවාදයට හා අදහස් ප‍්‍රකාශ කිරීමේ අයිතියට එල්ල වූ බරපතල තර්ජනයක් බවද ප‍්‍රකාශ කරමු.

අසාද් සාලි මහතා වරදක් කර ඇත්නම් ඔහුට එරෙහිව සාමාන්‍ය නීතිය යටතේ කි‍්‍රයා නොකොට ත‍්‍රස්තවාදය වැළැක්වීමේ පණත යටතේ කි‍්‍රයා කළේ කවර හේතූන් මත දැයි කියා විපක්‍ෂ නායකතුමන් විසින් අග‍්‍රාමාත්‍යතුමන්ගෙන් විමසූ කල්හී ඊට ලබා දුන් පිළිතුරෙහි ඒ පිළිබඳ කිසිදු සාධාරණ හේතුවක් පෙන්වා දීමට අග‍්‍රාමාත්‍යතුමන් කි‍්‍රයා කළේ නැත.

අසාද් සාලි මහතා අත්අඩංගුවට ගැනීම සම්බන්ධයෙන් අදහස් දක්වමින් ආරක්‍ෂක ලේකම්වරයා ප‍්‍රකාශ කර තිබුණේ, ‘රට අපකීර්තියට පත් කොට ජාත්‍යන්තරයට රටට අත පෙවීමට හැකි ප‍්‍රකාශයන් කරන පුද්ගලයන්ගේ තරාතිරම නොබලා නීතිය තදින්ම කි‍්‍රයාත්මක කරන බව’ය.

නමුත් මෙතනදී කි‍්‍රයාත්මක කර ඇත්තේ රටේ සාමාන්‍ය නීතිය නොවේ. මෙහිදී සිදුව ඇත්තේ, සිය දේශපාලන ජීවිතය තුළ කිසිදු අවස්ථාවක ත‍්‍රස්තවාදී සංවිධානයක සාමාජිකයෙකු නොවූ, කිසිදු අවස්ථාවක ත‍්‍රස්තවාදී කි‍්‍රයාකාරකම්වල නොයෙදුණු පුද්ගලයෙක් කළ ප‍්‍රකාශයක් සම්බන්ධයෙන් ත‍්‍රස්තවාදය වැළැක්වීමේ පනත යටතේ කටයුතු කිරීමය.

මේ සියල්ල අනුව පැහැදිලිවම පෙනී යන්නේ ආණ්ඩුව සිය දේශපාලන ප‍්‍රතිවාදීන් මර්දනය කිරීම හා සිරගත කිරීම සඳහා ත‍්‍රස්තවාදය වැළැක්වීමේ පනත යොදා ගන්නා බවය. ඒ අනුව, දේශපාලනඥයන් පමණක් නොව, ආගමික නායකයින්, විද්වතුන්, මාධ්‍යවේදීන් පවා ත‍්‍රස්තවාදය වැළැක්වීමේ පනත යටතේ පීඩාවට පත් කෙරෙනු ඇත.

අසාද් සාලි මහතා අත්අඩංගුවට ගැනීම සඳහා ත‍්‍රස්තවාදය වැළැක්වීමේ පනත යොදා ගැනීම ඒ අනතුරුදායක ප‍්‍රවණතාවයේ මූලාරම්භයයි. රාජපක්‍ෂ රෙජිමයේ ඒකාධිපති ගමන් මගෙහි පිළිබිඹුවයි.

මානව හිමිකම්, අදහස් ප‍්‍රකාශ කිරීමේ අයිතිය හා ප‍්‍රජාතන්ත‍්‍රවාදය අගයන පක්‍ෂ වශයෙන් අපි රාජපක්‍ෂ රෙජිමයේ මේ කි‍්‍රයා පිළිවෙතට දැඩි ලෙස විරෝධය පළ කරන්නෙමු. ත‍්‍රස්තවාදයට මුවා වී ප‍්‍රතිවාදී දේශපාලනඥයන් දඩයම් කිරීමේ වෑයමට එරෙහිව හා ප‍්‍රජාතන්ත‍්‍රවාදයට එල්ල වී තිබෙන තර්ජනය පිළිබඳව තානාපතිවරුන් හමු වී කරුණු පැහැදිලි කිරීමටද, දේශීය වශයෙන් පමණක් නොව ජාත්‍යන්තර වශයෙන්ද ගත හැකි සියලූ පියවර ගන්නෙමු.

එක්සත් ජාතික පක්‍ෂය ප‍්‍රමුඛ පාර්ලිමේන්තුව නියෝජනය කරන ප‍්‍රධාන විරුද්ධ පක්‍ෂ තුනද සම්බන්ධ කරගෙන මේ පිළිබඳව කි‍්‍රයා කිරීම සඳහා වැඩ පිළිවෙළක් ඇති කිරීම සම්බන්ධයෙන් ද සාකච්ඡා කළ යුතු බව අවධාරණය කරමු.

ආණ්ඩුව ස්වාධීන පොලිස් කොමිසම අහෝසි කර, එය රාජපක්‍ෂ රෙජිමයේ අතකොළුවක් බවට පත් කර ගත්තේ මෙවැනි දේශපාලන දඩයම් කිරීම සඳහා හිරිකිතයකින් තොරව පොලිස් සේවාව පාවිච්චි කිරීමේ අරමුණෙනි. පොලීසිය ස්වාධීන කරලීමේ අවශ්‍යතාව එල්.එල්.ආර්.සී. වාර්තාව මගින්ද පෙන්වා දී තිබේ. රාජ්‍ය සේවය, අධිකරණය ආදී ක්ෂේත‍්‍රයන් ද දැන් සම්පූර්ණයෙන්ම රාජපක්‍ෂකරණයට ලක් කොට හමාරය.

මේ නිසා දේශයේ ප‍්‍රජාතන්ත‍්‍රවාදය යළි ස්ථාපිත කරලීමත්, 18 වන සංශෝධනය අහෝසි කොට ස්වාධීන කොමිෂන් සභා නැවත ස්ථාපිත කිරීමත්, ත‍්‍රස්තවාදය වැළැක්වීමේ පනත අහෝසි කොට සාමාන්‍ය නීතිය කි‍්‍රයාත්මක කරලීමත් වෙනුවෙන් විපක්‍ෂයේ විරෝධය සෑම විටම පෙනී සිටින බව මෙහිලා අවධාරණය කරමු.

එක්සත් ජාතික පක්‍ෂය,

ද්‍රවිඩ ජාතික සන්ධානය,

ප‍්‍රජාතන්ත‍්‍රවාදී ජනතා පෙරමුණ,

නව සම සමාජ පක්‍ෂය, මව්බිම ජනතා පක්‍ෂය,

නව සිහළ උරුමය,

රුහුණු ජනතා පක්‍ෂය,

නිදහසේ වේදිකාව,

එක්සත් ජනතා පෙරමුණ,

එක්සත් සමාජවාදී පක්‍ෂය.

ඕමල්පෙ සෝභිත හිමි

2013 මැයි මස 8 වැනි බදාදා  “ලංකාදීප” පුවත් පතේ 17 වැනි පිටුවේ “නීතිය හමුවේ සියලු දෙනා එක සමානයි” යන මාතෘකාව යටතේ ජාතික හෙළ උරුමයේ මාධ්‍ය හමුවට සහභාගි වෙමින් එහි සභාපති ඕමල්පේ සෝභිත හිමියන් විසින් ඉදිරිපත් කරණ ලද කරුණු පිළිබඳව අපගේ වැටහීම අනුව එහි සාරාංශය පහතින් ගෙන හැර දක්වන්නට කැමැත්තෙමු.

1.      මුස්ලිම් වරුන් නීතිය ඉදිරියේ තමන් සුවිශේෂී යැයි මතයක් අන්තවාදී       දේශපාලකයන් විසින් ඇති කර ඇත.

2.     අන්තවාදී මුස්ලිම් ක්‍රියාකාරකම් දිනෙන් දින වැඩිවෙමින් පවතී.

3.     යුද්ධ කාළයේ පිපිරුණු බෝම්බ වලට වඩා භයානක බෝම්බ සැකසෙමින් පවතී.   මෙම බෝම්බ සැකසෙමින් පවතින්නේ මුස්ලිම් අන්තවාදය විසින් නිර්මාණය කරනු ලැබූ   පාතාලය තුලයි.

4.     පුත්තලම, කල්පිටිය මහ රෝහල ඇතුළු රෝහල් පහක මුස්ලිම් ජාතික      සේවිකාවන් නිල ඇඳුම් ප්‍රතික්ෂේප කොට මුස්ලිම් ආගමික ඇඳුම් ඇඳ සේවයට       පමනීම කොහෙත්ම අනුමත කල නොහැක.

5.     මුස්ලිම් පාසැල් දරුවන් ෆර්දාව ඇඳ එන නිසා එම දරුවන්ට අන් දරුවන්ට මෙන් දෙගුණයක් රෙදි ලබා දීමට සිදුවී ඇත.

6.     ජනතා බදු මුදලින් ආගමික ප්‍රචාරණයට හා ෂරියා නීති ප්‍රචාරණයට රාජ්‍ය අනුග්‍රහය මෙලෙස දැක්වීම අනුමත කල නොහැක.

6.     උන්වහන්සේලා ජාතිවාදී හා ආගම්වාදී යැයි පිළිගනිති. නමුත් ජාතිභේද වාදී හෝ ආගම්භේද වාදී පිරිසක් නොවන බව අවධාරණය කරණ සේක.

මෙම මාධ්‍ය හමුවේ අදහස් දැක්වූ ජාතික හෙළ උරුමයේ මාධ්‍ය ප්‍රකාශක නිශාන්ත ශ්‍රී වර්ණසිංහ මහතා ගේ අදහස් පහතින් සංක්ෂිප්තව දක්වා ඇත්තෙමු.

1.      මුස්ලිම් ජාතික දැරියන් දන්ත වෛද්‍ය වරුන්ට දත් පෙන්වීම ප්‍රතික්ෂේප කරති.     මුස්ලිම් ජාතික වෛද්‍යවරියන්ට පමණක් දත් පෙන්වන්නට සුදානම් බව ඔවුන් පවසත්.

2.     කාසල් වීදියේ කාන්තා රෝහලට එන මුස්ලිම් ජාතික මව්වරුන් මුස්ලිම් ජාතික     වෛද්‍යවරියන් ඉල්ලන බව.

3.     මෙම තත්වය පිළිබඳව සෞඛ්‍ය අමාත්‍ය මෛත්‍රීපාල සිරිසේන, ආරක්ෂක ලේකම්    ගෝඨාභය රාජපක්සෂ, වයඹ ප්‍රධාන ඇමැති අතුල විජේසිංහ, යන මහත්වරුන්ට ලිඛිතව දන්වා යවා ඇතත් එම ලිපි ලැබුණ බවවත් දන්වා එවා නොමැත.

අපගේ වැටහීම අනුව මෙම මාධ්‍ය හමුවේ ප්‍රධාන කරුණු සංක්ෂිප්තව ඉහතින් ගෙන හැර දක්වා ඇත්තෙමු. මේ පිළිබඳව අපගේ මතයන්ද පහතින් ගෙන හැර දක්වන්නට කැමැත්තෙමු.

තමන්ගේ ජන පදනම ගොඩ නගා ගැනීම සඳහා දේශපාලනඥයින්ට ජනතාව උද්වේගයට පත්කළ හැකි සාධකයන් නිරන්තරයෙන් අවශ්‍ය වන බව අප රටේ දේශපාලන ක්‍රියාවළිය දෙස බලන විට දැකිය හැකි පොදු කරුණකි. පනහේ දසකයේ භාෂාව හා ද්‍රවිඩ ජනතාව මේ සඳහා උපයෝගී වූ අතර මෙහි ප්‍රතිඵලයක් වශයෙන් ඇතිවූ විනාශකාරී දසක තුනක ගැටුම අවසන් වනවාත් සමග මුස්ලිම් ජනතාව ඔවුන්ගේ ප්‍රධාන ඉලක්කය බවට පත්වී ඇත. ජනතාවගේ ආර්ථික සමාජයීය සුබ සාධනය සඳහා අර්ථවත් නියත වැඩපිළිවෙලක් නොමැති ජාතිවාදී හා ආගම්වාදී සංවිධාන හා පක්ෂ මෙවන් පටු ක්‍රියාවලියන් හි නිරත වන බව අප දකින පොදු ලක්ෂණයකි.

එහෙයින් ඕමල්පේ සෝභිත හිමියන් විසින්ම පිළිගෙන ඇති පරිදි ජාතිවාදී හා ආගම්වාදී සංවිධානයක් වූ ජාතික හෙළ උරුමය වැනි පක්ෂ මෙරට සිංහල බෞද්ධ ජනයා තමන් ගේ පිළට දිනා ගැනීම පිණිස මෙවන් උපක්‍රමයන්හි නිරත වීම අරුමයක් ලෙස සැලකිය නොහැක්කකි. නමුත් බුද්ධිමත් සිංහල බෞද්ධ ජනයා මෙවන් උද්වේගකාරී මෙන්ම වෛරය හා ක්‍රෝධය වාර්ගික කොටස් අතරේ ඇතිකරවන්නට වෙර දරන ක්‍රියාවලියන් මගින් රැවටිය හැකි වේවි යැයි අප නොසිතන්නෙමු. මෙයට සාක්ෂියක් ලෙස මෙම මාධ්‍ය  හමුවේ අදහස් දැක්වූ ජාතික හෙළ උරුමයේ මාධ්‍ය ප්‍රකාශක නිශාන්ත ශ්‍රී වර්ණසිංහ මහතා සෞඛ්‍ය අමාත්‍ය මෛත්‍රීපාල සිරිසේන, ආරක්ෂක ලේකම් ගෝඨාභය රාජපක්සෂ, වයඹ ප්‍රධාන ඇමැති අතුල විජේසිංහ, යන මහත්වරුන්ට ලිඛිතව දන්වා යවා ඇතත් එම ලිපි ලැබුණ බවවත් දන්වා එවා නොමැති බව මැසිවිලි නගයි. මෙහි අර්ථය වන්නේ අඩුවශයෙන් මෙවන් කරුණු පිළිබඳව නගන මැසිවිලි සම්බන්ධයෙන් වඩාත්ම සුදුසු ප්‍රතිචාරය වන්නේ නිහඬ තාවය බව ඉහත කරුණු මගින් ඔප්පු වන කරුණකි. මාධ්‍ය හමුවේදී ඉදිරිපත් කරණ ලද ඉහත සඳහන් කරුණු පිළිබඳව අනු පිළිවෙලින් දැන් විමසා බලමු.

1.      ලාංකීය සැමට පොදුවූ එකම නීතිය අපරාධ නීති සංග්‍රහය පමණකි. අනෙකුත් සිවිල් හා පෞද්ගලික නීති පද්ධති මුස්ලිම් වරුන්ට පමණක් නොව සිංහල හා දමිළ ජනයාට මෙන්ම ආගමික ස්ථාන සම්බන්ධයෙන්ද දැනට ක්‍රියාත්මක වන්නකි. විහාර හා දේවාල ගම් පිලිබඳ නීති, උඩරට විවාහ නීතිය හා තේස වලමයි නීතිය ඉන් සමහරකි.

2.     අන්තාවාදී මුස්ලිම් ක්‍රියාකාරකම් කුමක්ද යන්න පැහැදිළි කොට එයින් රටේ සාමයට හා වාර්ගික සමගියට තර්ජනයක් ඇත්තේ නම්, ඒ පිළිබඳව අදාළ බළධාරීන්ගේ අවධානයට යොමු කොට නිසි පියවර ගන්නට කටයුතු කරන්නේ නම් එයම ඔබ වහන්සේගේ ජාතිකාභිමානය හා දේශානුරාගය සහතික කරණ ක්‍රියාවලියක් වනු නිසැකය. එසේ නොකොට සිංහල බෞද්ධ ජනයාගේ සිත්සතන්හි මුස්ලිම් වරුන් පිළිබඳව යක්ෂ රූපයක් නිර්මාණය කරන්නට මෙවන් අදහස් ඉදිරිපත් කරන්නේ නම් එය දේශපාලන බංකොලොත් භාවයේ සලකුණක් මිස අන් කිසිවක් නොවේ. මුස්ලිම් භීතිකාවක්‌ හා මුස්ලිම් පිළිකුලක් ඇති කිරීම මෙම බොහෝ කරුණු වල අපේක්ෂාව බව පැහැදිලිව පෙනෙන්නට ඇත.

3.     ඔබ වහන්සේ සඳහන් කරණ භයානක මුස්ලිම් පාතාල බෝම්බ පිළිබඳව ජාතිකාලය හා දේශානුරාගය ඇති අයෙකු ලෙසින් වහාම කළ යුත්තේ රාජ්‍ය බුද්ධි අංශ දැනුවත් කිරීමයි. එසේ නොකොට මෙවන් පදනම් විරහිත චෝදනා මගින් මුස්ලිම් වරුන් පිළිබඳව වෛරයක් හා භීතිකාවක්‌ ඇති කිරීම පමණයි සිදුවන්නේ. මෙය බුද්ධ පුත්‍රයන් වහන්සේ නමකට සුදුසු ක්‍රියාවක් ලෙස අප නොදකින්නෙමු. බුද්ධි අංශ ද මේ පිළිබඳව උන්වහන්සේගෙන් ප්‍රශ්න නොකර සිටීම අපට විශාල ප්‍රහේලිකාවකි.

4.     රෝහල් සේවිකාවන්ගේ ඇඳුම පිළිබඳවද සෞඛ්‍ය දෙපාර්තමේන්තුවෙන් නිකුත් කරන ලද චක්‍ර ලේඛනයක් ඇත්තේය. ඒ අනුව මුස්ලිම් කාන්තා සෞඛ්‍ය සේවිකාවන්ට තම ශරීරය වැසෙන පරිදි තම නිල ඇඳුම සකස් කර ගන්නට අනුමැතිය දී ඇති බවයි මගේ විශ්වාසය. මෙම චක්‍ර ලේඛනයේ පිටපතක් ලැබුණු විගස ඉදිරිපත් කරන්නට පොරොන්දු වන්නෙමු. අති ගෞරවනීය මාතෘත්වය උරුම ස්ත්‍රිය පුවත් පත් දැන්වීම් මගින් හා විවිධ මාධ්‍ය වැඩසටහන් මගින් නිරුවත් කොට පෙන්වීම පිළිබඳව ඇති නිහැඬියාව කන් බිහිරි කරවන තරමටය. ස්ත්‍රිය තම ශරීරය වසා සංවර අයුරින් කටයුතු කරන්නට  ඉදිරිපත් වනවිට නැගෙන විරුද්ධත්වය අදහා ගත නොහැකි තරම් එකකි.

5.     මුස්ලිම් පාසැල් සිසුවියන්ගේ ඇඳුම පිළිබඳව මෑතකදී ශේෂ්ඨාධිකරණයේ විභාගවූ නඩුවට ඔබ වහන්සේට අනේක අප්‍රමාන අවස්තාවන් තිබිණ. ඔබ වහන්සේ පවසන ඇඳුම අඳින්නට මුස්ලිම් සිසුවියන්ට එම නඩු තීන්දුව අනුව අනුමැතිය ලබා දී තිබේ. එම තීන්දුව ප්‍රකාර ලබාදී ඇති අයිතීන් පදනම් විරහිතව විවේචනය කිරීම ශ්‍රේෂ්ඨාධිකරණයට කළ අපහාසයක් ලෙස සැලකීමටද බොහෝ විට ඉඩ ඇත.

6.     බෞද්ධ පුත්‍රයන් වහන්සේලාට ජාතිවාදී හෝ ආගම් වාදී විය හැකිද යන්න අප විසින් සොයා බැලිය යුතු  කරුණකි. බුදු දහමේ ඉගැන්වීම් අනුව මේ මිනිස් සංහතිය තුළ අපට මවක් පියෙක් නොවුණු අයෙක්, සහෝදරියක්, දුවෙක්, පුතෙක් නොවන අයෙක් නැතැයි පැවසෙන බුදුවදන අසත්‍යයක් ලෙස ප්‍රතික්ෂේප කිරීමක් මෙමගින් සිදු නොවන්නේද? “සබ්බේ සත්ථා භවන්තු සුඛිතත්තා” යන බුදුවදන ද මෙමගින් ප්‍රතික්ෂේප නොවන්නේද? බෞද්ධ පුත්‍රයන් වහන්සේලාට ආගම්වාදී විය හැකිද? මේ සඳහා බුදුන් වහන්සේගෙන් පුර්වාදර්ශයක් තිබේද? බ්‍රහ්මජාල සුත්තයෙහි සඳහන් වන පරිදි බුද්ධ කාලීන භාරත දේශයේ දෘෂ්ටි දෙසැටක් ව්‍යාප්තවී පැවත ඇත. බුදුන් වහන්සේ අන්‍යාගමික පැවිද්දන් හා ඔවුන්ගේ ඉගැන්වීම් හෙලා දැකීමට ඉදිරිපත් නොවුහ. එසේම ඕනෑම ආගමික ගුරුවරයෙකුගේ ඉගැන්වීම්වල ඇති යහපත් ගුණාංග බුදුන් වහන්සේ අගය කළහ. උන්වහන්සේ නොයෙක් ආගමික ගුරුවරුන් වෙත ගියහ. ඔවුන් සමග සතුටු සාමීචියෙහි යෙදී සිටියහ. ඇතැම් ආරාමවලට බුදු රදුන් වැඩම කරවූ අවස්ථාවේ ඒ ආගමික ගුරුවරු තම ශිෂ්‍යයන් නිහඬ කරවා උන්වහන්සේව ගෞරවයෙන් පිළිගත්හ.

චුල සකුළුදායි පරිබ්‍රාජක ගුරුවරයා බුදුන් වහන්සේ තම ආරාමයට වැඩම කරනවා දැක සිය ශිෂ්‍ය පිරිස නිශ්ශබ්ද කරවීය. එසේම බුදුන් වහන්සේ වච්ඡගොත්ත පරිබ්‍රාජකයාගේ ආරාමයටද වරින් වර වැඩම කළහ. ඕනෑම කෙනෙකුට ඕනෑම ආගමිකයෙකුට කවර වූ හෝ කාරණයක් උන්වහන්සේ පැහැදිළි කර දුන්නේ කාරුණිකත්වයෙන් හා මුදු මොලොක් භාවයෙන් යුක්තවය. උන්වහන්සේ කිසි විටෙකත් තම දේශනයෙන් අන්‍යයන් ප්‍රකෝපයට පත් නොකළහ. පැරණි බ්‍රාහ්මණ ආර්යවරු අභිඥාලාභීන් නොවුවද ඔවුන් සීලය හා සෘජු බව මැනවින් ප්‍රකාශ කළ අය හැටියට බුදුන් වහන්සේ පෙන්වා දුන්හ. එසේම,බුදුන් වහන්සේගේ ගෞරවයට පාත්‍රවූ වෙනත් දෘෂ්ටි අනුගමනය කළ අය වුහ. ජෝතිපාල, හත්තිපාල,කුද්දාලක, ආරක, සුනෙත්ත, යන ගුරුවරුන්ගේ ඉගැන්වීම් අනුගමනය කළ බොහෝ දෙනා ස්වර්ගගාමී වූ බව බුදුන් වහන්සේ ප්‍රකාශ කර ඇත. ඔවුන් කාමභෝගී ජීවිතයෙන් වෙන්වූ අය වශයෙන් උන්වහන්සේගේ ගෞරවාදරයට පාත්‍ර වුහ. බුදුන් වහන්සේගේ ආගමික සහනසීලි තාවයෙන් පැහැදිළි වන්නේ සියළුම ආගමික දෘෂ්ටීන් කෙරෙහි දැක්වුයේ මිත්‍රශීලී සුහද ආකල්පයකි.

යුද්ධයක් අවසන් කළ සමාජයක ජීවිතය නැවත අලුතින් නිර්මාණය කළ යුතුව ඇත.  වෛරය ක්‍රෝධය ඉවතලා සැමට සතුටින් සාමයෙන් ජීවත්විය හැකි සමාජයක් ස්ථාපිත කරන්නට වහාම අවශ්‍ය පියවර ගන්නට ඉදිරිපත් වෙමු. නිෂේධනීය ලක්ෂණ ඉවතලා සාධනීය ලක්ෂණ රකිමින් හා පෝෂණය කරමින් ඉදිරි ගමනක් අරඹමු. විසංවාදී නොවී සංවාදී සමාජයක් තුල සියළු කරුණු සාමකාමීව විසඳා ගැනීමට අධිෂ්ටාන ශීලීව ක්‍රියා කරන්නට ලක් මවගේ සියළු දරුවන් එකට අත් වැල් බැඳ ගනිමු. සෞභාග්‍යයෙන් පිරි සංවර්ධිත ශ්‍රී ලංකාවක් ගොඩ නගන්නට අපගේ පුර්ණ දායකත්වය ලබා දෙමු. මෙවන් අදහස් පෙරදැරි කරගෙන පටු චින්තනයෙන් මිදී යහකමින් සපිරි ජීවිතයක ලක්ෂණ විදහා දක්වමින් කටයුතු කරන්නට ඉදිරිපත් වෙමු.

අපවෙත ලැබුණු නිර්නාමික ලිපියකි.

හොස්නි මුබාරක්

සාමාන්‍ය දුප්පත් පවුලක ඉපිද දේශපාලනය ඇරඹි ඊජිප්තුවේ හොස්නි මුබාරක් අවසානයේ ඩොලර් බිලියන 40 කට වඩා ධනසම්පත්තියක් හිමි අයෙකුව සිටියේය. එමෙන්ම ඔහු ඉදිරිපත්වු සෑම මැතිවරණයකින්ම අතිබහුතරයක් සහිතව ජයග්‍රහණය කරන ලදී. නමුත් කිසිවෙකුත් අපේක්ෂා නොකළ පරිදි කො‍ළු කුරුට්ටන් පිරිසක් එක්වී කළ විරෝධතාවයක් තුලින් මුබාරක්ගේ මහා ප්‍රතිරූපය විනාශ කර ඔහුව බලයෙන් පහකරන ලදී. මුබාරක්ගේ ජීවිතයෙන් අපේ රටේ නායකයන්ද උගතයුතු කරුණු බොහෝය.

අද අපේ රටේ නායකයන් විශ්වාසය තබා තිබෙන්නේ දේශපාලනික උප්පරවැට්ටි දෙසයි. ඔවුන් සිතන්නේ විපක්ෂයේ අය බිළිබා ගැනීමෙන් සහ තමන්ට විරුද්ධ වන්නන් මර්ධනය කර නිසොල්මන් කිරීමෙන් චිරාත් කාලයක් බලයේ සිටිය හැකි බවයි. ඔවුන් දැනගත යුතු ප්‍රධාන කරුණ නම් හොස්නි මුබාරක් මීටත් වඩා එම උප්පරවැට්ටි ක්‍රියාත්මක කළ අයෙකු බවයි. ඔහු විපක්ෂය සම්පුර්ණයෙන්ම අඩපන කරන ලදී. සාමාන්‍යෙයන් දේශපාලනඥයා සිතන්නේ තමන්ට විරුද්ධතා එන්නේ විපක්ෂයෙන් බවයි. එනිසා කපටි දේශපාලකයන් සිතන්නේ විපක්ෂය අඩපන කිරීමෙන් තමන්ට චිරාත් කාලයක් වැජඹිය හැකි බවයි. අද අපේ රටේ රජයද විපක්ෂ මංත්‍රීවරුන් බිළිබාගෙන ඔවුන්ට තාන්න මාන්න දී රජයේ තබාගෙන සිටින්නේ එහෙයිනි. සැබෑ ජනතාවාදී සහ ජනහිතකාමී දේශපාලකයෙකු විශ්වාස කළයුත්තේ ජනතා බලයයි. එසේ නොකර දේශපාලන උප්පරවැට්ටි යොදන්නේ කුහකව දේශපාලනයේ යෙදෙන අයයි. ඔවුන්ට ජනතාව ගැන එතරම් විශ්වාසයක් නොමැත. ඒ නිසා තමන්ට බලය හිමිවු පසුව එය කෙසේ හෝ රඳවා තබා ගැනීමට මාන බලයි.

ගෙවී ගිය ජේ.ආර්. සහ ප්‍රේමදාස පාලන සමයන්හි මහින්ද රාජපක්ෂ යනු රැඩිකල් චරිතයකි. මානව හිමිකම් සහ නීතිය සාධාරණත්වය වෙනුවෙන් සටන් කළ චරිතයකි. නමුත් අද මහින්ද රාජපක්ෂ රජය එදා ජේ.ආර් සහ ප්‍රේමදාස ගෙනගිය දුර්දාන්ත පාලනයටත් වඩා අන්තයට ගමන් කරමින් සිටී. අපට මෙයින් පෙනෙන්නේ කුමක්ද? “මොලේ තියෙන විට බලය නැහැ! බලය තිබෙන විට මොලය නැහැ!” යන කියමන සත්‍ය බව නොවේද? මේවා සිතන්නට රාජපක්ෂ මැතිතුමාට වෙලාවක් නැත. එමෙන්ම මේ ගැන කියාදෙන්නට හිතෛෂීන්ද නැත. වටකොට සිටින්නේ වන්දි භට්ට රැළකි. සුද්දා මේ රට දාලා ගිය දා සිට මේ දක්වා රටේ සිටි සියළුම නායකයන්ට සිදුවුයේ මෙයයි. එදා සිට මේ දක්වා රට දියුණුවට නොව පරිහාණියට ගමන් කරන්නට හේතුවද මෙයයි. මේ තත්වය හොඳින් ජනතාව අවබෝධ කරගත යුතුය. එමෙන්ම රටට ආදරය කරන විද්වතුන්, බුද්ධිමතුන්, කලාකරුවන් ඇතුළු සියළුම පෙරටුගාමීන් මෙය ජනතාවට වටහා දිය යුතුය.

කළයුත්තේ මේ ඔළුගෙඩිය වෙනුවට වෙන ඔළුගෙඩියක් පත්කිරීමද? අපේ රටතුල හැමදාම සිදුවුයේ මෙයයි. මෙය ඇත්තටම හරියට “හිසේ ඇම්මට කොට්ටය මාරු කිරීමකට” සමානයි. සිදුවිය යුත්තේ පාලකයා මාරු කිරීම නොව පාලන තන්ත්‍රයම වෙනස් කිරීමයි. මන්ද අපේ රටේ විධායක ජනාධිපති නැමති පුටුවට පත්වු සෑම කෙනෙකුම බලයට පත්වු පසුව කලේ අන්තගාමී වැඩය. එය එම පුද්ගලයාගේ වරදකට වඩා ක්‍රමයේ වරදක් බව අප වටහා ගත යුතුය. අද විධායකය පාර්ලිමේන්තුවට වගකියන බව පොතක සඳහන් වී ඇති කරුණක් පමණක් වී ඇත. එසේ නම් සැබෑ ලෙසම පාර්ලිමේන්තුවට වගකියන පාලන තන්ත්‍රයක් බිහිකළ යුතුය. එමෙන්ම ජනතාවට වගකියන පාර්ලිමේන්තුවක් බිහිවන ව්‍යවස්ථා වෙනසක් ඇති කළ යුතුය.

අද විපක්ෂයේ සිටින ඕනෑම මංත්‍රී වරයෙකුට ආන්ඩු පක්ෂයට ගොස් තාන්න මාන්න සහ ඇමති තනතුරු ගැනීමට හැකිවන සේ ප්‍රජාතන්ත්‍රවාදී පාලන ක්‍රමය විකෘති කර ඇත. ඇත්තටම ජනතා පරමාධිපත්‍ය යනු අද ඡන්දය දිනට පමණක් වලංගු එකකි. එය කෙතරම්ම විහිළු සහගත තත්වයකට පත්කර තිබෙනවාද යත් විපක්ෂයේ කෙනෙකු බිළිබා ඔහුට දෙන්නට ඇමතිධූරයක් දීගත නොහී සීනි කර්මාන්ත ඇමති ධූරයක් ඇතිකර ලබාදී ඇත. ජනතාව මෙම විහිළු වටහා ගත යුතුය. එමෙන්ම බුද්ධිමතුන් සහ ජනමාධ්‍ය කරුවන් මේ ගැන ජනතාව දැනුවත් කළ යුතුය. ලොකුම වරද නම් මේ පිළිබඳව බුද්ධිමතුන්ගේ සංවාදයක් නොවීමයි.

රාජපක්ෂවරු තම රජය ගැන කෙතරම් අධිමානයකින් සිටින්නේ දැයි මා නොදනිමි. නමුත් අද ඔවුන්ගේ පාලනය දැඩි අවධානම් සහගත තත්වයකට පත්ව ඇති බැව් මගේ අදහසයි. මන්ද දිනපතාම රජයට විරුද්ධවාදීන් ගණන වැඩි වෙමින් පවතී. රජයේ සිටින අන්තනෝමතිකයන්ගේ ක්‍රියාවන් නිසාම සතුරන් වැඩිවීම වර්ධනය වී ඇත. මේ නිසා විපක්ෂය නිදා සිටියද දිනක ජනතාව විසින් මුබාරක්ට කළ දේ රාජපක්ෂලාට නොකරාවි යැයි කාට කිව හැකිද?  

අවනීතිය

අසාද් සාලි මහතා ජාත්‍යන්තර මට්ටමින් සිදුකර ඇති ප්‍රකාශයක් ඇතුළු ‍චෝදනා 18ක් ගැන අපරාධ පරීක්ෂණ දෙපාර්තමේන්තුව ඔහුගෙන් ප්‍රශ්න කරන බවද සාලි මහතාට විරුද්ධව විශාල මූල්‍ය වංචාවක් ගැනද චෝදනා ඇතැයි ද ජාතික ආරක්ෂාව පිළිබද මාධ්‍ය මධ්‍යස්ථානයේ අධ්‍යක්ෂ ජනරාල් ලක්ෂ්මන් හුළුගල්ල මහතා පවසයි.

කොළඹදී 2013 මැයි 06 පැවති මාධ්‍ය හමුවක දී ඔහු ඒ බව සඳහන් කළේය. එම පැමිණිලි 18 ක් සම්බන්ධයෙන් විමර්ශන සිදුකිරීමෙන් පසු ඔහු නිදහස් කිරීමට පියවර ගනු ඇති බව හුළුගල්ල මහතා එහිදී පවසා ඇත. රැඳවුම් නියෝග යටතේ රඳවාගෙන සිටින අසාද් සාලී මහතා දැන් සාමාන්‍ය පරිදි ආහාර ගන්නා බැවින් ඔහුගේ සෞඛ්‍ය සම්බන්ධයෙන් ගැටලුවක් නොමැති බව ඔහු සඳහන් කර ඇත.

සාලි මහතා විසින් තමිල්නාඩුවේ චෙන්නායි නගරයට ගොස් රටට එරෙහිව සිදුකර ඇති ප්‍රකාශයක් සම්බන්ධයෙන් අපරාධ පරීක්ෂණ දෙපාර්තමේන්තුව ඔහුගෙන් ප්‍රශ්න කරන බව හෙතෙම පැවසීය. රටට විරුද්ධව තවත් රටකට ගිහින් එසේ ප්‍රකාශ කිරීම යුක්ති සහගත නොවන බවත්, මුස්ලිම් ජනතාව කවදාවත් මේ ර‍ට පාවාදෙන ප්‍රකාශ කරන්න යැයි කිසිවිටෙකත් පවසා නැති බවත් හුළුගල්ල මහතා කීවේය. එම ප්‍රකාශය මේ රටේ මුස්ලිම් ජනතාවට කළ අපහාසයක් යැයි ද ඔහු පවසා ඇත.

ලක්ෂ්මන් හුළුගල්ල මහතාට හදිසියේ මුස්ලිම් ජනතාවට අසාත් සාලි මහතා විසින් අපහාස කිරීමක් ගැන කැක්කුමක් ආවේ කෙසේදැයි යන්න මවිතය දනවන කරුණකි. පසුගිය කාලවකවානුව තුල මුස්ලිම් ජනතාවට සහ ලංකාවේ මුස්ලිම් නායකත්වයට තොග පිටින් බොදු බල සේනාව සහ ජාතික හෙළ උරුමයට අයත් ආගම්බේධකාරීන් අපහාස කරන විට හුළුගල්ල මහතා සිටියේ කොහේද? ඔවුන්ව අත්අඩංගුවට ගත්තාද?

නමුත් අත් අඩංගුවේ පසුවන අසාත් සාලි මහතා උපවාසය හමාර කළ බවට රජය කළ ප්‍රකාශය පවුලේ ඥාතීහු තරයේ ප්‍රතික්ෂේප කරති. ඊයේ අසාද් සාලි ගේ දියණිය අමීනා සාලි රෝහලට ගොස් පැමිණි විගස බීබීසී සංදේශයට ප්‍රකාශයක් කරමින් කියා සිටියේ ඔහුගේ සෞඛ්‍ය තත්වය ඉතා දුර්වල මට්ටමේ පැවති අතර තවමත් උපවාසය නතර කර නොමැති බවයි.

මේ අතර ත්‍රස්තවාදය වැළැක්වීමේ පනත දේශපාලනික කාර්යයන් සඳහා භාවිත කළහොත් එය ශ්‍රී ලංකාවේ පැවැත්මට ඉතා බරපතල තර්ජනයක් වනු ඇති බව ආසියානු මානව හිමිකම් කොමිසම පවසා ඇත. ලංකා රජය විසින් අසාද් සාලි මහතා අත්අඩංගුවට ගැනීම සම්පූර්ණයෙන් හෙළා දකින බව සඳහන් කරමින් එම කොමිසම නිකුත් කළ නිවේදනයක මේ බව දැක්වේ.

එය පෞද්ගලික නිදහසට මෙන් ම නීතියේ ආධිපත්‍යයට ද පටහැනි බව එම නිවේදනයේ සඳහන්ය. ව්‍යවස්ථාවට අනුව, අත්අඩංගුවට ගනු ලබන තැනැත්තෙකුට එම අත්අඩංගුවට ගැනීමට හේතුව දැනුම් දිය යුතු බව ද එහි දැක්වේ. ආසියානු මානව හිමිකම් කොමිසම නිකුත් කළ නිවේදනයෙන් පෙන්වා දී ඇත්තේ,  අධිකරණ අමාත්‍ය රවුෆ් හකීම් මහතා ද අසාත් සාලි මහතා අත්අඩංගුවට ගැනීම දැඩිව විවේචනය කර ඇති බවය. මේ අතර, අසාද් සාලි මහතා නිදහස් කරන ලෙස ඉල්ලා සමස්ත ලංකා ජමියතුල් උලමා සංවිධානය, ජනාධිපති මහින්ද රාජපක්ෂ මහතා වෙත ලිපියක් යොමු කර තිබේ. එම ලිපිය මගින් ඉල්ලා ඇත්තේ, සෞඛ්‍ය කරුණු මත අසාද් සාලි මහතා නිදහස් කිරීමට අවධානය යොමු කරන ලෙසය.

දණ්ඩ නීති සංග්‍රහයේ 120 වගන්තිය සහ ත්‍රස්තවාදය වැළැක්විමේ පනතේ 2, 1 ඌ වගන්තිය යටතේ වන වැරදි සම්බන්ධයෙන් අසාද් සාලි මහතා අත්අඩංගුවට ගත් බව පොලිසිය සඳහන් කළේය. පොලිස් මාධ්‍ය ප්‍රකාශක පොලිස් අධිකාරී බුද්ධික සිරිවර්ධන මහතා සදහන් කළේ, විවිධ ජන‍කොටස් හා ආගමික කොටස් අතර එදිරිවාදිකම් හා අසමගිය ඇති කරන ආකාරයේ ප්‍රකාශ කිරීම මෙන්ම, ශ්‍රී ලංකා ආණ්ඩුවට විරෝධය දැක්වෙන ආකාරයේ හැඟීම් ඇවිස්සෙන ප්‍රකාශ කිරීම අදාළ චෝදනා අතර වන බවය.

කෙසේ වෙතත් ඉහත ප්‍රකාශ වලින් අපට සනාථ වන්නේ රජය විසින් අසාත් සාලි මහතාට ආගම් අතර බේධය ඇතිකරන ප්‍රකාශ කළා යැයි සහ එමගින් මුස්ලිම් වරුන්ට අපහාස කළා යැයි මතවාදයක් ඇති කිරීමට දුර්වල උත්සාහයක නිරත වන බවයි. මෙමගින් රජය උත්සාහ කරන්නේ ආන්ඩුවට එරෙහිව නැගී එන මුස්ලිම් විරෝධය සමනය කරගැනීමයි. නමුත් දමිල මාධ්‍ය තුල සහ වෙබ්අඩවි වල දැක්වෙන පුවත් වලින් පැවසෙන්නේ මෙය ආරක්ෂක ලේකම් වරයා විසින් කරන ලද පුද්ගලික පලිගැනීමක් බවයි. ලංකාවේ මුස්ලිම් ජනතාව තුල දැන් ආන්ඩුව කෙරෙහි දැඩි අප්‍රසාදයක් මතුවෙමින් පවතින අතර මෙයට සෘජුවම වගකිව යුත්තේ ආරක්ෂක ලේකම් වරයා බව ඔවුන්ගේ අදහසයි.

සකස් කිරීම මිරර් වෙබ්අඩවිය ඇසුරිණි

සී.පී.ජේ

ප්‍රතිවිපාක වලින් තොරව මාධ්‍යවේදීන් මරා දැමෙන රටවල් පිලිබඳ දර්ශකයක් (The Impunity Index) වාර්ෂික වාර්තාවක් ලෙස එලි දැක්වේ. මරා දැමුණ මාධ්‍යවේදීන් සම්බන්ධයෙන් නීතිය ක්‍රියාත්මක නොවන අවස්ථා 5ක් හෝ ඊට වැඩි නම් එම රටවල් අදාළ වාර්තාවට ඇතුලත් කෙරේ. මාධ්‍යවේදීන් ආරක්ෂා කරන කමිටුව (Committee to Protect Journalists) මගින් නිකුත් කරන මෙම වාර්තාවේ 2013 වසර සඳහා රටවල් 12ක් එම දර්ශකයට ඇතුලත් වන්නේය.

මත්ද්‍රව්‍ය වෙළඳාම අතින් අතිබලවත් පාතාලයක් ඇති කොලම්බියාව මිනි මැරුම් විසඳීම සම්බන්ධයෙන් යම් ප්‍රගතියක් පෙන්වන නමුත්, ඇෆ්ගනිස්තානය, ශ්‍රී ලංකාව සහ මෙක්සිකෝව පසුගිය මාධ්‍ය වේදී මිනි මැරුම් විසඳීම සම්බන්ධයෙන් සම්පූර්ණයෙන් අපොහොසත් වී ඇත. මෙසේ නීතිය ක්‍රියාත්මක වීම සිදු නොවන විට, ස්වයං වාරණය ක්‍රියාත්මක වන්නේය. එය රටක නිදහස සහ ප්‍රගතිය සඳහා සුභදායක නැත.

ලංකාවේ දර්ශකය 2012 වසරේ සිට වෙනස් වී නොමැත. ලංකාවේ යුද්ධය අවසන් වී වසර ගණනක් පසුවී ඇති නමුත්, පසුගිය දශකය තුල මරා දැමුණු මාධ්‍ය වේදීන් නමදෙනා සම්බන්ධයෙන් නීතිය ක්‍රියාත්මක කිරීම සම්බන්ධයෙන් රජය අලස ස්වභාවයක් පෙන්නුම් කරයි. මරණයට පත් වූ මාධ්‍යවේදීන් සියලු දෙනාම රජය විවේචනය කල අය වූහ. “ස්වාධීන පරීක්ෂණ සිදුකරන්නේ නම් මේ මිනි මැරුම් බොහොමයක් පිටුපස රජයේ ඉහල තලවල පුද්ගලයන් සිටින බව පෙනී යනු ඇත” ලෙස, නීති සහ සමාජ සංගතයේ (Law and Society Trust) රුකී ෆර්නැන්ඩෝ මහතා ප්‍රකාශ කර ඇත.

Mr. Who

එම අදාළ වාර්තාව මෙතනින් ලබා ගත හැක. Committee to Protect Journalists වෙබ් අඩවියේ පළවූ ලිපිය අනුසාරයෙන් සැකසුණි.

අසාත් සාලි

ශ්‍රී ලංකා පොලිසියේ කොලඹ අපරාධ විමර්ශන ඒකකය විසින් මුස්ලිම්-දෙමල ජාතික සන්ධානයේ නායක අසාද් සාලි, ත්‍රස්තවාදය වැලක්වීමේ පනතේ නීති ය‍ටතේ මැයි 2 දා අත් අඩංගුවට ගත්තේ ය. ඔහුට විරුද්ධ ව ඇති පැමිනිලි ඔස්සේ සාලිගෙන් ප්‍රශ්න කර ගෙන යන බව පොලිසිය ප්‍රකාශ කර ඇතත් රඳවා ගැනීමේ නියෝග යටතේ ඔහු රඳවා ගෙන සිටි‍න්නේ දැයි පැහැදිලි නැත. 

ආරක්ෂක අමාත්‍යාංශයේ උසි ගැන්වීම යටතේ කර ඇති මෙම අත්අඩංගුවට ගැනීම රාජපක්ෂ ආන්ඩුව ගෙනයන දේශපාලන විරුද්ධවාදීන් දඩයම් කිරීමේ අලුත් ම සිද්ධිය යි. ආන්ඩුව මෙම අත්අඩංගුවට ගැනීම මගින් මුස්ලිම් ජනයාට එරෙහිව සිංහල-බෞද්ධ ස්වෝත්තමවාදී කන්ඩායම් ගෙනයන ප්‍රකෝපකරනයන්ට තල්ලුව දී ඇත.

කොලඹ නගර සභාවේ එක්සත් ජාතික පක්ෂයට සම්බන්ධ නියෝජ්‍ය පුරපතිවරයෙක් ලෙස කටයුතු කල සාලි පසු ව රාජපක්ෂගේ පාලක සභාගයට මාරු විය. යලිත් කොලඹ නගරාධිපති තනතුරෙන් ඉල්ලා අස් වී ආන්ඩුවට සහයෝගය දීම නතර කල ඔහු, මුස්ලිම්-දෙමල ජාතික සන්ධානය පිහිටුවා ගත්තේ, මුස්ලිම් ජනයාට කෙනෙහිලිකම් කිරීම ගැන ආන්ඩුව විවේචනය කරමිනි. තමන් අත්අඩංගුවට ගැනීමට යන බව දැනගෙන සාලි සති කිහිපයක් ම පොලිසිය මඟ හැරියේ ය. බ්‍රහස්පතින්දා පොලිස් බුද්ධි අංශ නිලධාරීන් ඔහු අත් අඩංගුවට ගන්නා ලද්දේ, කොලඹ කොලොන්නාවේ සිය දියනියගේ නිවසේ සිටිය දී ය.

ආරක්ෂක අමාත්‍යාශයේ ප්‍රකාශක ලක්ෂ්මන් හුලුගල්ල ජනමාධ්‍යයට සඳහන් කලේ, සාලි අත්අඩංගුවට ගන්නා ලද්දේ, “ආන්ඩුවට විරුද්ධ ව උද්ඝෝෂනය කිරීමේ මුවාවෙන් ජනවාර්ගික හා ආගමික එකමුතුවට හානි කිරීමේ ඉලක්කය ඇතිව මහජනයා උසි ගැන්වීම” නිසා බව යි. හුලුගල්ලේ වත් ආරක්ෂ අමාත්‍යාංශය වත් එම චෝදනා සනාථ කරන කිසිදු සාක්ෂ්‍යයක් ඉදිරිපත් කර නැත.

මෙම බොරු හේතු දැක්වීම් නො ව, මුස්ලිම්-දෙමල ජාතික සන්ධානයේ නායකයා අත්අඩංගුවට ගැනීමට ආසන්නත ම ‍හේතුව වුයේ, බොදු බල සේනා (බොබසේ) ඇතුලු බෞද්ධ අන්තවාදී කන්ඩායම් මුස්ලිම් ජනයා එල්ල කරමින් ගෙන යන ප්‍රකෝපකාරී ක්‍රියාවන්ට ආන්ඩුවේ පිටුබලය ලබා දීම පිලිබඳව, සාලි, එක්සත් ජාතීන්ගේ මහලේකම් බැන් කී මූන් ට මාර්තු මාසයේ මුල ලිපියක් ලිවීම යි. ආගමික හා වාර්ගික පදනම් මත වෙනස්කම් කිරීමට එරෙහිව එක්සත් ජාතීන්ගේ ප්‍රකාශනයන් ආන්ඩුව විසින් උල්ලංඝනය කරනු ලැබ ඇතැ යි චෝදනා කල එම ලිපිය, “ආගමික විශ්වාසයන් දරා සිටීමට ඇති අයිතිය හා නිදහස රැකදීමේ සියලු පියවර ගන්නා ලෙස” මහලේකම්ගෙන් ඉල්ලා තිබුනි.

බෙදුම්වාදී එල්ටීටීඊ (දෙමල ඊලම් විමුක්ති කොටි සංවිධානය)ට එරෙහි මිලිටරි මෙහෙයුමේ දී සිදුකල යුද අපරාධ පිලිබඳව දැනටමත් ජාත්‍යන්තර ව විවේචනයට ලක්ව සිටින ආන්ඩුව සාලිගේ ලිපිය නිසා කෝපාවිෂ්ඨ වී ඇත. එක්සත් ජාතීන්ගේ මානව හිමිකම් කවුන්සිලයේ දී, ශ්‍රී ලංකාවේ මානව හිමිකම් උල්ලංඝනය කිරීම පිලිබඳව එක්සත් ජනපදය ඉදිරිපත් කල යෝජනාව ඡන්දයට ගත් මාර්තු 21 ‍දින, විභාගයක් සඳහා කොලඹ අපරාධ විමර්ශන ඒකකයට පැමිනෙන ලෙස සාලිට නියම කර තිබින.

තමන්ට එරෙහිව පොලිසියට එක් පැමිනිල්ලක් කර ඇත්තේ, ජනාධිපතිගේ ආගමික කටයුතු පිලිබඳ උපදේශකයා බව සාලි සඳහන් කර ඇත. එම පැමිනිල්ලේ සඳහන් කර ඇත්තේ, වෙනස්කම් කිරීමට එරෙහිව නැගී සිටින ලෙස රැස්වීමක දී සාලි මුස්ලිම්වරුන්ගෙන් ඉල්ලා සිටි බව යි. තමා එවැනි ප්‍රකාශයක් නොකල බව ද, එම වාර්තාව වැරැදි බව ද සාලි කියා ඇත.

රාජපක්ෂ ආන්ඩුවට බොබසේ සමඟ සමීප සබඳකම් ඇත. ආරක්ෂක ලේකම් ගෝඨාභය රාජපක්ෂ ගාල්ලේ බොබසේ විසින් තනා ඇති බෞද්ධ නායකත්ව ශාස්ත්‍රාලය විවෘත කලේ මෑතක දී ය. බොබසේට සම්බන්ධ බෞද්ධ භික්ෂූන් කිහිපදෙනෙකු ද ඇතුලු මැර කන්ඩායමක් මාර්තු මාසයේ දී මුස්ලිම් ව්‍යාපාරිකයෙකුගේ ඇඟලුම් ගබඩාවක් වැනසූ අවස්ථාවේ, ඊට සම්බන්ධ වීම නිසා අත්අඩංගුවට ගත් මැරයින් කොක්කෙන් ගලවා හැරීමට ආන්ඩුවේ ලොක්කන් තිරයෙන් පිටුපස ක්‍රියාත්මක විය. මැරයින් අපරාධය සිදුකලත් ඔවුන්ට විරැද්ධව නඩුවක් ගෙන යාම ඉල්ලා අස්කරගැනීමට උසාවිය පොලිසියට අවසර දුන්නේ ය.

සාලි මුස්ලිම් ජනයා උසි ගැන්වූයේ යැයි චෝදනා කරන ආන්ඩුව, අනෙක් අතින් සුලු ආගමික කන්ඩායම්වලට විරද්ධ ව ප්‍රචන්ඩ ක්‍රියා ගෙන යන බෞද්ධ අන්තවාදීන්ට නිදැල්ලේ ක්‍රියාත්මක වීමට ඉඩ දී ඇත. 2009 මැයි සිට 2013 ජනවාරි දක්වා කාලය තුල අඩු ම ගනනේ, ක්‍රිස්තියානි හා මුස්ලිම් ආගමික ස්ථාන 65කට මෙම මැරයින් පහර දී ඇත්තේ, පොලිසිය බලා සිටිය දී ය. පොලිසිය අත්අඩංගුවට ගැනීමක් සිදුකල විරල අවස්ථාවක දී, භික්ෂූන් ඇතුලු කන්ඩායම් පැමින පොලිසියෙන් එකී සැකකරුවන් මුදවා ගෙන ගොස් ඇත.

තමන් මුස්ලිම් පල්ලිවලට පහර දී ඇතැ යි කියන බැවින්, සාලි උසාවිය ඉදිරියට පමුනුවන බවට බොබසේ තර්ජනය කර ඇත. බොබසේ ඇඟ බේරා ගන්නේ, පල්ලිවලට පහරදීම තමන්ගේ වැඩක් නො ව, වෙනත් අයගේ වැඩ බව කියා සිටිමිනි. සාලි අත්අඩංගුවට ගත් සැනින් ප්‍රීතිය පලකරමින් එම කන්ඩායම්වල වෙබ් අඩවි ඔහු අපහාසයට ලක්කරන දැන්වීම් පලකර තිබින.

ආන්ඩුවට සුදුහුනු ගාමින් ආරක්ෂක අමාත්‍යංශ ප්‍රකාශකයා සඳහන් කර තිබුනේ, “ජනාධිපතිතුමාගේ පාලන කාලය තුල කිසිදු ජනවාර්ගික හෝ ආගමික නොසන්සුන්කම් වාර්තා වී නොමැති” බව යි. ඔහු මේ පචය ඇද බා ඇත්තේ, දස දහස් සංඛ්‍යාත දෙමල සිවිල් වැසියන් ඝාතනය කෙරුනු ලේ වැකි යුද්ධයක් රාජපක්ෂ ආන්ඩුව විසින් දියත් කල පසු ය. එල්ටීටීඊ ය පරාජය කිරීමෙන් පසු, යුද ජයග්‍රහන උන්මාදයක් මුදාහල රාජපක්ෂ මේ වන විට එල්ටීටීඊය යලි පන ගැන්වෙමින් සිටින්නේ යැයි භීතියක් වපුරමින් ක්‍රියා කරයි. එතැනින් නො නැවතී විෂකුරු ලෙස සිංහල ‍බෞද්ධ අන්තවාදී කන්ඩායම් හරහා මුස්ලිම්විරෝධී ප්‍රචන්ඩ ක්‍රියාවලට උඩගෙඩි දීම සිදු වෙයි.

සාලි අත්අඩංගුවට ගැනීමෙන් රාජපක්ෂ ආන්ඩුව කර ඇති අනතුරු ඇඟවීම නම්, තමන්ට එරෙහි මොන ම විරුද්ධත්වයකටවත් ඉඩ නො දෙන බව යි. බොරු වම්මුන්ගේ පිටුබලය ලබන වෘත්තීය සමිති හා නිල විරුද්ධ පක්ෂ කම්කරු පන්තිය අරගලයට ඒම වලක්වා ගෙන සිටියත්, තමන් වාඩි වී සිටින්නේ සමාජ පිපිරීමක කාල බෝම්බයක් උඩ බව රාජපක්ෂ පාලනය හොඳින් දනී. ආන්ඩුවේ සැබෑ ඉලක්කය කම්කරු පන්තිය යි. කම්කරු පන්තිය, ප්‍රජාතන්ත්‍රවාදී අයිතීන්ට එල්ලවන ප්‍රහාරයන්ගෙන් මතු වී ඇති අනතුරු ඇඟවීම තේරුම් ගෙන ඊට මුහුන දීමට සූදානම් විය යුතු ය.

යුක්තිය වෙබ්අඩවිය

ලක්ෂ්මන් හුළුගල්ල

කොළඹ හිටපු උප නගරාධිපතිවරයකු වූ අසාද් සාලි එරෙහි නිශ්චිත චෝදනා ඉදිරියේදී හෙළිදරව් කරන බව ජාතික ආරකෂාව පිලිබඳ මාධ්‍ය මධ්‍යස්ථානයේ අධ්‍යක්ෂ ජෙනරාල් ලක්ෂ්මන් හුළුගල්ල ප්‍රකාශ කරයි.

ඔහුට එරෙහි චෝදනා ඇත්නම් අධිකරණයට ඉදිරිපත් කරන ලෙසටත් එසේ නැත්නම් නිදහස් කරන ලෙසටත් කැනේඩියානු රජය සහ ඇම්නෙස්ටි ඉන්ටනැෂනල් මානව හිමිකම් සංවිධානය ඉල්ලා සිටී.

උපවාසයක යෙදීමෙන් අනතුරුව, රෝහල් ගත කොට සිටින අසාද් සාලිට එරෙහිව කිසිදු චෝනාවක් ඉදිරිපත් කිරීමට නොහැකිව සිටින නිලධාරීන් අසරණ වී සිටින ආකාරයක් දකින්නට ඇති බවයි ඔහු නිදහස් කර ගැනීම පිණිස පෙළ ගැසී සිටින කණ්ඩායම් අතර සිටින නව සම සමාජ පක්ෂයේ නායක ආචාර්ය වික්‍රමබාහු කරුණාරත්න ප්‍රකාශ කළේ.

ත්‍රස්තවාදය වැළැක්වීමේ පනත යටතේ විශේෂ රඳවා ගැනීමේ නියෝගයක් නිකුත් කිරීමට බලධාරීන් උත්සාහයක් දරන බව පෙනී යන බවත් ඔහු ප්‍රකාශ කළේය.

ජාතික ආරක්ෂාව පිළිබඳ මාධ්‍ය මධ්‍යස්ථානයේ අධ්‍යක්ෂ ජනරාල් ලක්ෂ්මන් හුළුගල්ල මාධ්‍ය හමුවකදී ප්‍රකාශ කොට තිබුනේ ශ්‍රී ලංකා රජයට විරුද්ධව, ජනවාර්ගික ගැටළු ඇතිවන ආකාරයේ එදිරිවාදී ප්‍රකාශ කිරීමක් සම්බන්ධයෙන් ඔහු අත්අඩංගුවට ගත් බවයි.

බී.බී.සී. ඇසුරිණි

අවනීතිය

ආණ්ඩුවට එරෙහිව කටයුතු කරනු ලබන දකුණේ දේශපාලන පක්ෂ ක‍්‍රියාකාරීන් හා නායකයන් මර්දනය කිරීම සඳහා ත‍්‍රස්තවාදය වැළැක්වීමේ පනතේ රෙගුලාසි හා දණ්ඩ නීති සංග‍්‍රහයේ රෙගුලාසි යොදා ගැනීම ආරම්භ කර ඇති අතර ඒ අනුව ජාතික සමගි පෙරමුණේ නායක අසාද් සාලි මහතා එම රෙගුලාසි යටතේ අත්අඩංගුවට ගෙන ඇත.

ආරක්ෂක අමාත්‍යාංශය විසින් කරන ලද දැනුම්දීමක් අනුව අපරාධ පරීක්ෂණ දෙපාර්තමේන්තුව අසාද් සාලි මහතා ඔහුගේ කොළොන්නාවේ පිහිටි නිවසේදී මැයි 02 පෙරවරුවේ අත්අඩංගුවට ගෙන ඇති අතර එම අත්අඩංගුවට ගැනීම පිළිබඳව ආරක්ෂක අමාත්‍යාංශය විසින් නිකුත් කරන ලද ලිපියක්ද සාලි මහතාට ඉදිරිපත් කර ඇතැයි දැනගන්නට ලැබේ.

මේ අත්අඩංගුවට ගැනීම ගැන කළ විමසීමකදී අසාද් සාලි මහතා අත්අඩංගුවට ගෙන ඇත්තේ ත‍්‍රස්තවාදය වැළැක්වීමේ පනත යටතේ සහ දණ්ඩ නීති සංග‍්‍රහයට අනුවයැයි ජාතික ආරක්ෂාව පිළිබඳ මාධ්‍ය මධ්‍යස්ථානයේ අධ්‍යක්ෂ ජනරාල් ලක්ෂ්මන් හුළුගල්ල මහතා ප‍්‍රකාශ කළේය.

අසාද් සාලි මහතාට විරුද්ධව රාජ්‍ය විරෝධී ප‍්‍රකාශ කිරීම හා ආගම් භේද ඇති කිරීම සම්බන්ධව චෝදනා එල්ල වී ඇති බවත්, ඒ හේතුවෙන් ඔහු අපරාධ පරීක්ෂණ දෙපාර්තමේන්තුව මගින් අත්අඩංගුවට ගෙන දැනට ප‍්‍රශ්න කිරීම් සිදුකරන බවත් හේ පැවසීය. එම ප‍්‍රශ්න කිරීම් අවසානයේදී ඔහුට විරුද්ධව නීතිමය ක‍්‍රියාමාර්ග ගනු ඇති බවද ඔහු පැවසීය.

අසාද් සාලි මහතා අත්අඩංගුවට ගත්තේ කිනම් චෝදනා යටතේද යන්න පිළිබඳව පොලිස් මාධ්‍ය ප‍්‍රකාශකවරයාගෙන් විමසීමට උත්සාහ කළද එය ව්‍යර්ථ වූ අතර එම අත්අඩංගුවට ගැනීම ගැන වෙනත් මාධ්‍යවලටද නිසි තොරතුරු පොලිස් මාධ්‍ය ප‍්‍රකාශකවරයා ලබාදී තිබුණේ නැත. ජාතික හා ආගමික වශයෙන් අසමගිය ඇති කරන පුද්ගලයන්ට එරෙහිව නීති මගින් කටයුතු කිරීම සඳහා දණ්ඩ නීති සංග‍්‍රහයේ පවතින ප‍්‍රතිපාදන ප‍්‍රමාණවත් නොවන බව පවසමින් අමාත්‍ය වාසුදේව නානායක්කාර මහතා ඊට සංශෝධනයක් යෝජනා කර තිබූ අතර එයට හේතුවී තිබුණේ ජාතික හා ආගමික වශයෙන් අසමගිය ඇති කිරීම සඳහා විවිධ සංවිධාන විසින් කරනු ලැබූ ක‍්‍රියාකාරකම්ය.

විශේෂයෙන්ම සුළු ජාතීන්ට හා සුළු ආගමිකයන්ට එරෙහිව සිංහල බෞද්ධයැයි කියාගන්නා සංවිධාන විසින් කරන ලද ප‍්‍රකාශ හා ක‍්‍රියාවන්ට එරෙහිව ත‍්‍රස්තවාදය වැළැක්වීමේ පනතේ හා දණ්ඩ නීති සංග‍්‍රහයේ රෙගුලාසි ආණ්ඩුව හෝ පොලීසිය යොදා ගත්තේ නැත. අසාත් සාලි මහතා සන්නද්ධ සටන්කාමියෙකු නොවන බවත්, ප‍්‍රජාතන්ත‍්‍රවාදය වෙනුවෙන් කටයුතු කරන දේශපාලනඥයෙකු බවත්,ඒ නිසාම ත‍්‍රස්තවාදය වැළැක්වීමේ පනත යටතේ ඔහු අත්අඩංගුවට ගත්තේ කෙසේද යන්න ටී එන් ඒ පා.ම. සුරේෂ් පේ‍්‍රමචන්ද්‍රන් මහතා ප‍්‍රශ්න කරයි.

ඔහු තවදුරටත් දක්වන්නේ මෙය ආණ්ඩුවට විරුද්ධව හඬ නගන අයට එරෙහිව සිදුකරන ද්වේෂසහගත පළිගැනීමක් බවයි. අසාධාරණයට ලක්වූ මුස්ලිම් ජනයා වෙනුවෙන් හඬනැගීම හේතුවෙන් සාලි මහතාට එරෙහිව නීතියෙන් දඬුවම් දිය නොහැකි බව එජාප පා.ම. ලක්ෂ්මන් කිරිඇල්ල මහතා පවසයි. එමෙන්ම මේ සඳහා නීතිමය හැකියාවක් තිබෙනවාද යන්න ගැටලූවක් බවද ඔහු පැවසීය. ශ‍්‍රී ලංකා මුස්ලිම් කොංග‍්‍රසයේ ජාතික සංවිධායක රෆික් රාජාබ්දීන් මහතා ප‍්‍රකාශ කරන්නේ අසාද් සාලි මහතා කර ඇත්තේ මුස්ලිම් ජනතාව වෙනුවෙන් හඬ නැඟීම පමණක් බවත්, ඔහු ත‍්‍රස්තවාදියකු ලෙස දැක්වීම තමන් හෙළා දකින බවත් අසාද් සාලි මහතා වහාම නිදහස් කළයුතු බවත්ය.

ලසන්ත රුහුණගේ/ අමිල ප‍්‍රදීප්

උපුටා ගැනීම – රාවය

අසාත් සාලි

අසාද් සාලි මහතාව රහස් පොලිසිය විසින් අත්අඩංගුවට ගෙන ඇත්තේ ත්‍රස්වාදය වැලැක්වීමේ පනත යටතේය. ත්‍රස්තවාදය වැලැක්වීමේ පනත හෙවත් පීටීඅයි පනත යටතේ අත් අඩංගුවට ගන්නා අයෙකු ආරක්ෂක ලේකම්ගේ අත්සනින් දින 90 ක් යනතුරු රඳවා ගත හැකිය. ඉන් පසුව එය දීර්ඝ කරමින් දිගින් දිගටම රඳවා තබා ගත හැකිය. මේ යටතේ රඳවා ගන්නා අයෙකු බැලිය හැක්කේ එක් අයෙකුට පමණි.

මේ අතර අත් අඩංගුවට ගත් අසාද් සාලි මහතා ඊයේ සවස හදිසියේම කොළඹ මහ රෝහලේ 55 වන වාට්ටුවට ඇතුලත් කර ඇතැයි වාර්තා වේ. එයට හේතුව අසාත් සාලි මහතා විසින් ආහාර වර්ජනය කිරීම හේතුවෙනි. අසාත් සාලි මහතාගේ දියණිය ඊයේ දහවල් පැවැති මාධ්‍ය හමුවකදී හඬමින් පැවසුවේ අත් අඩංගුවේ සිටින සිය පියාණන් උදේ බිව් වතුර වීදූරුවකින් පමණක් ජීවත් වන බවත් ඔහු ආහාර ගැනීම වර්ජනය කර ඇති බවත් ය.

ඒකාබද්ධ විපක්ෂයේ නායකයෙකු වන ජාතික සමගි පෙරමුණේ මහ ලේකම් අසාත් සාලි මහතා ත්‍රස්තවාදය වැළැක්වීමේ පනත යටතේ ත්‍රස්තවාදියෙකු ලෙස සලකා ඉතාමත් අසාධාරණ ලෙස අත් අඩංගුවට ගැනීම විපක්ෂයේ බලවත් දෝෂ දර්ෂණයට මෙන්ම දැඩි විරෝධයට ලක්වී තිබේ. මේ පිළිබඳව ජාත්‍යන්තර අවධානය පවා යොමුවී තිබීම විශේෂ කරුණකි.

අසාද් සාලි මහතා ත්‍රස්තවාදය වැළැක්වීමේ පනත යටතේ අත් අඩංගුවට ගැනීම සම්පූර්ණයෙන්ම වැරදි බවත් ඔහු ත්‍රස්තවාදී ක්‍රියාවකට වැරදි කාරයෙක් නොවන බවත් පාර්ලිමේන්තුවේ විපක්ෂ සංවිධායක ජෝන් අමරතුංග මහතා අද පැවැති ඒකාබද්ධ විපක්ෂයේ මාධ්‍ය හමුවකදී පැවසීය. මෙම පනත යටතේ අත් අඩංගුවට ගැනීමට ප්‍රතිපාදන නොමැති බවද අමරතුංග මහතා කීය. ආන්ඩුව විසින් ම්ලේච්ඡ ලෙස අසාද් සාලි මහතා අත් අඩංගුවට ගැනීම හේතුවෙන් මෙම විශේෂ මාධ්‍ය හමුව පැවැත්වීය.

එහිදී කතා කළ ආාචර්ය වික්‍රමබාහු මහතා කීවේ ත්‍රස්තවාදය වැළැක්වීමේ පනත ගෙන ආ අවස්ථාවේ තමන් පළමුවෙන්ම අත් අඩංගුවට ගත් අයෙක් බවත් එම පනත ඕනෑම ආකාරයකට අර්ථ ගන්වා ඕනෑම කෙනෙක් අත් අඩංගුවට ගත හැකි බවත් පැවසීය. වැඩ වර්ජනයක් කළත් ත්‍රස්තවාදය යටතේ අත් අඩංගුවට ගත හැකි යයිද ඔහු පැවසීය.

ත්‍රස්තවාදය වැළැක්වීමේ පනත යටතේ අත් අඩංගුවට ගත යුතු දඬුවම් කළ යුතු කුමරන් පද්මනාදන් හෙවත් කේපී අද රජ මැදූරු වල සුර සැප විඳිද්දී අසාත් සාලි අත් අඩංගුවට ගෙන ඇතැයි කී හේමකුමාර නානායක්කාර මහතා අසාධාරණයට විරුද්ධව කතා කළ අසාද් සාලිව අත් අඩංගුවට ගැනීමෙන් ආණ්ඩුව අමතක නොවන පාඩමක් ඉගෙන ගන්නා බවට අනතුරු ඇඟවීය.

පසුගිය 24 වැනි දා අවසන් වරට පැවැත්වූ ඒකාබද්ධ විපක්ෂයේ මාධ්‍ය හමුවේදීද අසාද් සාලි මහතා දැඩි ලෙස ආරක්ෂක ලේකම් ගෝඨාභය රාජපක්ෂ මහතාව විවේචනය කළ නිසා උරණ වූ ගෝඨා අසාද් සාලිට පාඩමක් උගැන්වීමට මෙලෙස අත් අඩංගුවට ගත් බව බොහෝ දෙනාගේ මතය වී ඇත.  

“කූරගලට ගිහිල්ලා ගෝඨා හෙලිකොප්ටර් එකෙන් බැහැල අරක කඩන්න මේක කඩන්න කියල පුරා විද්‍යා එකට අණ දෙනව. එයාට මොකක්ද ඇති බලය. එතන නාගරික සංවර්ධනයට අහුවෙනවද? නෑ. කූරගල දේවස්ථානෙ කැඩුව දාට තමයි පාඩමක් ඉගෙන ගන්නෙ. ආණ්ඩුව දින 40 න් වට්ටනවා. පුළුවන්නම් ගෝඨා කරල බලන්නයි 24 දා අසාද් සාලි මහතා ගෝඨාභය රාජපක්ෂ මහතාගේ බලයට අභියෝග කෙළේය. වැඩි දූරටත් අදහස් දක්වමින් අසාද් සාලි මහතා මෙසේද කීය.

“ආරක්ෂක ලේකම් යනව දයා මාස්ටර්ට අඬගහන්නෙ ඡන්දෙට එන්න. ඒ ගොල්ලො කොටි නෙමෙයිද? මං අහනව රාවණාගෙන් බොදූ බලෙන් ඒ කොටි නෙමෙයි ද? කියල. කොටි ගෙනල්ල නියෝජ්‍ය සභාපති කම් දෙනව. දයා මාස්ටර්ට චන්දෙට අඬගහනව. තව ටික දවසකින් දයා මාස්ටර්ගෙ ගෑණිවත් ගෙනෙයි. මේව කරන්න ගෝඨා ට තියෙන අයිතිය මොකක්ද? එයා නිකම් අමාත්‍යාංශයක ලේකම් කෙනෙක් විතරයි. අමාත්‍යාංශ ලේකම් කෙනෙක් දේශපාලනය කරන්නෙ කොහොමද? රැස්වීම් වල කතාකරනවා. මැතිවරණ කැම්පේන් කරනවා. සන්ධානෙ මහ ලේකම්ගෙ වැඩෙත් කරනවා. කවුද මෙයාට මෙහෙම බලයක් දූන්නෙ? පාර්ලිමේන්තුව ප්‍රශ්න කරන්නෙත් නෑ. ගෝඨාභයට විරුද්ධව කතා කරන්නට බොහෝ වීරයන් බිය වන අවස්ථාවක අසාද් සාලි මහතා බිය නැතිව කතා කෙළේ එලෙසය.

සිරගත කර තිබෙන අසාත් සාලි මහතා අත්අඩංගුවට ගෙන ඇති කාරණය පැහැදිලිය. අපි අසන්නේ පසුගිය කාලවකවානුව තුල රටපුරා ආගමික ත්‍රස්තවාදය වැපිරූ අය ඉතාමත් යහතින් සිටිද්දී එයට එරෙහි වු අසාත් සාලි මහතා අත්අඩංගුවට ගැනීම කැකිල්ලේ තීරණයක් නොවන්නේද? ඔවුන්ට අවශ්‍ය දේ කරගෙන ඇත. ඒ අසාත් සාලි නිහඩ කරවීමයි. දැන් අසාත් සාලි මහතාට දින 90 කට මාධ්‍ය හමුවට පැමිණිය නොහැක. මේ සම්බන්ධව අප නිහඩව සිටිනවා නම් ආන්ඩුවේ අරමුණ ඉටුවේ. ඒ නිසා රටට ආදරය කරන සියළුම දෙනා දැන් එක්සත් විය යුතුය. දුෂිත රාජපක්ෂ ආන්ඩුව ගෙදර යවා නීතිය හා සාමය රක්ෂා කරන රජයක් ගොඩනැංවීම සදහා පෙලගැසිය යුතුය. 

අසාත් සාලි

පසුගිය කාලය තුල රාජපක්ෂ රජය සහ එහි අනුබලයෙන් ක්‍රියාත්මක වන ආගම්බේධකාරී කල්ලි කන්ඩායම් විසින් ලංකාවේ ආගමික සහජීවනය බිඳ දැමීමට උත්සාහ දරන අවස්ථාවේ එයට එරෙහිව අභීත ලෙස හඬ නැගුවන් අතර අසාත් සාලි මහතාද ප්‍රමුඛ අයෙකි. අසාත් සාලි මහතා ඒ වන විටත් ආන්ඩුවෙන් ඉවත්ව කටයුතු කළ නිසා විපක්ෂ ක්‍රියාකාරීයෙක් නිසා මෙය සාධාරණීකරණය කිරීමට බොහෝ දෙනෙකු උත්සාහ දරන ලදී.

නමුත් මා වැනි මධ්‍යස්ථව කටයුතු කරන අය පවා ආන්ඩු විරෝධී ස්ථාවරයකට පත්වුයේ ජනපති සොයුරු ගෝඨාභය රාජපක්ෂ සෘජුවම මෙම අන්තවාදී කල්ලි කන්ඩායම් ඇසුරු කිරීම නිසා සහ ලංකාව තුල ආගමික සහජීවනය සම්පුර්ණයෙන්ම අනතුරේ හෙළු ගලගොඩඅත්තේ ඥානසාර චීවරධාරියාට විරුද්ධව නීතිය කිසිදු අයුරකින් ක්‍රියාත්මක නොවන බව පෙනීයාම නිසයි. තවදුරටත් හිතට එකඟව රජය විසින් ගෙනයන මේ ක්‍රියාවන් ජනතාවට හෙලි නොකර සිටිය නොහැකි නිසා වෙබ් අඩවිය තුල රජයද විවේචනය කිරීම ආරම්භ විය. මෙහි ප්‍රථිඵලය වුයේ ලංකාවේ ජනප්‍රියම බ්ලොග් අඩවිය වශයෙන් කිරුළු දැරූ අප අඩවිය ලංකාව තුල අවහිර වීමයි.

දැන් ආන්ඩුව විසින් කෙසේ හෝ අසාත් සාලි මහතාව නිහඬ කිරීමේ මෙහෙයුම අරඹා ඇත. රජයට අවශ්‍ය ඔවුන්ගේ අන්තනෝමතික ක්‍රියාවන් හෙළිකරන සියළුම දෙනා නිහඬ කිරීමයි. ඔවුන් ඒ සඳහා ගන්නේ ඔවුන් විසින් අතීතයේදී ඔවුන්ගේ විරුද්ධ කාරයන්ට කළ ක්‍රියා පිළිවෙතමයි. රජයේ උදහසට ලක්වු කෙනෙකු එක්කෝ එය දැනුණු වහාම විදෙස් රටකට පලා යා යුතුය. නැතිනම් රජය මගින් කුමණ හෝ නඩුවක් පටලවා අත්අඩංගුවට ගැනීම සිදුකරයි. මෙහිදී කිසියම් කෙනෙකු අත්අඩංගුවට පත්වු පසු සිදුවන්නේ ඔහුගේ වටා සිටි සියළුම දෙනා තමන්ටද අනතුරක් සිදුවේ යැයි භීතියට පත් වීමයි. මෙමගින් රජයට එරෙහි සටන් කරුවා හුදකලා වීම ඇරඹේ. ඉන්පසුව ඔහුට කරන්නට සිදුවන්නේ හුදකලා අරගලයකි.

ඊයේ අසාත් සාලි මහතා අත්අඩංගුවට පත්වු පසුද මා දුටුයේ මෙවැනි අවස්ථාවකි. මා ලංකාවේ වගකිවයුතු මුස්ලිම් නායකයන් කිහිප දෙනෙකු ඇමතුවෙමි. ඔවුන් මෙම අවස්ථාවේ කටයුතු කරන්නේ ඇඟ බේරාගෙන යැයි මට පසක් විය. කිසිවෙකු ඉදිරියට විත් අසාත් සාලි අත්අඩංගුවට ගැනීමට විරෝධය පලකරතියි බලාපොරොත්තු විය නොහැකි බව මට පසක් විය. ඇත්තටම මාද මෙවැනි අනතුරුදායක තත්වයකට පත්වන්නට ගියමුත් නුවණ මෙහෙයවා කලින්ම අනතුරක සේයාව එන විට ආරක්ෂිත පියවර ගත් නිසා අද මෙසේ සිටීමට හැකි වීම ගැන අල්ලාහ්ට තුති පිදුවෙමි.

නමුත් අනාරක්ෂිත බව අද අප හැමෝම වෙලා ඇත. අද අප අසාත් සාලිව හුදකලා කරන්නේ නම් හෙට අපටද හුදකලා වීමට සිදුවනු ඇත. මේ නිසා මා ඉල්ලා සිටින්නේ කරුණාකර සියළුම පක්ෂ බේධ අමතක කර අසාධාරණ ලෙස අත්අඩංගුවට පත්වු අසාත් සාලි මහතා බේරා ගැනීමට සැවොම එක්සත් වන ලෙසයි. නැතිනම් අද අසාත් සාලි! හෙට මම සහ ඔබ විය හැක.

අසාත් සාලි

කොළඹ හිටපු නියෝජ්‍ය නගරාධිපතිවරයෙකු සහ ජාතික සමගි පෙරමුණේ නායක අසාද් සාලි මහතා පොලිසිය විසින් අද (2013 මැයි 02) උදෑසන අපරාධ පරීක්ෂණ දෙපාර්තමේන්තුව එනම් සී.අයි.ඩී විසින් අත්අඩංගුවට ගනු ලැබ ඇත. තමන්ව ආන්ඩුව විසින් අත්අඩංගුවට ගැනීමේ උත්සාහයක් පවතින බවත් තමන් සැඟව සිටින බවත් මීට පෙර ප්‍රකාශ කර තිබුණි.  

මේ සම්බන්ධව පොලිස් මාධ්‍ය ප්‍රකාශක, පොලිස් අධිකාරී බුද්ධික සිරිවර්ධන මහතා සඳහන් කර ඇත්තේ, අපරාධ පරීක්ෂණ දෙපාර්තමේන්තුවට ලැබුණු පැමිණිලි කිහිපයක් මත ‍අසාත් සාලි මහතා අත්අඩංගුවට ගත් බවයි. කොලොන්නාව ප්‍රදේශයේ පිහිටි ඔහුගේ නිවසේදී අද උදෑසන ඔහු අත්අඩංගුවට ගෙන ඇති බව පොලිස් මාධ්‍ය ප්‍රකාශකවරයා තහවුරු කළේය.

අපරාධ පරීක්ෂන දෙපාර්තමේන්තුවට ලැබුණු පැමිණිලි කිහිපයක් නිසා අත්අඩංගුවට ගත් බවක් පැවසුනද ආන්ඩුව අසාත් සාලි මහතාව අත්අඩංගුවට ගන්නේ අන් කවරකටවත් නොව ඔහු නිර්භයව රාජපක්ෂ පාලනය විවේචනය කිරීම සහ රජයට සම්බන්ධ ආගම්බේධකාරීන්වද දැඩිලෙස විවේචනය කිරීම නිසා බව ජනතාව මේ වන විටත් දැනගෙන හමාරය. ආන්ඩුව විවේචනය කරන්නන් මෙලෙස මර්ධනයට ලක්කරන්නේ ඔවුන් විසින් කරන්නාවු විවේචන වලින් ආන්ඩුවට දැඩිලෙස පහර වැදී රිදීම නිසා බව පැහැදිලිය.  

කෙසේ වුවද ආන්ඩුව සිතන්නේ තමන්ට එරෙහි වන්නන් මර්ධනය කර ජනතාවට බොරු හොඳ මුහුණක් පෙන්වමින් හැමදාම ජයගත හැකි වනු ඇති බවයි. ලංකාවේ මුස්ලිම් ජනතාවගෙන් බහුතරය මේ වන විටත් රජය විසින් ගෙනයන කූඨ වැඩපිළිවෙල ගැන දැනුවත් වී හමාරයි. අසාත් සාලි මහතා අත්අඩංගුවට ගැනීමෙන් සිදුවන්නේ එය තවදුරටත් මස්තකප්‍රාප්ත වීමයි. වෙනත් වචන වලින් කියනවා නම් අසාත් සාලි දෙස ජනතා ඉල්ලුම වැඩි වීමයි.

නමුත් සිංහල ජනතාවගෙන් බහුතරය වෙත මෙම පණිවිඩය ගෙනයාමට විපක්ෂය තවම අපොහොසත් වී ඇති සෙයකි. ආන්ඩුව සිතන්නේ විපක්ෂය අකර්මන්‍ය නිසා තමන් හැමදාම කරන පිස්සුව ඉදිරියටත් කරගෙන යාමට හැකි වනු ඇති බවයි. පවතින විපක්ෂය තවදුරටත් නිදිවදිමින් සිටින්නේ නම් ජනතා රැල්ලකින් නව විපක්ෂ සංධානයක් නිර්මාණය වීම වැඩි ඈතක නොවන බව මගේ අදහසයි.   

ඇම්නෙස්ටි

ශ්‍රී ලංකා රජය විවේචනය කරන්නන්ට එරහිව රජයෙන් තර්ජන සහ පීඩන ඇති බවට ඇම්නෙස්ටි (Amnesty International ) වාර්තාවකින් අනාවරණය වේ. “රජය විවේචනයට එරහිව අඩම්තේට්ටම්” ලෙසින් එළිදැක්වූ මෙම වාර්තාව පිටු 78කින් සමන්විත වේ. එය මෙතනින්ලබා ගත හැක.

ක්‍රමානුකූලව සිදුකෙරෙන මානව හිමිකම් උල්ලංඝනය නවත්වන්නේ නැතිනම්, ඉදිරි නොවැම්බරයේ පැවැත්වීමට නියම කර ඇති පොදු රාජ්‍ය සමුළුව (Common wealth Heads of Government Meeting -CHOGM) ලංකාවේ නොපැවැත්විය යුතු බව ඇම්නෙස්ටි සංවිධානය පවසයි. තාඩන පීඩන වලට ලක්වන්නන් අතර මාධ්‍යවේදීන්, විනිසුරුවන්, මානව හිමිකම් වේදීන් සහ විරුද්ධ පක්ෂයේ දේශපාලකයන් සිටින බවත්, එම තාඩන පීඩන සිදුවන්නේ රාජ්‍ය අනුග්‍රහය ඇතිව බව ඇම්නෙස්ටි පවසයි.

පොදු රාජ්‍ය සමුළුව කොළඹදී පැවැත්වීමට නියමිත වන අතර ඉන් අනතුරුව පොදු රාජ්‍ය මණ්ඩලයේ මූලාසනය ලංකාවට හිමිවීම, පවතින වාතාවරණය යටතේ නුසුදුසු බව ඇම්නෙස්ටි පවසයි. ඇම්නෙස්ටි සංවිධානයේ ආසියා-ශාන්තිකරයේ අධ්‍යක්ෂක පොලී ට්‍රස්කොට් (Polly Truscott ) මෙසේ පවසයි:

“ලංකාවේ දේශපාලන බලය ස්ථාපනය කිරීම සහ රජයට විරුද්ධ හඬ මැඩලීම එකට සිදුවේ.”

“ඇත්තටම භීෂණ යුගයක් පවතින අතර, රජයට එරෙහිව හඬ නගන්නට තරම් එඩිතර වන්නන්ට බොහෝ විට විඳවීමට සිදුවේ.”

“ක්‍රමවත් ලෙස මානව හිමිකම් උල්ලංඝනය වීම රජය විසින් නතර කරන්නේ නැතිනම් කොළඹදී පැවැත්වීමට නියමිත පොදු රාජ්‍ය සමුළුව නතර කල යුතුයි. පුද්ගලයන්ට එරෙහිව තාඩන පීඩන ප්‍රහාර වහාම නවත්වා ඒ ගැන විධිමත් පරීක්ෂණ ආරම්භ කල යුතුයි.”

රජයට එරහිව හඬ නගන්නන්ට එරහිව තාඩන පීඩන, පහරදීම් සහ ඇතැම් විට මරණයට පත් කිරීමද ඇති බව අදාළ වාර්තාවෙ සඳහන් වේ. වැඩි දුර කියවීම ඇම්නෙස්ටි වෙබ් අඩවියෙන්.

Mr. Who

මෙත පාන්නෝ

(බොදු බල සේනාවට එරෙහිව හැව්ලොක් පාරේ පැවති පළමු විරෝධතාව අවලංගු කිරීම කෙරෙහි පෞද්ගලිකව දක්වන ප‍්‍රතිචාරයකි) එදා හැන්දෑවේ (2013 අපේ‍්‍රල් 12 වන සිකුරාදා) ලෝරිස් පාරට යාබද සම්බුද්ධත්ව ජයන්ති ගොඩනැගිල්ල ඉදිරිපිට හැව්ලොක් පාරේ දී ප.ව. 7.15ට පමණ මට යළි වතාවක් මතක් කරන ලද්දේ අප රට තුළ කිසි ම නිදහසක් නැති බව යි. දැන් වසර 45ක් පමණ වයසැති මට, 30 වසරක දිගු කාලයක් තිස්සේ නානාවිධ ආකාරයෙන් විවිධ අවධිවල නොයෙක් තැන්වල දී යළි යළිත් මතක් කර දී ඇත්තේ ශ‍්‍රී ලංකාවේ පුරවැසියන් උගුලක සිරව සිටින බව යි.

අපගේ භීතිය, අපගේ නොඉවසීම, අපගේ නොදැනුම, බලයේ සිටින බලවතුන් කෙරෙහි හෝ සුරක්ෂිතව එහි මෙහි යාම සහ සුරක්ෂිතව ජීවත් වීම සඳහා අපට ම තිබෙන දැඩි අවශ්‍යතාව කෙරෙහි ඇති බැටළුවෙකුට සමාන අපගේ කීකරුකම නිසා සිරව සිටි අපි දැනුදු එම උගුලෙහි සිරව සිටිමු – ඇත්තට ම නම් තව තවත් සිර වෙමින් සිටිමු.

මම නීතිඥයෙක්, මාධ්‍යවේදියෙක්, ශාස්ත‍්‍රඥයෙක් හෝ ක‍්‍රියාකාරිකයෙක් නො වෙමි. අප ආරක්ෂා කරනු පිණිස අප ම බල ගැන්වූ හමුදාවල් කරන බිය ගැන්වීම් නිසා හිරිහැරයට පත්ව සිටින මම හුදු සාමාන්‍ය පුරවැසියෙක්මි. අපගේ දුර දිග නොබලන, ඥාති සංග‍්‍රහකාර ආණ්ඩු, අපගේ දූෂිත දේශපාලනඥයන්, අපගේ උද්ධච්ච නීතිය බලාත්මක කරන නිලධාරීන්, අපගේ අන්තවාදී ආගමික නායකයන් සහ අපගේ නොදැනුමෙන් යුතු, සෑහීමට පත් පුරවැසියන් නිසා මම හෙම්බත්ව සිටිමි. මම පැහැදිලිව ම වෙහෙසට පත්ව සිටිමි.

එදා හැන්දෑවේ මා මගේ සැමියා සහ දරු දෙදෙනා සමග හැව්ලොක් පාරට ගියේ, අප රටේ අඳුර තුළ සංකේතාත්මකව ඉටි පහනක් දල්වා, ඒ මොහොතෙහි සම්බුද්ධත්ව ජයන්ති ගොඩනැගිල්ල තුළ සිය මූලස්ථානයෙහි රැස්වීමක් පවත්වමින් සිටි දැන් කුප‍්‍රසිද්ධ බොදු බල සේනාවේ අන්තවාදී දේශපාලනයට නිහඬ විරෝධතාවකින් විරෝධය පෑමට පැමිණි බොහෝ දෙනා හා එකතුව සිටි මගේ සොහොයුරිය, ඇගේ සැමියා සහ මිතුරන් කිහිප දෙනෙකු සමග එක් වීමට ය.

අප අත තිබූ ඉටි පහන් විසි කරන ලෙස ගෝරනාඩු කරමින්, අප වහා අවනතව විසිර නොගියොත් අත් අඩංගුවට ගන්නෙමැයි තර්ජනය කරමින් අප එතැනින් ඉවත් කිරීමට අප පසුපස හඹා ආ චණ්ඩ පොලිස් භටයා නිසා මම මුළුමනින් ම පාහේ වික්ෂිප්ත වීමි! පාර එහා පැත්තේ භික්ෂූහු දෙදෙනෙක් කෑ ගසා පොලීසිය පොලඹමින් සිටියහ. ඔවුන් සමග සිටි බව පෙනුණු මැරයෝ කිහිප දෙනෙක් අසභ්‍ය ලෙස අප සියල්ලන් දෙසට මොර දෙමින් සහ ඉඟි කරමින් සිටියහ. අපි මවිත වීමු. අපි පොලීසිය සහ භික්ෂූන් අපේක්ෂා කළ නමුත් වෛරය; ප‍්‍රචණ්ඩත්වය; එතරම් ම බිය සැක නැතිව බලය, තනතුර අයුතු ලෙස යොදා ගැනීම අපේක්ෂා නො කළෙමු. විනාඩියක් ගත වන්නටත් මත්තෙන් මගේ සොහොයුරියට ඒ වන විටත් පාර එහා පැත්තේ පිරවුම් හල අසල සිටි ඇගේ සැමියාගෙන් දුරකථන ඇමතුමක් ලැබිණ. සියත ඉටි පන්දමක් දරා ගෙන එහි සිටි හේතුවෙන් ඔහු අත් අඩංගුවට ගෙන තිබිණ! ඔහු ලෝරිස් පාරට පැමිණ සෙනගට එකතු වුණා පමණකි.

සිදු වෙමින් පැවති දෙය වටහා ගන්නටත් කලින් ඔහුට තවත් කිහිප දෙනෙකු සමග ජීප් රියට නැගීමට සිදු විය. කිසිවෙකු ඔහුට කන් නො දෙන්නට ඇත. ඔවුහු ඔහු බම්බලපිටිය පොලිස් ස්ථානයට රැගෙන ගියහ. පැයකට පසුව ඔහු මුදා හළ නමුත්, එය සිදු වූයේ මගේ මස්සිනා අත් අඩංගුවට ගැනීම පිළිබඳව මගේ සැමියා කතා කිරීමට ගිය පොලිස් භටයා මගේ සැමියාගේ තරමක් අවුල් සහගත නම වටහා ගත නොහැකිව මොහොතක් පොරොත්තු වී මුසල්මානුවෙකු වීම නිසා මුස්ලිම්කාරයෙක් යැයි ඔහුට චෝදනා කිරීමට කලින් නො වේ! එක් කලෙක දෙමළ ජාතිකයෙකු වීම සැලකිය යුතු තරමකට අනාරක්ෂිත විය, දැන් මුසල්මානුවෙකු වීම නිසා ය! නිහඬ විරෝධතාව සඳහා කල් තියා පැමිණ සිටි අනෙක් අය ඒ වන විටත් තර්ජනය කොට විසුරුවා හැර තිබුණහ, කිහිප දෙනෙක් අත් අඩංගුවට ගෙන පසුව මුදා හැර තිබුණහ. මම ඉමහත් සන්තාපයට පත්ව සිටිමි, කෝපයට පත්ව සිටිමි, සියල්ලටත් වඩා වෙහෙසට පත්ව සිටිමි. මගේ ආදරණීය පුරවැසි සගයනි, ඔබ දැනට මත් මෙය වටහා ගෙන නැත් නම් මට පවසන්න ඉඩ දෙන්න, අප රට තුළ ප‍්‍රජාතන්ත‍්‍රවාදය මිය ගොසිණි.

වයස 10ක පමණ සහ වයස 15ක පමණ මගේ දරු දෙදෙනා ද මා සමග උන්හ. ඒ අසල ජීවත් වන අපි ඉටි පන්දම් දල්වා සාමය පතා නිහඬ විරෝධතාවක් පවත්වන ඒ මනරම් සැඳෑව නිරුපද්‍රිත යැයි සිතුවෙමු. අප වැරදි විය. මා පුතු භීතියට පත් විය. මා ගැටවර දියණිය භ‍්‍රාන්ත විය. අප වෙන රටකට සංක‍්‍රමණය විය යුතු දැයි ඔවුහු ඇසූහ! 1983 දී මා 15 වන වියෙහි පසු වූවා මට මතක ය. වසරක් ගත වුණු තැන මා හාත්පස සිටි සියල්ලෝ ම කැනඩාවට හෝ අන් තැනකට සංක‍්‍රමණය වූහ. අපි නො ගියෙමු. මේ අපේ රට බවත්, අප පලවා හැරිය නොහැකි බවත්, පලවා හරිනු නැති බවත් මගේ තාත්තා කී ය. ගිලෙන නැවක් අත් හැර යන්නේ මීයන් පමණකි යි ඔහු කී ය. ඔහු අදහස් කළේ කැරලිවල බලපෑමට ලක්ව සිටි අය නො ව, වඩා හරිත පැහැ තණ බිම් සොයනු පිණිස ඒ මොහොත තම වාසියට යොදා ගත් අය ගැන පමණකි. තම තක්සේරුවේ දී ඔහු බෙහෙවින් නිර්දය වුණා වැඩි යැයි මම සිතුවෙමි.

ඔහු එසේ වී යැයි මම දැනුදු සිතමි. අපි වාසනාවන්ත වීමු; අපගේ සිංහල අසල්වැසියෝ අප ආරක්ෂා කළහ, අප පුළුස්සා දැමීම වැළැක්වූහ. ඒත් අනෙක් අය එතරම් පින්වත් නොවූහ. භීතිය හැම තැන ම විය. තමන් අවතැන්ව ඇති බවක්, තම දේපොළ ඉඩකඩම් පැහැර ගෙන ඇති බවක් බොහෝ දෙනාට හැඟිණ. ඔවුහු විමසා බැලූහ: තමන් ශ‍්‍රී ලාංකිකයන් ද?, තමන් ශ‍්‍රී ලංකාවට අයත් ද? ඉතින් ඔවුහු පිටව ගියහ. කාට නම් ඔවුන්ට දොස් කිව හැකි ද? එහෙත් මට මගේ පියාගේ වචන කිසි දා අමතකව නැත. ඔහු අදහස් කළේ කුමක් දැයි මම වටහා ගතිමි. ඔහු අදහස් කළේ, ගමන් මග අසීරු වන විට පලා නො ගොස් රැඳී සිට වෑයම් කරන්න යන්න යි. ඔහු අදහස් කළේ මේ රටට දීමට ප‍්‍රගතිය සහ සමෘද්ධිය කරා යා හැකි මගක් සොයා ගන්න යන්න යි. ඔහු අදහස් කළේ ශ‍්‍රී ලාංකිකයෙකු වීම ගැන ආඩම්බර වන්න යන්න යි: එනම්, මේ සියල්ල තිබිය දීත්, අප යහපත් සහ සමත් මිනිසුන් ය යන්න යි.

ඒත් තාත්තේ, ඔබ යන්තම් වත් නිවැරදි වී දැයි අද මම සිතා බැලූවෙමි. යුද්ධය අවසන් ය. මා නොපිළිගත්ත ද අවසානයෙන් ක‍්‍රියා මාර්ග යුක්ති සහගත විය, එය අවසන් වීම ගැන මම සතුටු වෙමි. මට සුරක්ෂිත බවක් දැනේ. මා අවදි වන්නේ අද මගේ දරුවන් පාසල ඇරී ගෙදර ඒ දෝ යි දෙගිඩියාවකින් නො වේ. මෝටර් රථයක පිටකුරුවෙන් නගින පිපිරුම් හඬක් හෝ රතිඤ්ඤාවක් පුපුරන හඬක් අසා ‘මගෙ දෙයියනේ, තවත් බෝම්බයක්!’ යැයි මම නො සිතමි. ඔව්, මා එසේ නොසිතන තරම් ය. අපගේ ජීවිතවලින් වැඩි කාලයක් සටනින් කැළැල් වුණු රටක ගත කර ඇති අපි සාමයට ඇබ්බැහි වෙමින් සිටිමු.

එනමුත් අප හාත්පස හැම තැන ම සාමයේ ලකුණු වෙයි, නොහොත් අපට එසේ කියනු ලබයි. මාර්ග ඉදි වෙයි, නව වරායවල් සහ ගුවන් තොටවල්, ක‍්‍රිකට් ක‍්‍රීඩාංගන, සාප්පු සංකීර්ණ, කර්මාන්ත ශාලා ඉදි වෙයි! උතුරේ තිබෙන ඉඩම් කොල්ලය සහ නිවාස අහිමිකම ගණන් ගන්න එපා; දකුණේ සිටින අකීකරු වල් සතුන් ඈත් කර තැබීමට දිය වළවල් පිරවීම ගණන් ගන්න එපා. ක‍්‍රීඩා දේශපාලනීකරණය වීම; ඇමතිවරුන්ගේ පුතුන් නිසා විටින් විට ඇති වන සුළු ඇන කොටා ගැනීම්, පක්ෂග‍්‍රාහී, රාජ්‍ය පාලිත මාධ්‍යය සහ අධිකරණ සංහතිය අමතක කර දමන්න; ජීවන වියදම, පෙට‍්‍රල් මිල ගණන්, විදුලි ගාස්තු, ප‍්‍රජා විරෝධතා මධ්‍යයේ පොලීසියේ ආරක්ෂාව යටතේ බලාත්කාරයෙන් පුරවන කසළ ගොඩවල් නිසා ඇති වන ලෙඩරෝග; රට තුළ පවතින නොපනත්කමේ සාක්ෂියක් වන ස්ත‍්‍රී දූෂණය සහ අපයෝජනය විශ්වාස නොකළැකි තරමට ඉහළ යාම අමතක කර දමන්න. ඒ සියල්ල අමතක කර දමන්න. යුද්ධය අවසන් ය. අපි අපගේ ආණ්ඩුවට මොන ම දෙයකට වුව සමාව දෙන්නෙමු.

මුසල්මානුවන්ට අඩන්තේට්ටම් කිරීමට? ඔව් ඇත්තට ම ඔවුන් වඩා පරිස්සම් සහගත විය යුතු ය. ඒ එසේ වුවත් ඇත්තට ම ඔවුන්ට මේ රටට ඇති අයිතිය එය ද? පොලීසියෙන් බිය ගැන්වීම? අයිසෙ ඒ ගොල්ල කරන්නෙ එයාලගෙ රාජකාරිය! එයාල බලාත්කාරයෙන් හරි සාමය ආරක්ෂා කරන්න ඕන! එතකොට බොදු බල සේනාව? අහෝ, අහිංසක භික්ෂූන් වහන්සේලා නොවැ. එයාල ගැන තකන්න එපා. මේ හැම දේ ම මාධ්‍යයේ අතිශයෝක්ති විතර යි! එතකොට රාජ්‍යයේ අනුග‍්‍රහය ලබන ප‍්‍රචණ්ඩත්වය? ඉතා ම වැරදි හැඟීමක්! එයාල අප ත‍්‍රස්තවාදීන්ගෙන් මුදා ගත්තා මතක නැද්ද? එයාලට කාලය දෙන්න. එයාල අප පෙරට ගෙන යන හැටි බලා ඉන්න. එයාලට… කාලය විතරක් දෙන්න.

අපි බැටළුවෝ වෙමු. අපට නවසීලන්තය සමග ඇති පොදු දෙය කුමක් ද? එහි ද මිනිසුන්ට වැඩියෙන් බැටළුවෝ සිටිති! එහෙත් අද විරෝධය පෑමට මිනිස්සු පැමිණියහ. බොහෝ දෙනෙකු නාවත් අපි පැමිණියෙමු. අපි චණ්ඩ ලෙස විසුරුවා හරින ලදිමු. කමක් නැහැ. රාජ්‍ය පාලිත හමුදාවලින් බොදු බල සේනාවට සහාය ලැබෙන සැටි අපි ඇස් පනා පිට ම දැක ගත්තෙමු. අපි සත්‍යය දුටුවෙමු. අහෝ, අපි එය මුල සිට ම දැන සිටියෙමු. එහෙත් අද එය ප‍්‍රතික්ෂේප කළ නොහැකි ය. අප ආණ්ඩුව සිටිනුයේ භීෂණයට මුවා වී ගෙන ය. එය සිටිනුයේ අන්තවාදී බෞද්ධ දේශමාමකත්වයට මුවා වී ගෙන ය. අප ජනතාව බියෙන් අළලා තබා ගැනීමට, මිලිටරිය පෙනී සිටීම යුක්ති සහගත කිරීමට ඊට තවත් හේතුවක් අවශ්‍ය ය. ඒකාධිපතිත්වයන් ගොඩ නැගෙන්නේ එලෙසිනි.

‘ප‍්‍රජාතන්ත‍්‍රවාදයක් යනු කිමැ’යි වරක් ගුරුවරයෙකු තම සිසුන්ගෙන් විමසූ විට‘ප‍්‍රජාතන්ත‍්‍රවාදයක් යනු අපගේ ම ඒකාධිපතියන් තෝරා ගැනීමට තිබෙන නිදහසැ’යි ඔවුන් පිළිතුරු දුන් බවට කතාවක් ඇත. සත්තකින් ම අප කර තිබෙන්නේ එය යි. ඒත්‘ඔබට ඇතැම් ජනයා සදහට ම මුළා කළ හැකි ය, සියලූ ජනයා යම් කලකට මුළා කළ හැකි ය, එහෙත් ඔබට සියලූ ජනයා සදහට ම මුළා කළ නොහැකි යැ’යි කී එකා කවුරු ද. අහා, ඔව්, ඒබ‍්‍රහම් ලින්කන් ය. මේ අනුව බැටළුවා තවත් නැත! අප අතර යහපත් සහ සමත් මිනිස්සු සිටිති. එනිසා බිය නොවන්න. මේ විදියට බැලූවා ම සමහර විට ඔයා හරි තාත්තේ. අද ජනයා පැමිණියහ. ඒ ජනයා රැඳී සිට වෑයම් කරනු ඇත. පොලීසිය සහ භික්ෂූහු වරදක් කළහ. සියලූ දෙනා හැම විට ම බිය නොවන බව ඔවුහු අමතක කළහ. ඇතැම් විට චණ්ඩ භාවය විරෝධතා ගින්න අවුළුවයි. එය එසේ වේවා. සාමාන්‍ය, සැම දා පුරවැසියන් වන අපගෙන් තව තවත් අය නැගී සිට විරෝධය පාත්වා. අපගේ අතීතය අමතක කරන්න? අපගේ ආණ්ඩුවලට සමාව දෙන්න? එයාලට කාලය දෙන්න? එවැනි ලේ වැකි මගකට නම් ඉඩක් නැත!

SCT – පුරවැසියෙකි

මුස්ලිම් කාන්තා වස්ත්‍රය

හෙළයාගේ උරුමය රකින්නට පාර්ලිමේන්තුවට වැඩි ස්වාමින් වහන්සේලා දැන් උරුමය සොයනු/රකිනු වෙනුවට රටේ සිටින සුළුතර ආගමිකයන්ට කරුමයක් වෙලා තිබෙන බව පැහැදිලිවම පෙනීයන කරුණකි. “යකෝ උරුමය හොයනවා කියන්නේ අනුන්ගේ ජාතියක රෙද්දවල් හොයන එක නෙමෙයි. ඉස්සෙල්ලා ජාතියට වෙලා තියෙන සංගෙදිය හොයා බලාපල්ලා” යැයි මොවුන්ට කියාදීමට තරම් කෙනෙකු නොමැති බවද පැහැදිලිවම පෙනීයන කරුණකි.

මේ ඇත්තන්ට ඉතිහාසය දන්නේ නැත. අතීතයේ මෙරට කුලහීන කාන්තාවට සිය උඩුකය වසන්නටවත් අවසර නොතිබුණි. නමුත් බටහිර පාලකයන් පැමිණි පසුව එය වෙනස් විය. සෑම දෙයක්ම යුරෝපීය කරණයට ලක්වු විට වස්ත්‍රද යුරෝපීය කරණයට ලක්විය. අද තිබෙන රාජ්‍ය සේවා නිලඇඳුම් වල තිබෙන්නේ යුරෝපීය ඌරුවයි. මේ කරුමක්කාරයන්ට එය නොතේරෙන්නේ මොලය උඩ වාඩි වී සිටින නිසාදැයි නොදනිමි. එකල ආරිය සිංහල ඇඳුම ඇඳ රජයේ සේවය කළ නොහැකි විය. එම නීතිරීති කඩා ආරිය සිංහල ඇඳුමට නිසිතැන ලබා ගැනීමට අපේ ආදි පියවරුන්ට වෙරදරන්නට සිදුවිය. එය මේ කරුමක්කාරයන්ට අමතක වී ඇති සෙයකි. මුස්ලිම් තොප්පිය පැලඳ අධිකරණයට ගිය සිත්ති ලෙබ්බේ මහතා කෙසේ හෝ එම අයිතිය අත්පත් කරගන්නා ලදී. ඔවුන් උරුමය සඳහා පක්ෂ නොසෑදු නමුත් තමුන්ගේ උරුමය කුමක්දැයි නිසිලෙස වටහා ගෙන තිබුණි. අනගාරික ධර්මපාල තුමා ආරිය සිංහල කාන්තාවන්ට ඔසරිය හඳින ලෙස සිය දේශනා තුලින් පවසන ලදී. අනේ ඇත්තට මේ ඇත්තන්ට ඒ රෙද්දත් අමතක වී ඇති සෙයකි.

මුස්ලිම් කාන්තාව කරන්නේ කිසියම් නිළඇඳුමක ඉස්ලාමය විසින් වසාගන්නට නියම කර ඇති දේ විවරව තිබෙනවා නම් එය වසාගැනීමට වෙනත් පිළියම් යොදා ගැනීමයි. සෘජුවම පවසනවා නම් වස්ත්‍රය සංවර කර ගැනීමයි. මේ හිමියන්ට ඒවායින් වැඩක් නැති බව පෙනීයන කරුණකි. එහිමියන්ට අවශ්‍යව තිබෙන්නේ අනික් අය ඇරගෙන සිටින තැන් සියල්ල මුස්ලිම් කාන්තාවගේද අරවා ගන්නටයි. හික්කඩුවේ සිට ගල්කිස්ස දක්වා සුද්දියන් තනපටය සහ හිනපටය හැර අන්සියල්ල හැරපියා හෙළුවෙන් සිටියාට මෙහිමියන්ට ප්‍රශ්නයක් නැත. මා මෙසේ පවසන්නේ ඒ ගැන මෙහිමියන් මේතාක් මාධ්‍ය නිවේදනයක් නිකුත් කර නොමැති හෙයිනි. සමහර විට මෙහිමියන්ට අනුව එම තනපටය සහ හිනපටය වැල්ලේ නීත්‍යානුකූල වස්ත්‍රය එනම් නිළ ඇඳුම වන්නට පුළුවන.

අතුරලියේ රතන හිමියන් පාර්ලිමේන්තුවට පත්වුයේ සිංහල ජාතිය සහ ආගම වෙනුවන් යමක් කිරීමට බව අපි සියල්ලෝම දනිමු. මා අසන්නේ එහිමියන් පාර්ලිමේන්තුවට වැඩීමෙන් සිංහල ජාතියට සහ ආගමට අත්වු සෙත කුමක්ද? යන්නයි. රටට අත්වු සෙත කෙසේ වුවද අසපු මාලිගා තනමින් තමන්ට සෙත අත්පත් කරගෙන ඇති බව අප දනිමු. තමන් ආ කාරිය නොකරන අය පැවැත්ම රැක ගැනීමට අනුන්ගේ රෙද්දවල් සෙවීම සාමාන්‍ය දෙයකි. ජනතාව මේ වග අවබෝධ කරගෙන රටේ සාමය සහ සංහිඳියාව රැකගෙන මෙවැනි ආගම්බේධකාරී භික්ෂුන් වහන්සේලාටත් ආදර්ශයක් වන පරිදි ජීවත් වනු ඇතැයි අපි අපේක්ෂා කරමු.

අතුරලියේ රතන හිමි

ආගමේබේධකාරීන් විසින් පසුගිය කාලයේ මුස්ලිම් වරුන්ට එරෙහිව දියත් කළ අන්තනෝමතික ප්‍රකාශ වල අඩුවක් පසුගිය මාසය තුල දක්නට ලැබුණි. නමුත් ඒ නිහඬතාවය බිඳිමින් ඊයේ දිනයේ ජාතික හෙළ උරුමයේ පාර්ලිමේන්තු මංත්‍රී අතුරලියේ රතන හිමි විසින් මුස්ලිම් කාන්තා වස්ත්‍රයට එරෙහිව මාධ්‍ය නිවේදනයක් නිකුත් කර ඇත. පහත සඳහන් වන්නේ එම නිවේදනය වන අතර ඒ ගැන මා කිසිදු සටහනක් නොකර පාඨක ඔබේ ප්‍රතිචාර බලාපොරොත්තු වෙමි.

නිල ඇදුම් වෙනස්කර රටේ පොදු නීතියට පිටුපා ක්‍රියාකරන මුස්ලිම් කාන්තාවන්ට දඬුවම් කළ යුතු යයි ජාතික හෙළ උරුමයේ සභාපති, පාර්ලිමේන්තු මන්ත්‍රී පුජ්‍ය අතුරලියේ රතන හිමියන් පවසති.

මෙහි ඇති අනතුර තේරුම් ගෙන වහාම මේ පිළිබදව අවශ්‍ය නීත්‍යානුකූල පියවර ගතයුතු බවත්, සමාජ ඒකාබද්ධතාවයට, ජාතික ඒකාග්‍රතාවයට මෙම ප්‍රවණතාවය හානිකර බැවින් වගකිව යුත්තන්ගේ විශේෂ අවධානය යොමුකල යුතු බවත් උන්වහන්සේ කියා සිටිති.

එසේ නොවුවහොත් තමන්ගේ අනන්‍යතාවය කියාපෑමේ මුවාවෙන් එන මෙම සමාජ ඛෙදුම්වාදය සමස්ථ සමාජ දේහයම වෙලාගත් ගැටලූවක් බවට පත්වනු ඇති බවත්, එයට ප්‍රථම ගතයුතු පියවර ගැනීම රජයේ වගකීම බවත් රතන හිමියන් අවධාරණය කර සිටියි.

ජාතික හෙළ උරුමයේ සභාපති හිමියන් විසින් ඊයේ දින (2013 අප්‍රේල් 30) නිකුත්කර ඇති මාධ්‍ය නිවේදනයක එය සඳහන්වේ.

එම මාධ්‍ය නිවේදනයේ වැඩිදුරටත් මෙසේද සඳහන්වේ.

”කල්පිටිය රෝහල ඇතුළු පුත්තලම් දිස්ත්‍රික්කයේ රෝහල් ගණනාවක රෝහල් කණිෂ්ඨ කාර්ය මණ්ඩලය සැරසී සිටිය යුතු නිල ඇදුම වෙනුවට වෙනත් ඇදුමකින් සැරසී සිටින බව මාධ්‍ය මගින් වාර්තාකර ඇත.

මෙසේ වෙනත් ඇදුමකින් සැරසී සිටින්නේ මෙම රෝහල්වල මුස්ලිම් ජාතික කාන්තාවන්ය. එය ඔවුන්ගේ ජන වර්ගයේ අනන්‍යතාවය නියෝජනය වන ආකාරයට සකස්කරගත් ඇදුමක් බව වාර්තා වේ.

මේ තත්වය හේතුකොට ගෙන රෝහලේ කණිෂ්ඨ කාර්ය මණ්ඩලය සැරසී සිටිය යුතු නිල ඇදුමට පිටින් වෙනත් ඇදුමකින් සැරසී සිටීම නිසා ගැටුම්කාරී තත්වයක්, නොසන්සුන් තත්වයක් රෝහල් තුළ ඇතිවෙමින් තිඛෙන බවද දැනගන්නට ලැබී ඇත.

කල්පිටිය දිසා රෝහල, පුත්තලම මූලික රෝහල, මාම්පූරිය ග්‍රාමීය රෝහල සහ ආලන්කුඩා මධ්‍යම ඛෙහෙත් ශාලාව වැනි රෝහල් තුළ නියමිත නිල ඇදුමට පිටින් වෙනත් ඇදුමකින් සැරසී සිටින බවත්, එම ඇදුම පිටුපස මුස්ලිම් අන්තවාදී කණ්ඩායමකගේ බලපෑම තිඛෙන බවත්, එම රෝහල තුළ සේවකයන් ප්‍රකාශකර සිටී.

තත්වය එසේනම් එය ඉතාම භයානක පෙර නිමිති පෙන්වන පිළිකාවකි.

රෝහලක කණිෂ්ඨ කාර්ය මණ්ඩල සේවිකාවන් සැරසිය යුතු නිල ඇදුම කවර හෝ කණ්ඩායමකගේ බලපෑමට වෙනස් කරන්නේනම් එසේ කරන සේවිකාවන්ට එරෙහිව විනයානුකූලව කටයුතු කර නීතිය ක්‍රියාත්මක කිරීම විෂයභාර අමාත්‍යවරයාගේත්, ඊට වගකිවයුතු නිලධාරීන්ගේත්, බලධාරීන්ගේත් කාර්යයකි.

මෙය පැහැදිලිවම ආයතනික චක්‍රලේඛන සහ ආයතනික නීතිරීති උල්ලංඝණය කිරීමක් මෙන්ම රටේ නීති රීති අභියෝගයට ලක් කිරීමකි.

මේ සම්බන්ධයෙන් අදාල ස්ථානභාර වෛද්‍යවරුන් නිසි බලධාරීන් දැනුවත් කළමුත් තවමත් අවශ්‍ය පියවර නොගත්තේ මුස්ලිම් අන්තවාදී කණ්ඩායම්වලට ඇති බිය නිසාද? එසේ නැතිනම් මෙම ප්‍රදේශයේ ඇති මුස්ලිම් දේශපාලන අධිකාරියට ඇති බිය නිසාද? මුස්ලිම් අන්තවාදීන්ගේ ක්‍රියාකාරකම් දැඩි ලෙස සිදුවන මෙම ප්‍රදේශය තුළ ඉතා අවසනාවන්ත සිදු වීම් ගණනාවක් පසුගිය කාලය තුලද වාර්තා විය.

අමු අමුවේ සිංහල පොලිස් නිලධාරියෙක් මහදවල් කපා කොටා මරා දැමුවේද පුත්තලම් නගර මධ්‍යයේය. එමෙන්ම මත් කුඩු, මත් පෙති, හොර බඩු, ජවාරම් සිදුවන තිප්පොලක් ලෙසද මෙම ප්‍රදේශය ප්‍රසිද්ධය.

පසුගිය කාලය පුරා අප අනතුරු ඇගවූයේ රට තුළ මුස්ලිම් අන්තවාදයක් හොල්මන් කරන බවය. මෙම නිල ඇදුම් මාරු කිරීමේ ක්‍රියාවෙන් එම සැකය තවත් තවත් තහවුරු කර ඇත.

රජයේ පාසැල්වල නිල ඇදුමට පිටින් මුස්ලිම් අනන්‍යතාවයක් සහිත ඇදුම් ඇදීමට මුස්ලිම් දරුවන් යොමු කරමින් ඉන් පසුව එයට චක්‍රලේඛන සාදන ආකාරයට රෝහල් කාර්ය මණ්ඩලයේ නිල ඇදුමට පිටින් මුස්ලිම් ඇදුම ආදේශ කිරීමට පටන්ගැනීම තුළින් පෙන්නුම් කරන්නේ පැහැදිලි ලෙසම සමාජ ඛෙදුම්වාදයකට මුස්ලිම් සමාජයේ අන්‍යතාවය මුවාවෙන් යොමුවෙමින් ඇති බවයි.”

සංස්කාරක සටහන:

ඉහත ලිපියට ඔබ එවන ප්‍රතිචාර සම්පින්ඩනය කර මගේ අදහසද සමගින් වෙනම ලිපියකින් මා මේ පිළිබඳව විමසුමක් කිරීමට අදහස් කරමි. 

රනිල් වික්‍රමසිංහ

මුස්ලිම් වරුන්ගේ ප්‍රශ්න වලට ලංකාවේ මුස්ලිම් දේශපාලකයන් කථා කරන්නේ නැති බවත් නමුත් තමන් තනිවම කථා කරන බවත් රනිල් වික්‍රමසිංහ මහතා පවසයි. ඇත්තටම ලාංකික මුස්ලිම් වරුන්ට නායකත්වයක් නැත්ද? නැතිනම් මුස්ලිම් වරුන්ගේ නායකයා රනිල් වික්‍රමසිංහද? යන ප්‍රශ්නය විමසා බැලිය යුතුය. මෙහිදී පලමුව සොයා බැලිය යුත්තේ මුස්ලිම් වරුන්ට වෙනම නායකත්වයක් අවශ්‍ය ඇයි? යන කරුණයි.

රටක ජීවත් වන ජනතාව ලෙස රටේ සිටින ජනවර්ග වලට වෙන වෙනම නායකත්වයන් අවශ්‍ය නැත. නමුත් ඒ ඒ ජනවර්ග වලට රටේ පොදු නායකත්වයෙන් කෙනහිලිකම් සිදුවෙනවා නම් ඒ ඒ ජනතාව තමන්ට අනන්‍ය වු නායකයන් පත්කර ගත්තාට වරදක් නොමැති බව මගේ අදහසයි. රට තුල සංවර්ධනය සෑම පලාතටම සමතුලිතව ගලා යා යුතුය. නීතිය සහ සාමයද සෑම ජනවර්ගයකටම එක හා සමාන විය යුතුය. කිසියම් පුද්ගලයෙකුට තමන් මහජාතියට අයත් නොවන නිසා අසාධාරණ තත්වයක් හට ගන්නේ නම් එහිදී සුළු ජාතිකයන් ලෙස තමන්ට අනන්‍ය වු නායකයන් පත්කරගෙන තම අයිතිවාසිකම් දිනා ගන්නවා හැර අන් මගක් නොමැත. නමුත් ප්‍රශ්නය වන්සේ ලංකාවේ පවතින වත්මන් මුස්ලිම් නායකත්වය සැබෑ ලෙසින්ම මුස්ලිම් වරුන්ගේ ප්‍රශ්න දෙස බලනවාද? යන්නයි.

අද අප ඒ ගැන මුස්ලිම් නායකයන්ගෙන් විමසන කල ඔවුන් පවසන්නේ මේ රජය මුස්ලිම් වරුන්ට දැඩිලෙස අසාධාරණ කම් කළද මේ අවස්ථාවේ දේශපාලනිකව රජය සමග සිටිය යුතු බවයි. නමුත් ඔවුන් ඉතාම දීන ලෙස රජය සමග සිටීමෙන් අත්කරගෙන තිබෙන්නේ කුමක්ද? අද මුස්ලිම් නායකයන් මෙන්ම මුස්ලිම් ජනතාවට කෙනහිලිකම් කරන අය සිටින්නේද රජයේ පාර්ශවයේ නොවේද? ඒ අය මුස්ලිම් නායකයන්ට වඩා ආන්ඩු පක්ෂය තුල ප්‍රබලව සිටිනවා නොවේද? මුස්ලිම් නායකයන් රජය සමග සිටිනවා නම් ඔවුන්ට එම ආගම්බේධකාරීන් ආන්ඩු පක්ෂය තුල දුබල කිරීමේ හැකියාවක් තිබිය යුතුය. එසේ නැතිනම් රජය සමග සිටීමේ ප්‍රයෝජනයක් නැති බව මගේ අදහසයි.

අද මුස්ලිම් කොංග්‍රසයේ නායකයන් රජය සමග සිටින්නේ දේශපාලනික උපක්‍රමයක් නිසාද? නැත. රවුෆ් හකීම් මහතා රජය සමග සිටින්නේ අතාවුල්ලා සහ හිස්බුල්ලා නිසා බව මගේ අදහසයි. අම්පාර සහ මඩකලපුව යන දිස්ත්‍රික්ක දෙකෙහි හිස්බුල්ලා සහ අතාවුල්ලාගේ බලය මැඩීමට නම් මුස්ලිම් කොංග්‍රසයද රජයට හේත්තු වී සිටිය යුතු බව ඔවුන් සිතනවා විය හැක. මෙහිදී අවශ්‍යව තිබෙන්නේ කෙසේ හෝ බලය රැක ගැනීමද? නැතිනම් ඉදිරියට විත් මුස්ලිම් ජනතාව මුහුණ දෙන ප්‍රශ්න වලට සැබෑ ලෙස ඉදිරිපත් වීමද? මුස්ලිම් ජනතාව මුස්ලිම් කොංග්‍රසයෙන් බලාපොරොත්තු වෙන්නේ ඇමති ධූර දැරීමද? නැති නම් මුස්ලිම් ජනතාවගේ අයිතීන් වෙනුවෙන් පෙනී සිටීමද? මේ නායකයන්ට මුස්ලිම් ජනතාව වෙනුවෙන් සිය අමාත්‍ය ධූර පිළිකෙව් කිරීමට බැරි ඇයි?

මෙහිදී රජයට එරෙහි වීම යනු රනිල් වික්‍රමසිංහ සමග සංධාන ගැසීමද නොවන බව මුස්ලිම් නායකයන් මෙන්ම මුස්ලිම් ජනතාවද වටහා ගත යුතුය. පසුගිය කාලවකවානුව තුල රනිල් වික්‍රමසිංහ මහතාද රඟපෑවේ දෙබිඩි චරිතයකි. ඔහුද නැගී ආ සිංහල බෞද්ධ ජාතිවාදී රැල්ල හමුවේ මුණිවත රකින ලදී. අවශ්‍යම අවස්ථා වලදී ඔහුද මුස්ලිම් වරුන් වෙනුවෙන් පෙනී සිටිනවා වෙනුවට කලේ කර ඇරීම සහ තම ජාම බේරා ගැනීමයි. එමනිසා තමන් මුස්ලිම් ජනතාවගේ නායකයා බවට රනිල් වික්‍රමසිංහ මහතා පවසන ප්‍රකාශය ඔහුගේ තවත් දේශපාලනික දෙබිඩි කථාවක් පමණි. හලාල් ප්‍රශ්නය තුල ඔහුට අවශ්‍ය වුයේ මුස්ලිම් ජනතාවගේ ආගමික නායකත්නවය වන ජමියතුල් උලමා සංවිධානය තම දේශපාලන අතකොළුවක් කර ගැනීමටයි. එසේ කළ නොහැකි වු කල ඔහු ජමියතුල් උලමා සංවිධානයටද පහර දෙන ලදී. ආන්ඩු බලය ලැබී අන්තවාදීන් මෙලෙස මුස්ලිම් නායකයන් පෙලන කල විපක්ෂ නායකයාද ලංකාවේ මුස්ලිම් ආගමික නායකත්වයට පහර ගැසූ බව අප අමතක කළ යුතු නැත.